Dizionari de Lenghe Furlane

plan¹  plan  [FO]

1. adi. che si svilupe in sens orizontâl, che nol à inclinazion:  [cu la biciclete] al scjampave dal ambient e si pierdeve pes stradis planis dal Roiâl (Alan Brusini, Par stradis lungjis)
2. adi. [TS] gjeom. che al à dôs dimensions:  al è stât presentât un studi dai grups discrets di simetrie di figuris planis (Carlo Cecchini, Matteo Fogale, Une esperience di plurilinguisim inte didatiche de matematiche)
3. adi. [TS] ling. di peraule, che e à l'acent che al cole su la silabe penultime:  "cjase" e je une peraule plane
   Sin. parossiton
   
   1. [TS] metr. di viers, che al à la ultime toniche te penultime silabe
4. adi. [TS] sport di corse, che si le fâs in piste cence ostacui
5. adi. di une superficie, che no à iregolaritâts:  o sin stâts a dâi un cuc al cjamp… Al è cualchi bolç, nol è dal dut plan (Dino Virgili, La aghe da pît la cleve)
   Sin. avuâl , plac , slis
   
   1. (fig.) di espression, stîl, lengaç e v.i., caraterizât di concretece, armonie, mancjance di sfuarçaduris:  la sô lenghe, plane, semplice e di cualitât cetant alte […] si pues ben dî che e vebi contribuît a meti dongje une "coinè" furlane (Roberto Iacovissi, Catarine Percude)
6. s.m. superficie orizontâl:  sul plan de catidre al slargjave il «Gazetin» e si meteve a lei (Pieri Menis, A scuele); a jerin come des maglis di mufe sul plan di chel mobilut (Checo Tam, Sense)
7. s.m. zone di teritori vualive o avonde vualive e vierte:  dai cunfins dal Cjadovri fintinamai al plan dal Friûl (Novella Cantarutti, Marcjadants); si po calcolâ che dut il plan, di ca dal Tiliment e fintremai da pît dai cuei, al sei stât dividût in tancj «fonts» di un 35 cjamps (Josef Marchet, Cuintristorie dal Friûl fin sot la Italie)
   Sin. plane , planure
   
   1. zone avonde plane ancje di estension no tant grande, a cuote avonde alte e jenfri lis monts:  la bielece de valade / i paîs poiâts sui plans / de mê val soi inamorade: / soi di Resie, sin furlans! (Arturo Zardini, La roseane); i lassi a Vissens la cjasa e la braida granda, ducj i pecoi da li Centi, da li Leiti, i plans dai Griets, la Casera dal Mugnol, i doi boscs in Mont e in Cjarsuela (Novella Cantarutti, I cunfins)
8. s.m. [TS] gjeom., mat. in gjeometrie, superficie individuade di trê ponts no in linie, che e à carateristichis diferentis daûr de gjeometrie che si fâs riferiment:  plan euclideu; plan proietîf
   
   1. intun spazi numeric tridimensionâl, lûc gjeometric dai ponts che a sodisfin la ecuazion algjebriche di prin grât
9. s.m. ognidun dai nivei di un edifici, cjapât dentri jenfri paviment e sofit:  une cjase di doi plans, cu lis fereadis tai barcons (Roberto Ongaro, Il muc); cualchidun al veve fat sù di pôc dôs cjasis di cuatri o cinc plans, che lis façadis a jerin zaromai di un colôr smarît, scuasit sporc (Agnul di Spere, I prâts des Savodagnis)
10. s.m. (fig.) grât di impuartance, valôr e v.i.:  se la Costituente taliane e ves smolât a dutis lis Regjons une sistemazion autonomistiche di cheste fate […] o varessin ancje podût contentâsi di stâ sul plan de normalitât (Josef Marchet, Par intindisi)
    Sin. grât¹ , nivel
    
    1. maniere di considerâ, di interpretâ, di fâ e v.i.:  ancje sul plan culturâl Onde Furlane e jere inovative (Max Mauro, Un Friûl difarent: i 90 mhz di Onde Furlane); il so discors [di Renato Iacumin] mi veve sunât straordenari sul plan culturâl e interessant pal aspiet storic (Giovanni Battauz, Flavio Cossar, Renato Iacumin, I mosaics de basiliche di Aquilee)
11. s.m. rapresentazion grafiche di oparis ediliziis, industriâls e v.i. di doprâ tant che vuide pe costruzion:  il plan par fâ un tunel
    Sin. dissen , progjet
    
    1. rapresentazion grafiche di un lûc, di une citât, di une zone e v.i.:  lant fûr de stazion si comprà un plan de citadute e si fermà a cjalâlu tune piçule place (Agnul di Spere, Un cidinôr todesc)
       Sin. cjarte , mape , prospet
    2. (fig.) complès di elements ordenât o che al somee ordenât:  vignarà il timp che i miei fradis, i filosofs, tu e noaltris ducj podarìn penetrâ un pôc plui indentri tal plan da la creazion (Zuan Luîs Filli, Il farc)
12. s.m. complès di diretivis par meti in vore une azion, puartâ indenant une ativitât:  no jerin timps bogns ma, cun dut achel, i obietîfs si alçavin di un scjalin ogni an. Chel al jere il plan aziendâl, chel al jere il lavôr (Stiefin Morat, Musets); al è l'oblic pai Ents locâi e altris ents publics di fâ bon un plan di politiche linguistiche, ma lis sieltis di meti tal plan a vegnin dai podês dal stes ent (Donato Toffoli, Relazion dal Grup di lavôr "Planificazion linguistiche")
    Sin. progjet , program , strategjie
    
    1. program studiât une vore in detai:  o ai cirût su internet un plan di alenament e o ai tacât a preparâmi [pe maratone] (Cristina Noacco, Faliscjis)
    2. ancje tal pl., prospetive, idee par rivâ a alc che si vûl:  il se naratîf al è colegât cul sisteme de memorie episodiche e cul sisteme dal lengaç. Si riferìs ae capacitât di visâsi episodis dal passât o di progjetâ plans pal avignî (Franc Fari, La evoluzion dal çurviel e de cussience tai vertebrâts)
13. s.m. [TS] fotogr., cinem. cuantitât di spazi rapresentât intune vision prospetiche:  Ane, duncje, si le viôt pierdude, sentade juste al centri di un plan, denant di un zovin miedi in cuintricjamp (Fabian Ros, Loreak, flôrs e cinise)
    
    1. cinem. durade di une singule azion regjistrade cence interuzions
       Sin. cuadri

Polirematichis e espressions idiomatichis

• a pît plan loc.av.
• meti in prin plan loc.v.

Proverbis:

• cuant che la prime nêf e ven al plan, pocje nêf in chel an
• cuant che lis urtiis a àn la rose fin da pît, e ven une vore di nêf ancje al plan
• laude la mont e tenti al plan
• nêf in mont, frêt al plan
• Sante Catarine la nêf a la culine, Sant Bastian la nêf al mont e al plan