Dizionari de Lenghe Furlane

biât  bi|ât  [FO]

1. adi., s.m. viôt beât
2. adi., s.m. che, cui che al è pôc inteligjent, o pôc svelt in alc, o che nol sa cemût distrigâsi:  il biât predi, che nol jere taiât par chei imbrois, nol gjavà un gri di tane (Maria Forte, Cjase di Dalban); cuant che al lasse corompi e pierdisi e murî il so lengaç al è un popul in dissoluzion, une masse di biade int cence coesion, cence fuarce, cence direzion (Josef Marchet, Un element fondamentâl dal moviment autonomistic); Gelindo? Chel puar biât? (al rît) Ah! ah ah!… Siore mê, chest al è un scherç che il folc mi trai. Che mi permeti di no crodi. Une frute come sô fie sposâ un autome di chel gjenar? (Costantino Smaniotto, Co l'amôr al cimie)
   Sin. balort , balote , barbezuan , batecul , batocj , biadin , catùs , coion , corli , cudumar , çondar , dordel , dordul , gnoc , gnogno , gnognul , imbambinît , lodul , mamo , marlup , martuf , marzoc , mierli , mincjon , mone , monighe , pantalon , pote , salam , semplon , socol , stupit , totolò
3. adi., s.m. che, cui che al fâs dûl, compassion, soredut par vie che si cjate intune cundizion disgraciade:  chê biade cristiane e à vudis tantis scopulis in chescj ultins agns, e cence nissune colpe, che al sarès un pecjât no vê dûl di jê (Josef Marchet, Lis predicjis dal muini); lis causis dal sotsvilup e de divaricazion cressinte fra il Nord dai siôrs e il Sud dai biâts (Buteghe dal Mont, Luche Nazzi, Guide par un consum just e solidâl); e vignì une biade vedue cun doi fruts a picj, a domandâ che pal amôr di Diu i des une scudiele di farine par chês creaturis (Josef Cjargnel, La farine dal diaul); al jere bon di dâi il pan a un cualsisei biât diaul cjatât par strade e fâ di mancul dal so toc (Enrico Martina, Ricuarts e inlusions)
   Sin. cruziât , disditât , gramât , indât , infeliç , maldestinât , miserabil , miserevul , puar² , disgraciât
   
   1. che, cui che al à un bas nivel di istruzion, di pussibilitâts, che al è sot intune jerarchie e v.i.:  lis medaiis lis àn i gjenerâi e lis pidadis i biâts (Antoni Beline, Pre Pitin)
      Sin. disgraciât
   2. che, cui che al finìs par fâ rabie:  ma rivie o no rivie chê biade di coriere?; biâts fruts! cjale ce disordin che a àn lassât pardut!
      Sin. benedet , maledet , stramaledet , disgraciât
   3. ancje tant che apelatîf gjeneric o enfatic, cun sens misturât di rispiet, afiet, dûl, rabie e v.i.:  al si è maridât tart, e la sô femine, une buine biade, dome dopo dîs agns di matrimoni e à parturît une frutine (Pieri Somede dai Marcs, Nadâl); si rivà fin al 1999 par viodi une leç di tutele gjenerâl. Une biade di leç di tutele gjenerâl! (Adrian Cescje, Memoriis di politiche linguistiche)
      Sin. benedet
4. adi. in espressions di rispiet tal nomenâ i muarts:  biade sô none e jere dal 1908
   Sin. puar² , biel

Polirematichis e espressions idiomatichis

• biade la ore loc.inter.