Dizionari de Lenghe Furlane

stele¹  /stè-/  ste|le  [FO]

1. s.f. cuarp celest che al mande lûs proprie:  dome par rivâ tal sisteme di Alpha Centauri (la stele plui dongje dopo dal Soreli) a volaressin 500 mil agns (Checo Tam, Spazio 1999); il cîl al jere biel net, e i someà che lis stelis a fossin plui grandis che mai (Agnul di Spere, I prâts des Savodagnis); a racuei ti voi lis stelis / tal grant prât dal firmament; / jempli il zei cu lis plui bielis / e po torni dal moment (Emilio Nardini, Serenade)
   Cfr. trê rês , siet durmients , bielestele , stele dal pastôr , stele dal dì , stele tramontane , stelis tramontanis , cjar piçul , cjar grant , cjar mat , stele di Betlem , clocje , macis , bachetis , ristiel , siets , strade di Rome , strade di Jerusalem , strade dal paradîs , stradon des stelis , strade di Betlem , strade di sant Zuan , presepi , vie dal cîl , vie di Rome , strade da la Madone , strade di sant Jacum , strade blancje , stradumane , stradalbe
   
   1. ancje in metaforis o paragons par dî alc che al slûs:  une biele fantate, vistide di blanc, cui cjavei di aur e doi voi neris lusints come dôs stelis (Pieri Menis, Lis leiendis di Buie)
2. s.f. cualsisei figure o robe che e vedi une forme a pontis, che pal solit si pues inscrivi tun cercli:  une dì di chês fredis, di chês cu la glace che e fâs lis stelis sui veris (Roberto Ongaro, Cretevierte); un cjaruç di olm fis, verdulin di colôr, che al fumave la beche cun dôs ruedis ben cercladis, i muiûi cu la stele dai rais lavorâts (Dino Virgili, Il cjaruç dai Bas)
   
   1. decorazion o distintîf cun chê forme:  il brigadîr talian, cu lis strissis rossis jù pai bregons e lis stelis di arint denant dal cuel, al fevelave di brigants de Basse Italie (Dino Virgili, La aghe da pît la cleve)
3. s.f. magle taronde blancje tal cerneli di un cjaval o di une vacje o sim.
   
   1. maiusc., dispès tant che non propri di une bestie cun tune magle blancje tal cerneli:  la Stele, cuiete tal so cjanton scûr, e moveve i siei voi tonts e e parave jù il fen a bocjadis (Maria Forte, La tiere di Lansing)
4. s.f. simbul che al marche la categorie di ristorants e albiercs intune scjale di un a cinc:  [un turist contemporani tipic] al sielç un timp di permanence plui alt de medie (une setemane), ma al cîr la cualitât, selezionant struturis pal plui a 4 stelis (Roberto Pensa, La odissee di un potenziâl turist interessât al Friûl multiculturâl)
   
   1. simbul che al pues marcâ la cualitât o l'agradiment in rivistis, sîts, rêts sociâls e v.i.
5. s.f. (fig.) ancje tant che entitât sorenaturâl che e pues decidi il destin o judâ:  «Tu, fantacina, che a ti dein ben li steli!» «Encja a vô, siôr.» (Novella Cantarutti, Il maestri di teraçs)
6. s.f. (fam.) sorenon di afiet doprâts cu la persone che si vuelii ben, cui fîs, cui animâi e v.i.:  je passade la mê stele: / mandi, mandi, la mê biele (Zuan Nazzi Matalon, Ottorino Burelli, Sacheburache); par me tu sês un tocut di stele, un suspîr di amôr, une robe dolce che e rive fin insom (Agnul di Spere, Chê dì che al neveà a Vignesie)
   Sin. anime , stelute , vite , cûr , curisin , curon , lûs , biel , stelon , stelone
7. s.f. personaç une vore cognossût, in particolâr tal mont dal spetacul:  il festival al à ospitât plui di 40 stelis cinematografichis che a vignivin di 11 diferents paîs asiatics (Fabian Ros, Profii_festival)
8. s.f. [TS] bot.com. viôt stelute alpine

Polirematichis e espressions idiomatichis

• lâ tes stelis loc.v.
• puartâ tes stelis loc.v.

Proverbis:

• cui che al à a cjase donzelis, che nol cjali lis stelis