Dizionari de Lenghe Furlane

benedet  /-èt/  be|ne|det  [FO]

1. p.pass. viôt benedî , viôt benedîsi
   Var. benedît
2. adi. che al à vût une benedizion divine o liturgjiche:  te buinoro di Pasco […] encje vuio tes osterios i presento salam e fuiaço benedets in glisio (Novella Del Fabbro, Pasco in Cjargno); i lûcs benedets de cristianitât
   Sin. beât , consacrât , sacri¹ , sant , venerât
   
   1. che al merete venerazion:  i vîfs e i muarts a vivin dongjelaltris: e a son ducj sot dal rivuart dal Signôr benedet (Josef Cjargnel, La fogolade dal bosc); Oh Madone benedete ce gracie grandone che o mi vês fate! (Tarcisio Venuti, La cjase di Toni)
3. adi. che al puarte alc di bon o che al è caraterizât di jessi bon, ancje in esclamazions:  o sin cressûts cuntun nono […] che cuant che a son rivâts i talians al diseve simpri: "Benedet il timp cuant che si jere sot il forest" (Giorgia Zamparo, Pre Bepo Marchet: culture e identitât); e tu fas spongje, sîr, formadi e scuete, / che par nô puars je robe benedete (Pieri Çorut, La vacje)
   Sin. fortunât
4. adi. che al merete rispiet, amôr, afiet e v.i., ancje come apelatîf:  duncje, cheste benedete femine, tal '23 mi à dât di tete par un trê mês (Alan Brusini, Come tai romançs); Oh! Signôr judaitmi… Luziut benedet no stâ murî, ah! Ce aio fat mai me!… (Pieri Somede dai Marcs, Al fresc); lui, benedet pre Nocent, a fuarce di lei sul libri, al spieghe la storie di Vignesie in maniere che bisugne restâ incantesemâts (Arturo Feruglio, Viaç a Vignesie); che Diu tal mereti benedete… (Pieri Somede dai Marcs, Vilie di Nadâl (teatri))
   
   1. apelatîf in viertidure di une letare a une persone che si è in confidence:  4 di Novembar / Siôr Meni benedet, / che al mi perdoni se par dôs setemanis no ai podût scrivi nuie pe "Patrie" (Arturo Feruglio, El lunis di Titute Lalele)
      Sin. cjâr
5. adi., s.m. (fam.) tant che apelatîf che al pues pandi une disposizion a mieç jenfri rispiet, afiet e disaprovazion, paternalisim:  va a cjase, benedet, e tegniti pai mûrs par no colâ tal sfueat. (Josef Marchet, Lis predicjis dal muini); calme, calmiti, benedet. No fasarès tant il bulo, se o fos in te (Carlo Sgorlon, Prime di sere)
   
   1. (eufem.) par antifr., cualifiche par esprimi rabie:  ma cetant che al sta chel benedet om par comprâ chel tabac! (Meni Ucel, La vacje)
      Sin. maledet , stramaledet
6. s.m. persone che si vuelii ben, che si è inamorâts:  chel riçot parsore il voli / lui mi fâs un grant difiet / lui mi fâs cjalâ in bande / là che al è il gno benedet. (Popolâr, Chel riçot parsore il voli)
   Sin. ben , amôr , vite , cûr , curisin
7. s.m. persone che no sa rangjâsi, limitade, ancje cun ritart mentâl:  nol è trist, ma al è un pôc un benedet
   Sin. bambin , bambot , biadin , biât , pandolo , pipinot , disgraciât

Polirematichis e espressions idiomatichis

• aghe benedete loc.s.f.
• benedet dal Signôr loc.s.m.
• benedet di Diu loc.s.m.
• mari sante benedete loc.s.f., loc.inter.

Proverbis:

• benedets i bêçs che si sude di bessôi
• di sabide soreli benedet par suiâi la cjamese al puaret
• il solt che si cjape a sotet al è un solt benedet
• Sante Barbare benedete vuardaitnus dal ton e de saete