Dizionari de Lenghe Furlane

lûs  lûs  [FO]

1. s.f. ent fisic, che al ven di une font naturâl o artificiâl, che al fâs che si puedin viodi lis robis cun clarece:  il solfar mandât fûr in atmosfere […] al judave il vapôr di aghe a condensâ, formant nûi […] cuntune plui grande capacitât di rifleti indaûr la lûs dal Soreli (Dario Bianchini Giaiotti, Fulvio Stel, Clime e incuinament: prime l'ûf o la gjaline?); la lûs frede dal lampion de strade e bateve dentri pe puarte fin sul ultin scjalin (Pieri Menis, Nadâl ancje par Gjelmin); o sintivi il gno gjal a saludâ la prime lûs dal dì (Josef Marchet, Lis predicjis dal muini)
   Sin. lusôr
   
   1. [TS] fis. radiazion eletromagnetiche che le percepìs il voli uman e che e à une lungjece di onde tra i 0,77 e i 0,39 micron
2. s.f. puest o posizion li che a batin i rais dal soreli o di une altre font luminose:  Dorine e cor sù e, cjolte in braç la piçule, si met denant dal barcon, te lûs, a dâi di tete (Pieri Menis, Chei di Muraie)
   Sin. lusôr , clâr
3. s.f. ogjet che al mande rais luminôs:  il cîl al jere dibot scûr, lis lûs de citât alte a tacavin a impiâsi (Agnul di Spere, Usgnot partide di balon)
   Sin. lusôr
   
   1. aparât par iluminâ:  par viodi, al scugnive impiâ la lûs par vie che i scûrs a jerin sierâts (Roberto Ongaro, Cretevierte); a miezegnot […] e tornave la diplomade par fâi la ultime endovene e par distudâ la lûs (Amedeo Giacomini, Tal ospedâl)
      Sin. lusôr , lum¹
4. s.f. corint eletriche:  spesis di lûs, riscjaldament, telefon (Linda Picco, Sandri Carrozzo, Efiets economics e ocupazionâi des leçs di tutele de lenghe furlane)
5. s.f. (fig.) pont di viste:  par furtune che il Mestri Valcic mi à fat cjalâ il fat sot di une altre lûs (Christian Romanin, La cjacarade dal Mestri)
6. s.f. (fig.) impression che e fâs someâ lis robis intune cierte maniere:  o vevi let su la sô muse la ombre di une femine che e vîf come bandonade. […] Chest pinsîr me presentave sot di une lûs plui umane (Alan Brusini, Gian Paolo Linda, I forescj); la storie le contin difarente e e cjape dute une altre lûs (Laurin Zuan Nardin, Storie o storiis?)
   Sin. lusôr , ombre
7. s.f. (fig.) aspiet, spec. de muse, de maniere di cjalâ e de ciere:  chês frutis a vevin tai voi e su la muse la lûs di lôr mari, une lûs vive e dolce (Alan Brusini, Come tai romançs); e veve la muse dure e une lûs di tristerie intes balis dai voi (Gianni Gregoricchio, Trê feminis)
   Cfr. lamp¹ , ombre
8. s.f. (fig.) entitât o emanazion positive, robe caraterizade di bielece, bontât e v.i.:  a i sabol tal cour siminci vecji che a dislontanein la lûs di Diu (Novella Cantarutti, Cença sunsûr); al pensà che ce che nol jere rivât a fâ in chel martars al varès podût fâlu la joibe dopo. E al torne la joibe dopo, cun chê lûs di sperance tal cûr (Meni Ucel, Rosaris); Crist di fat al mûr e al resurìs, al puarte vite, lûs di cognossince e salvece (Sandri Carrozzo, Nadâl)
9. s.f. viertidure di une puarte o di un barcon:  si sint un movi di cjadreis e une femine e compâr te lûs de puarte (Alan Brusini, Gian Paolo Linda, I forescj)
   
   1. lastre, part dal spieli che e riflet la imagjin:  tignî la suaze e cambiâ la lûs dal spieli
10. s.f. [TS] tecn. sezion di un condot par licuits

Polirematichis e espressions idiomatichis

• cuintri lûs loc.av., loc.adi.inv.
• di une lûs a chê altre loc.av.
• meti in brute lûs loc.v.
• meti in lûs loc.v.
• pierdi la lûs dai voi loc.v.
• sierâ lûs loc.v.
• tant che te lûs dai voi loc.av.
• vignî in lûs loc.v.

Proverbis:

• il vuarp al brame la lûs, l'uciel la libertât
• la lûs no art cence vueli
• ogni vuarp al brame la sô lûs