Dizionari de Lenghe Furlane

benedî  be|ne|dî  [FO]

1. v.tr. domandâ a Diu ben e protezion par cdn. o alc:  cuant che Bertin e la Marceline a partirin, lui ju benedî e ur ordenà: "Mi racomandi, fait il vuestri dovê" (Maria Forte, Cjase di Dalban)
   Var. binidî
   
   1. consacrâ o clamâ protezion cuntun rituâl religjôs:  il plevan […] al scomençâ a fâ il zîr par benedî lis cjasis (Pieri Somede dai Marcs, Par une lengate); a lavin sù in procession cu lis crôs fin a Sant Michêl e sul cuc de culine il predi al benedive la tiere di ogni bande (Dino Virgili, Cuel Valâr)
2. v.tr. laudâ glorificant:  nol veve di san nome la lenghe e al continuave a benedî il Signôr (Catarine Percude, I viars di sant Jop)
   
   1. preseâ dal fonts dal cûr e laudâ:  Heleni e Sandri […] di chê volte a benedirin tantis oris passadis insiemi e la famee di jê e slargjà i braçs ancje a lui (Maria Forte, Cjase di Dalban)
3. v.tr. di Diu, beneficâ, ancje in invocazions, sedi pardabon che par sorprese, scherç, disaprovazion e v.i.:  oh che Diu lu benedissi siôr nodâr! (Pieri Somede dai Marcs, Un testament); Mandi Agnul, che il Signôr ti judi e che simpri ti benedissi (Pieri Somede dai Marcs, Vilie di Nadâl (teatri))
   Sin. assisti , cjalâ , judâ , parâ , protezi , vuardâ
   
   1. concedi une gracie, une fortune:  il Signôr al veve ancjemò benedide la sô cjase cu la nassite di doi zimui (Pieri Menis, Sul agâr)
   2. ancje di entitâts no divinis o sacris, dâ une fortune, une cundizion une vore buine, rindi biel, bon, plasevul e v.i.:  il fresculin de rosade che e umidive la campagne e che e benedive il paîs (Pieri Somede dai Marcs, Gnot clare gnot scure); i fîs a scjaldin la cjase, a benedissin la cjase, le jemplin… (Meni Ucel, La visite dal vescul)

Polirematichis e espressions idiomatichis

• lâ a fâsi benedî loc.v.
• mandâ a fâsi benedî loc.v.