Dizionari de Lenghe Furlane

cuadrât  cua|drât  [AF, TS]

1. s.m. gjeom. figure plane cun cuatri lâts e i cuatri angui compagns:  i pampagai a san ricognossi ogjets diferents, come par esempli triangui, cuadrâts, cerclis, in plui a ricognossin une serie di colôrs diferents (Franc Fari, La evoluzion dal çurviel e de cussience tai vertebrâts)
   
   1. adi. di forme, struture, disposizion e v.i., che e à cuatri angui di novante grâts e cuatri lâts compagns tra di lôr, o ancje plui o mancul compagns tra di lôr:  la place centrâl, cuadrade, e jere plene di barachis e baracons (Pieri Menis, Une letare par Bepo); la cjase de vedue, la ultime de stradele, e veve un curtîl cuadrât, scovât come se al fos stât une stanzie de cjase (Carlo Sgorlon, Prime di sere)
      Sin. cuadri
   2. s.m. cualsisei robe che e vedi la forme di chê figure plane o ancje di forme cubiche o plui o mancul cubiche:  i soldâts si jerin metûts intor, un cuadrât cun lôr tal mieç e il maressial in bande (Alan Brusini, Par stradis lungjis)
      Sin. cuadri , cuadrel
2. s.m. [TS] mat. prodot che si à moltiplicant un numar o une grandece par se stesse:  i fîi dulà che e passe la corint eletriche si scjaldin e a burissin fûr potence di riscjaldament proporzionâl al cuadrât de intensitât (Lorenzo Marcolini, La invenzion dal vueit inte lampadine di Turo Malignani. Storie, gnovis ipotesis e atualitât)
   Cfr. potence , seconde
3. adi. [TS] metrol. di misure, considerade te estension su dôs dimensions par misurâ une superficie:  il "tugurio", di fat, nol e di trê metros cuadrâts, ma di trê par trê, ven a stâi nûf metros cuadrâts (Riedo Pup, Dopo 50 agns lavôr ancjemò); 30 gnovis coloniis e protetorâts, 10 milions di miis cuadradis di gnûf teritori e 120 milions di individuis sometûts (Renzo Balzan, La Afriche e mûr)
   Sin. cuadri
4. adi. (fig.) di cuarp o part dal cuarp, larc e robust:  sec, bassot ma ben cuadrât, al jere un pôc ingobât dal lavôr e dal pês dai agns (Pieri Somede dai Marcs, Il gno prin mestri); spalis plui cuadradis di un armaron cjargnel (Jaio Furlanâr, Il eroi dal dì)
   Sin. tressât , cuadri
5. adi. (fig.) razionâl e salt, in câs ancje masse razionâl e salt:  Simone al è une vore cuadrât, l'element plui tecnic dal grup (Christian Romanin, Anime di grave, interviste dople cun Luca e Marco, protagonist e regjist dal docufilm "JNK oltri la ultime frontiere")
   Sin. cuadri
6. s.m. [TS] ecl. barete di predi cun cuatri alutis a scuare:  i predis normâi e àn la tonie nere e il cjapiel taront neri; i bonsignôrs e àn la vieste nere filetade in ros o la vieste rosse ma cence manteline, o la vieste rosse cul cuadrât neri e il çuf ros (Antoni Beline, La fabriche dai predis)