Dizionari de Lenghe Furlane

amôr  a|môr  [FO]

1. s.m. sintiment di grant afiet par cdn. o par alc:  i gjarmaneots che a partivin a cjalavin cul voli di amôr e di dolôr la lôr aghe e la saludavin cidins (Dino Virgili, La aghe da pît la cleve); i fîs dal defont fradi Nardon no si disfin di amôr tra di lôr (Josef Marchet, Lis predicjis dal muini); l'amôr pe sô tiere, pe sô lenghe, pe sô storie al à puartât Agostinis … a lâ insot ancje te sô art (Erika Adami, O ai scrit pal gno popul)
   Sin. ben
2. s.m. sintiment fuart, cuntune grande impuartance di desideri erotic e afiet:  un amôr furiôs, cence calcui, cence resons (Dino Virgili, La aghe da pît la cleve); lui nol jere puartât ai strabalçs dal amôr (Maria Forte, La tiere di Lansing)
   Cfr. brame , passion
   
   1. sessualitât, erotisim:  i plasês dal amôr sai procure lant cun feminis di pôc presit (Pierluigi Visintin, Friûl e furlans te Histoire de ma vie di Giacomo Casanova)
   2. intai animâi, l'istint sessuâl e il moment che si manifeste l'istint riprodutîf:  i uciei in amôr a zornavin tra il vert (Pieri Menis, Zilugne)
      Sin. calôr¹
   3. intes plantis, il meti fûr lis rosis e lis primis fueis:  il profum da la planure za dute in amôr (Catarine Percude, Il cjan blanc di Alturis)
3. s.m. rapuart sentimentâl, o ancje sessuâl:  tes cjançons di jê a jerin amôrs finîts e fantatis no plui bussadis, puemis no plui menadis tai prâts (Agnul di Spere, La pueme cu la vôs biele); i vai i amôrs / i vai i amîs / i ti vai te / l’omp che i varès volût essi / il fradi che i varès volût vê (Giorgio Ferigo, Trenta agns)
   Sin. aventure , caravane , moroseç , rapuart , storie
4. s.m. inte religjon cristiane, grande bontât di Diu:  al è l'amôr di Diu la vie de perfezion (Francesc Placerean, Cuant che tal matrimoni al è l'amôr cristian, li al è verementri Diu)
   Sin. caritât
   
   1. traspuart dal om par Diu e pal prossim:  e passe a planc sot un grant soreli la procession pai borcs come une promesse di fede, di amôr, di caritât (Pieri Somede dai Marcs, Corpus Domini); o crôt di scugnî indicà tal nestri fradi inte fede, Fausto, un om che al à dât un esempli di amôr dal prossim (Francesc Placerean, Pe muart di Fausto Schiavi)
      Sin. caritât
5. s.m. persone che si vuelii ben:  o ai mangjât un rap di ue / par sclarîmi un tic la vôs, / e cumò che la ai sclaride / vuei fâ un cjant al gno amôr (Popolâr, O ai mangjât un rap di ue); "Oramai chel che al è al è, e l'è miôr zuiâ a cjartis viartis." "E il mio amôr? Che al ves di cjapâse?" (Vittorio Vittorello, A ogni cost); pal siôr pari al à une grande sugjizion; ma el grant amôr di Josef e je la done mari (Arturo Feruglio, I stivâi di Zuan Batiste)
   Sin. cûr , ninin , vissare , vite , stele¹
   
   1. dispès come vocatîf:  "Blancjuteflôr, judimi, o mio amôr. " Blancjeflôr a ven e lu cunfuarte (Dolfo Zorzut, Blancjuteflôr e el zuiadôr); Mariute, Mariute… amôr gno! (Maria Forte, L'aventari pal barcon)
      Sin. cûr , curisin , ninin , stele¹ , stelon , vissare , vite , anime , bambin
6. s.m. grande passion, interès marcât:  par ingrandî l'amôr de lis arts, del studi, del lavôr, del comerci, si formarin lis Societâts di incoragjament (Federigo Comelli, Il me paîs); ma pussibul, sacra bestia, che nissun dai 'sovins a nol cjapi amôr pa robis da cjasa sô? pussibul che al si interessi dome da merecanadis? (Ugo Pellis, Dô peraulis di preambul a Storiutis gurissanis)
   Sin. interès , passion
   
   1. grande brame:  il peç al è muart e nissun si sint in colpe… Al è un peç! Ma lui al sa ben che l'amôr pai bêçs no si ferme dome al taiâ dai lens (Maria Forte, La tiere di Lansing)
   2. intindiment, voie di otignî alc:  par amôr di pâs, Lissandri al veve voltât une part dal discors par talian (Franca Mainardis, Il sium di Lissandri); "Pal amôr di no promovi scandui, nome par chest, el matrimoni si farà…" (Arturo Feruglio, In cîl e je une stele!…)
7. s.m. ativitât che e jemple di passion:  il cjant al è il so plui grant amôr
   Sin. passion , vite
8. s.m. [BF] reson, cause:  o met la pelice par amôr dal frêt (Giulio Andrea Pirona, Ercole Carletti, Giovanni Battista Corgnali, Il Nuovo Pirona)

Polirematichis e espressions idiomatichis

• fâ l'amôr loc.v.
• lâ in amôr loc.v.
• o par amôr o par fuarce loc.av.
• par amôr o par fuarce loc.av.

Proverbis:

• amôr al à un grant savôr
• amôr al clame amôr e vilanie e clame vilanie
• amôr al è amôr e no brût di verzis
• amôr al fâs amôr, crudeltât lu consume
• amôr cence barufe al sa di mufe
• amôr cence barufe al va in mufe
• amôr cence stime, pan cence sâl
• amôr che al nas in malatie cuant che si vuarìs al passe vie
• amôr di cusin al è plui fin
• amôr di patrie nol è brût di fasûi
• amôr di patrie nol è brût di verzis
• amôr e signorie no amin compagnie
• amôr nol domande ni pan ni polente
• amôr nol è mai vieri
• amôr nol è ni polente ni brût di verzis
• amôr vieri nol devente ranzit
• amôr vieri nol ven di rusin
• bisugne temê Diu par amôr e no amâlu par timôr
• cui che al à dongje dal fogolâr pâs e amôr, al è un siôr
• cui che al à pâs, ligrie e amôr, dongje dal fogolâr al è un siôr
• cui che al è fortunât in amôr che nol zui di cjartis
• cui che al fâs lis robis cun amôr al è un grant dotôr
• cui che nol à amôr pes bestiis no 'nd à nancje pai cristians
• fortunât in amôr, disfortunât a cjartis
• fortune in amôr e puarte fortune al zûc
• fra l'amôr e il fum no si viôt nancje la lum
• il prin amôr nol scjampe mai dal cûr
• il timp fat di gnot al dure tant che l'amôr dai viei
• l'amôr al è vuarp
• l'amôr al ven dal util
• l'amôr ind fâs fâ di ogni colôr
• l'amôr nol cjale diferencis
• l'amôr nol è brût di verzis
• l'amôr, il fûc e la tos prest si cognòs
• la zelosie e je fie dal amôr
• masse amôr ti svuarbe, masse dolôr ti cope
• ni la tos ni l'amôr no stan scuindûts
• ni sabide cence sflandôr ni femine cence amôr
• tos e amôr si pandin di bessôi
• tropis voltis l'amôr al va jù pai lavris
• vin e amôr, vite di siôr