Dizionari de Lenghe Furlane

clâr  clâr  [FO]

1. adi. di colôr, che si svicine al blanc, che al è pôc cjariât:  di chê altre bande si alçave la musse zale des panolis, un zâl clâr, lusint, biel, come l'aur (Pieri Menis, La gjaline robade)
   Sin. palit¹ ipon. , smamît ipon. , smavît ipon. , smuart ipon. , spavit
   
   1. che al à un colôr che si svicine plui al blanc che al neri:  lis trutis, i gjavedons e i gjambars de Tor, dal Tiliment, dal Arzin e dai roiuçs di bosc a jerin cussì clârs, piçui, svelts e trasparents di stentâ a viodiju tal sclipignâ de aghe jenfri i claps (Riedo Pup, I furlans e la cjace)
   2. dai voi, colôr celest o vert o grîs:  il paron, Pieri, al jere un omenon grant e grues, su la cincuantine, cun doi voi clârs, i ocjâi e dôs mostacjonis grisis (Roberto Ongaro, Il muc)
2. adi. che al à, che al fâs o che al riflet lûs:  un barcon de lôr cjase al jere ancjemò clâr (Maria Forte, La tiere di Lansing)
   Sin. iluminât , inlusorât , lusint , lusorôs , slusint , luminôs
3. adi. di timp, cîl, aiar, che al è iluminât dal soreli, o in câs ancje de lune e des stelis, par vie che no son nûi:  chel soreglut che al jeve di Cuie e po al passe adasin li parsore intun cîl net e clâr tant che un voli di uciel, par butâsi, tal ultin, daûr dal Cjaval tun sflandôr di no crodi (Meni Ucel, La "Fieste dai Roncs"); la gnot e jere clare tant che il dì e la lune taronde e gnove e rivocave i siei rais di lûs suntun mâr ingrispât che al slusignave tant che polvar di diamant (Fabian Ros, Eivissa mon amour); il soreli, che al jevave daûr di lôr, al faseve simpri plui clâr il dì (Catarine Percude, La fuiace de Madone)
   Sin. limpi , net , seren
4. adi. (fig.) che al à, che al da une sensazion di serenitât:  no pandeve dal sigûr i siei agns cun chê muse clare, legre cui ganassins colôr di rose (Pieri Somede dai Marcs, Anzule); al à simpri tirât e tasût e cjapadis tant che un mus, fin cuant che pe sô strade al è colât, cu la anime monde e il voli clâr (Ivano Urli, Il mus di Lise)
   Sin. seren , gjubiâl , pacjific
5. adi. di aghe o altri licuit, che al lasse passâ la lûs, che al lasse viodi a traviers:  cheste aghe e je istès tant clare che si viôt il fonts de plere, si ben che al sarà vot, dîs metris insot (Dino Virgili, Un riul tra Venit e Friûl)
   Sin. limpi , net
6. adi. di licuit, che al à pocje densitât, pocje sostance, magari par vie che al è stât slungjât cu la aghe:  di cene e jere juste une mignestre clare clare
   Sin. slungjât , lami
   
   1. di complès di elements, pôc fis:  il bosc si fâs râr e plui clâr tal ultin toc (Maria Forte, La tiere di Lansing)
7. adi. che si rive a percepî ben:  par ordin che si rimpinave sù pal troi, si sintive la sô vôs alte e clare (Alan Brusini, La cartuline)
   Sin. net
8. adi. che ducj a capissin, che si è ducj dacuardi, che al è fûr di dubi:  e jere clare dute la colpe di Catin (Maria Forte, L'aventari pal barcon); al è clâr che sot dal Fassisim, che al è il non plus ultra dal nazionalisim intolerant e centralizant, no pues vignî ametude nissune libertât di lenghe (Marc Stolf, La libertât di lenghe tant che dirit fondamentâl. Atualitât e complessitât dai contignûts de "Cjarte di Chivasso"); lis Costituzions de Patrie, che a son il monument dal dirit furlan, a son i segns plui clârs de maturitât politiche e civîl de societât furlane dal timp (Gian Carlo Menis, Storie dal popul furlan)
   Sin. ciert , net , palês , sigûr , evident
   
   1. av., inter. tant che rispueste afermative o in espressions enfatichis o retorichis par rimarcâ alc:  "Âstu sierât la puarte a clâf tal vignî fûr?" "Clâr"; al è stât un incuintri cetant impuartant par me e o speri, clâr, di vêi fat un servizi preseât al poete (Erika Adami, "Amôrs" in musiche); dopo dal 1866 il Friûl al à tornât a dividisi in doi: un tierç sot da la Austrie e doi tierçs sot da la Italie. Clâr, la zone di Gurize di là e nô di ca (Francesc Placerean, La nestre storie)
      Sin. sigûr , ciert , sì , lafè sì , ma lafè sì
9. adi. di un messaç, contignût e v.i., che al è facil di capî:  la mê idee e jere chê di fâ un libri sempliç di lei e plui clâr pussibil (Erika Adami, O ai scrit pal gno popul); la nestre vôs si alce clare e fuarte a berlâ cuintri ogni forme di prevaricazion (Angelo Floramo, Cuintristorie dal Nûfcent 2000-2010)
   Sin. evident , facil , ladin¹ , palês , plan¹
10. adi. di cui o di ce che al mande un messaç, un contignût e v.i., che al comuniche in maniere di fâsi capî:  i spiete ae Regjon di sei clare su la forme e il detai de tutele (Adrian Cescje, Memoriis di politiche linguistiche)
11. adi. che al è pandût a viert, in maniere precise, sclete, cence platâsi o cence platâ nuie:  magari cussì no une part dal cuarp docent e mostre a nivel colocuiâl une clare ostilitât, une part indiference o sorevalutazion, e dome une minorance une clare adesion ai sfuarçs che o fasìn par rivalutâ la lenghe furlane (Erika Adami, Docents cuintri de lenghe)
    Sin. franc , ladin¹ , leâl , onest , sclet , viert
12. adi. che al rive a resonâ in maniere svelte e corete:  al è masse rabiât, nol rive a vê il cjâf clâr cumò
13. s.m. colôr che si svicine plui al blanc che al neri:  si vistive simpri di clâr, dispès di blanc, cun ricams tai pols e tal cuel (Pieri Menis, A scuele)
14. s.m. lûs, in particolâr la lûs dal soreli, vie pal dì:  e spesseave fin che il clâr i lassave distrigâ voris (Maria Forte, La aghe dal Ariul); la aghe e tarlupave di un clâr mulisit di lune (Dino Virgili, La strade come un destin); il soreli al lusive sui veris dai barcons, jemplant il stanzon di clâr (Pieri Menis, Marum)
    Sin. dì , lûs , lusôr , soreli , claritât
    
    1. puest dulà che e je lûs, dulà che si viôt ben:  anìn tal clâr, che ca no rivi a lei
15. s.m. spec. tal pl., lis parts plui claris di un dissen, cuadri e v.i.:  su chê superficie, russade tra nûi di polvar, si poiaran biel planc armoniis di ponts in moviment, simpri diviers, stratificazions licuidis che si fasin lûs, clâr e scûr, che a cjalin ae nature (Erika Adami, Armoniis di ponts in moviments)
    
    1. (fig.) aspiet positîf:  une brute storie, dulà che a 'nd è plui di scûr che di clâr
       Sin. lûs , ben , bon
16. s.m. puest libar di ostacui:  [i uciei] a tentavin di saltâ fûr pai clârs dai çamars, come clapadis a sbighet, e a restavin imberdeâts te rêt (Maria Forte, Cjase di Dalban)
    Sin. lûs
17. av. in maniere che ducj a puedin viodi, sintî, capî e v.i.:  "Il partigjan nol à di spiorâsi a cirî pes cjasis ce mangjâ", e cjante clâr la sentence (Ivano Urli, Storie di Min)
    Sin. a clâr , clâr e net , net e sclet , clâr e tont
18. av. in maniere precise, vierte, sclete, cence platâ nuie:  entrivie, ducj doi o sintivin a cressi chel peam, chel sintiment e, disìnlu clâr, siôr Gjino, ancje chel desideri, l'un par l'altri, che po nus strissinà te passion (Roberto Ongaro, Cretevierte); e restà sepulide la idee di un Friûl indipendent, che nol varès displasût ai aleâts: lôr no vevin mai dit clâr dulà che al varès vût di jessi il confin da la Italie des nestris bandis (Francesc Placerean, Cuintristorie dal Friûl dal 1866 fint in dì di vuê)
    Sin. a clâr , clâr e net , net e sclet , clâr e tont

Polirematichis e espressions idiomatichis

• a clâr loc.av.
• a claris notis loc.av.
• buere clare loc.s.f.
• jessi al clâr loc.av.
• lâ a clâr loc.v.
• meti in clâr loc.v.
• vê a clâr loc.v.
• vê clâr loc.v.
• vignî in clâr loc.v.
• viodi clâr loc.v.

Proverbis:

• a Madone des cjandelis, se al è nûl o sin fûr, se al è clâr a mieç Invier
• ai doi di Fevrâr tante nêf che al è clâr
• clâr a matutin, scûr tal stali; scûr a matutin, clâr tal stali
• cuant che e je scure la buse di Pinçan, e ven la ploie, co e je clare al ven bon timp
• cui che si scuse cence jessi interogât al fâs clâr il so pecjât
• montagnis claris, ploie vicine
• ni femine ni tele al clâr di cjandele
• scure la marine: mangje, bêf e sta in cusine; clare la montagne: bêf e va in campagne
• se a Sant Bartolomiu al jeve il soreli clâr, o vin zulugne prin dai Sants