Dizionari de Lenghe Furlane

disgraciât  dis|gra|ci|ât  [FO]

1. adi., s.m. che, cui che nol à la benedizion de gracie divine, che al va cuintri des leçs divinis, ancje tant che apelatîf o titul di ofese gjeneric o ancje di dûl:  «Cui jerial chel nemâl che si jere impaçât cun jê?» «Nome un disgraciât, une bestie… cun tantis feminis che a son!» (Pieri Menis, Cui si jerial impaçât cun Modestute?)
   Var. disgraziât , disgraceât , disgrazeât
   
   1. che, cui che al à la fortune cuintri o che i è tocjade une disgracie:  «Ce aio di capî? Che o soi nassût disgraciât, eco dut…» (Carlo Sgorlon, Prime di sere); une volte si diseve che, dapît dal jet dal muribont, a son l'agnul e il gjaul che a barufin fra di lôr par caparâsi la anime dal disgraciât (Antoni Beline, La globalizazion de sensibilitât)
      Sin. sfortunât , scalognât , disditât , sventurât , disfortunât
   2. persone tocjade di une malatie o menomazion fisiche o mentâl:  nassût intun sierai de periferie, al sarès finît cui vuarps, cui çuets, cui disabii, disgraciâts, psichiatrics e sbandâts (Tonin Cjapielâr, Preparatîfs in cîl)
      Cfr. pidimentât , biât , strupiât
2. adi. che al è caraterizât di disgraciis, di fats negatîfs:  fufignis che masse dispès nus incjochin e nus intortein, come che ben o savìn noaltris, testemonis dai nestris timps disgraciâts (Angelo Floramo, Des Americhis par continuâ une magjie cun lidrîs profondis)
   Sin. brut , indât , sfortunât , malintopât , disditât , signestri , trist , sventurât , maldestinât , nefast , funest
   
   1. che al è caraterizât di pocje fortune o di un risultât o di un efiet negatîf:  Nicolau invezit al veve nome un pinsîr, saltâ fûr dal dut e par simpri di chê imprese disgraciade e maledete (Carlo Sgorlon, Ombris tal infinît)
      Sin. brut , indât , sfortunât , malintopât , scalognât , stuart , disditât , scalognôs , signestri , trist , sventurât , maldestinât

Proverbis:

• la vite e je il content dai fortunâts, il torment dai disgraciâts