Dizionari de Lenghe Furlane

trist  trist  [FO]

1. adi., s.m. che, cui che al fâs il mâl di pueste:  gno pari […] i ribaltave la caroce al prepotent e lu jemplave di botis, ma vuadulis a sanc che i vues di chel beolc sot i colps a sunavin tant che se il pai al ves pestât suntun tambûr. […] Mê mari i diseve: «Menut, la vuere ti à fat deventâ trist» (Alan Brusini, Come tai romançs); nol jere trist om, ma si sa che il mont dal lavôr al è fat di sotans e di sorestants e il sorestant al vûl che si capissi ben che al è lui che al comande (Roberto Ongaro, Il muc)
   Sin. cjatîf
   
   1. che al è fat par fâ mâl:  i mostravin cun tantis piçulis, tristis azions, che no ur interessave plui di jê (Roberto Ongaro, Agunie di une mari)
      Sin. mâl , brut , cjatîf
   2. che al mostre intenzion di fâ mâl:  Guri si fermà devantji cu la muse triste e i pugns sui flancs e lis gjambis a larc (Dino Virgili, La aghe da pît la cleve); nome done Pine e olsà cjalâlu cui siei voi triscj come se e ves volût fulminâlu (Pieri Menis, Chei di Muraie)
   3. ancje di alc di inanimât, ma che al pues jessi personificât, negatîf, che al fâs dam:  il Tiliment cu la largjure des gravis come une neveade e lis venis scuris da la aghe. Chel flum bon o trist daûr lis ploiis! (Maria Forte, Sul cjar di Pauli Gurin)
   4. che al à agonisim agressîf:  vûstu capîle di jessi plui trist! O âstu di spietâ che i aversaris ti implantin il comedon tes cuestis par capîlu? (Stiefin Morat, Donald dal Tiliment)
   5. che, cui che al è une vore determinât e intransigjent:  stant che mi pâr che nissun si è candidât a fâ il trist, mi tocje di fâlu a mi (Adrian Cescje, Memoriis di politiche linguistiche)
2. adi. di animâl, agressîf o pericolôs:  dentri il fîl di fier spinât a stan i aerofonos e cjans plui triscj dai lôr parons (Alan Brusini, Amîs come prime)
   Sin. cjatîf
3. adi., s.m. di frut, che nol ubidìs, che no si compuarte ben:  chê dal cjarbon pai triscj, o de cinise o dal baston al jere un mût di dî; nol sucedeve mai. Nissune Sante Luzie - di puare mendiche che e fos stade - e veve cûr di cjastiâ i fruts in chê maniere (Riedo Pup, I furlans e Sante Luzie)
   Sin. cjatîf
4. adi. negatîf, che al è indreçât al mâl:  forestarie capitade dongje a dâ il trist esempli (Josef Marchet, Lis predicjis dal muini); viôt che pal mont a son tantis brutis robis e tristis ocasions (Pieri Menis, Il «trono» dal von)
   Sin. brut , mâl , cjatîf
5. adi. cun carateristichis negativis, cun pocje capacitât, cualitât:  cheste è une mercanzie, ma cussì triste, / che intache il cjavedâl sence vuadagn (Ermes di Colorêt, I, 260)
   Sin. cjatîf , scart¹
6. adi. che nol plâs di savôr, odôr e v.i.:  mi àn vierte une butilie di vin: al jere tant trist, ma tant trist che lu ai parât jù sudant frêt (Antoni Beline, Pre Pitin); propri il mio nâs / a nol po soportâ / chel trist odôr, / ne la bocje il savôr (Pieri Çorut, Il pipâ)
   Sin. brut , cjatîf , ledrôs , mâl
   
   1. s.m. odôr o savôr che nol plâs:  "Mama, il lat al nasa di trist." (Alberto Luchini, Uchì)
7. adi. che al è contrari, svantazôs, che al fâs dam o che che al fâs vuadagnâ pôc, che nol à carateristichis positivis e v.i.:  une fonde e une base dulà che al podarà grampâsi intai moments triscj de vite (Francesc Placerean, I furlans a àn di preâ te lôr lenghe par cuistions di religjon e di dignitât); agns misurâts a stagjons, buinis o tristis (Maria Forte, Dome la cjampanute di Sant Bortul)
   Sin. cjatîf , ledrôs , brut
8. adi. [TS] med. di malatie o lesion, che e je grave, e va in piês e si slargje tal organisim:  tumôr trist dal cerviel (ASS3, Aprofondiment Celulârs)
   Sin. cjatîf
9. s.m. dome tal sing., la part negative di alc:  o vin viodût di bessôi il dret e il ledrôs, il just e il sbaliât, il bon e il trist, tant dal talian che dai forescj (Josef Marchet, Cumò che o savìn…)
   Sin. mâl , brut , cjatîf
10. s.m. (par anton.) dome sing., ancje cu la iniz. maiusc., il diaul, la personificazion dal mâl:  i cristians, par onorâ il Signôr, a àn tirade sù la plêf di sant Florean, une des plui bielis e cjaris de Cjargne; come a dî che il trist, prin o dopo al va sot (Josef Cjargnel, La liende di Dimponç)
    Sin. diaul , mâl

Polirematichis e espressions idiomatichis

• cjoche triste loc.s.f.
• cu lis tristis loc.av.
• trist timp loc.s.m.
• trist voli s.m.

Proverbis:

• al è devot al bon e ancje al trist ladron
• al è un trist uciel chel che nol puarte cun se la plume
• bogns i parincj, bogns i amîs, ma cuant che no 'nd è nuie a son ducj triscj
• bon pe bocje, trist pe borse
• cuant che a son di maridâ nissun fantat al è puar, nissune fantate triste
• cuant che il bon al mancje, il trist si met a vivi
• cuant che il bon al mûr, il trist si mende
• cuant che il bon al mûr, il trist si met a fâ judizi
• cui bogns si fâs ce che si vûl, cui triscj miôr che si po
• cui triscj al è brut vê ce fâ
• cui triscj bisugne fâ miôr che si po, cui bogns si fâs cemût che si vûl
• cul bon fâs ce che tu vûs, cul trist ce che tu pûs
• cul perdonâ ai triscj si puarte dam ai bogns
• daspò dal trist al ven il bon
• daspò dal trist timp al ven il soreli
• de triste volontât liberaitnus domine
• di triste volontât libera nos domine
• e je triste la cjoche dal pan
• e je triste la cjoche dal vin, e je piês chê dal zigar, ma la piês e je chê dal pan
• e je triste la lane che no si po filâ
• fin che al è viert il granâr di crist, cui che no si inzegne al è trist
• fin che al è viert il solâr di Crist, cui che no si inzegne al è trist
• grant mancjadôr, trist bevidôr
• i rîs a son la mignestre plui buine e la plui triste
• il bon al crôt ducj bogns, il trist al crôt ducj compagns di lui
• il bon i crôt a ducj, il trist al fâs ducj come lui
• il mâl al è un trist compagn
• il Signôr nus vuardi des tristis lenghis
• il timôr al è dai triscj
• il trist al scjampe ancje se nissun no i cor daûr
• il trist al sparagne il bon
• il trist che si fenç bon al è un grant baron
• la aghe e je un trist confuart
• la buine femine a fâs la cjase, la triste le disfâs
• la fam e je un trist conseîr
• la leç e je fate colpe dai triscj
• la lenghe e je il plui bon bocon e il plui trist
• la piore fûr dal trop e je simpri triste
• la ruede plui triste e je chê che plui si fâs sintî
• lis disgraciis a son un trist companadi
• lis disgraciis a son une triste scuele
• lis tristis gnovis a son simpri veris
• lis tristis gnovis a van simpri indenant
• lis tristis pioris a son simpri fûr di trop
• miôr pôc che tant e trist
• miôr sôi che no in triste compagnie
• miôr un trist marît che no un bon fradi
• se tu amis a son ducj bogns, se tu odeis a son ducj triscj
• Tarcint, biel il paîs, triste la int
• trê robis a fasin scjampâ la int di cjase: il fum, la triste muîr e la cjase discuvierte
• trist al è chel mistîr che nol manten il mestri
• un trist paiadôr, un bon scuedidôr