Dizionari de Lenghe Furlane

beât  be|ât  [AF]

1. adi., s.m. che, cui che al à une grande fortune, ancje in esclamazions e espressions proverbiâls:  Tite, beât tu che no tu âs tancj pinsîrs! (Pieri Somede dai Marcs, Barbane); "Beât lui, magari ancje jo!" (Alan Brusini, Amîs come prime)
   Sin. fortunât
   Var. biât
2. adi., s.m. [TS] religj. che, cui che al gjolt de vision di Diu:  Infier e Purgatori e Paradîs, / al visità lis animis danadis, / po chês in purghe e in ultin lis beadis (Emilio Nardini, Lenghe e dialet)
   
   1. tant che atribût de Madone e dal pape:  "Ah Vergjin, Vergjin Santa e Beada, se ti aiu fat jo? Se pecjâts, se colpis, jo, puora femina, bandonada ca jù a lavorâ e patî? […]" (Pier Paolo Pasolini, I Turcs tal Friûl)
3. s.m. religj. persone venerade de Glesie cun cult public ancje se no sant:  la arcje di marmul dal beât Beltram (Natascia Gargano, Gnove scuvierte su la acuile di Beltram, simbul de Patrie: interviste ae diretore dal Museu dal Domo di Udin)
4. adi., s.m. dal dut content, sodisfat, cuiet e cence pinsîrs:  a jerin daûr a fâ un grant paston insiemi cul pari dut content e beât (Andreina Nicoloso Ciceri, Trê sûrs - Racconti popolari friulani I); Luziute mi à puartât un bon te di camamile che mi à fat durmî beât come une creaturine inocente (Arturo Feruglio, Viaç a Vignesie)
   Sin. cence pinsîrs , content , fortunât , pacjific , seren , gloriôs , estasiât
   
   1. di alc che al da contentece, serenitât, plasê e v.i.:  intun lamp je passade / la gnot la plui beade! (Pieri Çorut, La gnot di Avrîl su la coline di Buri)
      Sin. fortunât , seren
5. adi., s.m. che, cui che al à une anime inocence, e in câs ancje pocje inteligjence, viôt biât :  beât om, nol saveve lui il dam che nus sarès vignût (Alan Brusini, Come tai romançs); cetantis che ind à ditis cuintri il Judiç istrutôr e cuintri chel beât om di Procuradôr dal Re (Guido Antonioli, Florean dal Palaç, I, 1)

Polirematichis e espressions idiomatichis

• can dal beât loc.inter., loc.s.m.

Proverbis:

• beade chê cjase che e à un vieli dentri
• beât chel che al po bussâ il Crist di bessôl
• beât chel che al po russâsi di bessôl
• beât chel muart che al plûf sul so cuarp
• beât il paron se il contadin al puarte il cjapiel in bande
• beâts chei fîs che a àn lôr pari a cjadaldiaul
• beâts i prins fûr che jù par la aghe
• beâts i prins fûr che tes pachis
• beâts i ultins se i prins a àn creance
• Març sut, Avrîl bagnât, Mai temperât, beât chel che al varà semenât
• tal paîs dai vuarps beât cui che al à un voli