Dizionari de Lenghe Furlane

cuadri  cua|dri  [FO]

1. s.m. figure cun cuatri angui compagns e cuatri lâts
   Sin. cuadrât , cuadrilatar , retangul ipon.
   
   1. cualsisei robe o superficie che e vedi chê forme:  il murut al ten dentri un cuadri di tiere che une volte al jere il bearç, cumò pustot
      Sin. cuadrât , cuadrel
   2. motîf decoratîf formât di chês figuris o di liniis che si incrosin:  al slargjà il tavaiuç a cuadris e al poià tal mieç il plat de fertaie (Riedo Pup, I furlans e la creance)
2. s.m. sorte di façolet che si meteve tal cjâf tal costum di femine di une volte
   Sin. cuadrel
   Cfr. piece
3. s.m. [CO, TS] zûcs intes cjartis francesis, un dai pâi, li che il motîf al è a losanghis rossis:  fâ colôr di cuadri
4. s.m. piture, pal solit su tele, montade tune suaze di cuatri lâts:  stanziis che a vevin maraveis di cuadris, di sculturis, di mobii stîl Impero e Bidermeier, di tendis, di tapêts, l'orloi di mûr che al sunave lis oris (Alan Brusini, Come tai romançs); Ghine e à viodût a svuedâ la cjamare ancje dai cuadris che a jerin sù pai mûrs, doi vecjos ritrats plens di polvar che a jerin stâts di un lôr antenât (Pieri Menis, Il testament)
5. s.m. (fig.) rapresentazion atente e significative di un sît, di une ete, di un popul e v.i.:  tal 1963, Davide Maria Turoldo al zire il film "Gli ultimi", cuadri realistic di un Friûl contadin une vore lontan de dimension bucoliche e idealizade che e faseve une vore comut ai sorestants politics (Angelo Floramo, Cuintristorie dal Nûfcent 1960-1970)
   Sin. piture , ritrat
   
   1. percezion o descrizion sintetiche:  al è vignût fûr cussì un biel cuadri vivarôs des lenghis tes scuelis dal Friûl Vignesie Julie, dutis vivis e impuartantis (Rosalba Perini, Prime rassegne des corâls scolastichis in lenghe minoritarie); al cirive di vê un cuadri il plui precîs pussibil di cemût che al stave il vieli e al induvinave, tal tremâ des mans, tal cjâf sbassât, che nol jere content (Franca Mainardis, Aiar di cjase)
6. s.m. (fig.) sene, fat che al sucêt intun ciert puest:  le veve lumade in chel viâl sui tacs alts che a batevin il marcjepît. Un cuadri elocuent, ma nol veve nissune reson di judicâle (Fabian Ros, Un piçul particolâr)
7. s.m. [TS] teatr. ognidune des parts che a puedin formâ un at, ancje cun mudaments di senografie:  tal tiarç cuadri e fevelin: siôr Pieri Çorut. Venerande, massarie dal poete. Rose, lavandere. Luziute, fie di Venerande (Arturo Feruglio, In cîl e je une stele!…)
8. s.m. persone particolâr, carateristiche, ancje strambe:  un cuadri di cjalâ chê baie foreste! (Maria Forte, Cjase di Dalban); la puare frutate, sentade su la cjadree, cui pîts poiâts suntun scagnut, la muse imberlade, dute plete par vie de gobe, e jere deventade tal borc un cuadri familiâr di maluserie infinide (Pieri Menis, Cui si jerial impaçât cun Modestute?); cjaliju li, ce cundizions che a van ator, ce cuadris!
9. s.m. telâr fissât tal mûr, che al fâs di struture o di profîl a puartis o barcons
10. s.m. sorte di casse cun crics, botons e jevis di comant, dispositîfs di control di un aparât, di un sisteme e v.i.:  al plan tiere dal fabricât des turbinis a son i gjeneradôrs eletrics diesel di emergjence (EDG) disfredâts cun aghe di mâr, come ancje i cuadris di comant des conessions e dai implants eletrics (Alessandro Pascolini, Il disastri de centrâl nucleâr di Fukushima Dai-ichi)
    Sin. panel
11. s.m. [TS] burocr. bacheche o tabele pe esposizion al public di ats uficiâi:  dutis lis declarazions dai articui 3 e 4 ca parsore a son fatis publichis picjantlis tal cuadri pretori dal comun, par cuindis dîs seguitîfs (Aministrazion Publiche, Regolament dal Consei Comunâl dal Comun di Udin)
12. s.m. complès di riferiment par une cierte dissipline o un ciert argoment e sim.:  se ben avonde articolât, ta chest setôr il cuadri normatîf al à garantît fin cumò une progressive presince de lenghe furlane inte Aministrazion Publiche (Donato Toffoli, Relazion dal Grup di lavôr "Planificazion linguistiche"); o vin rivât a definî i obietîfs di une didatiche de lenghe furlane daûr dal Cuadri Comun di riferiment european pes lenghis (Adrian Cescje, Memoriis di politiche linguistiche)
13. s.m. setôr che si cjape in considerazion:  il Friûl Orientâl al podarà sperâ che chestis aspirazions a vegnin sodisfatis plui facilmentri dentri di une Regjon furlane, che no dentri di une grande Regjon venite, che dal sigûr no otignarès un ordenament a part, tal cuadri des regjons talianis (Josef Marchet, In cercje di democrazie)
14. s.m. cui che, intune organizazion jerarchiche, al è tune posizion a mieç jenfri la base e i sorestants:  al veve seguît un percors di studis avanzâts par chei timps ancje se suntun setôr di istruzion destinât ai cuadris di mieç e no ae classe dirigjente (Lorenzo Marcolini, La invenzion dal vueit inte lampadine di Turo Malignani. Storie, gnovis ipotesis e atualitât)
15. adi. che al à cuatri angui compagns e cuatri lâts compagns, o compagns a doi a doi:  Catine e passà il puarton dal cjistiel, sot de torate cuadre (Gianni Gregoricchio, Trê feminis)
    Sin. cuadrât , cuadrangolâr , retangolâr ipon.
16. adi. di muse o part dal cuarp, che e à forme avonde largje e robuste, cun liniis marcadis:  la gramule cuadre, il nâs dret, i cjavei za un pêl sâl e pevar che i davin impuartance inmò di plui (Roberto Ongaro, Il muc)
17. adi. metrol. di misure, che si dopre in dôs dimensions, par misurâ une superficie:  un apartament di 65 metris cuadris (Max Mauro, Un Friûl difarent: i 90 mhz di Onde Furlane)
    Sin. in cuadri , par cuadri , cuadrât
18. s.m. [TS] bot. jerbe di prât buine pai nemâi, lis sôs lidrîs si dopravin par fâ spacetis, lat. sient. Chrisopogon gryllus
    Var. scuadri , scuari

Proverbis:

• cui che al nas cuadri al crepe taront