cuadrel
/-èl/
cua|drel
[AF]
-
s.m.
forme o superficie cun cuatri angui e cuatri lâts, compagns o plui o mancul compagns tra di lôr:
li cjampani a sunin pa la messa di miezanot e il ciel al rît tal cuadrel da la balcunita (Novella Cantarutti, Deventâ stria);
al someave un siôr: la gjachete vierte sul gjilè a cuadrei, la cjadene dal orloi di arint (Alan Brusini, Come tai romançs);
si son tirâts intune cjasute cuntun cuadrel di ort e dôs piorutis (Pieri Somede dai Marcs, A jerin lagrimis)
Sin. cuadri
-
s.m.
toc di materiâl plui o mancul cuadrât o cubic:
i plaseve cualchi cjocolatin di chei cul licôr dentri vie, cualchi paste creme, cualchi cuadrel di zucar di Gurize (Meni Ucel, Biscots);
nus davin la merinde: un toc di pan dûr cu la marmelade o cuntun cuadrel di formadi o di cjicolate di chei che a passavin i merecans (Antoni Beline, La fabriche dai predis)
Cfr. balute
-
lastre cuadre di materiâl dûr doprade par paviments o rivistiments:
ogni cuadrel, ogni tassel, ogni clap, ogni modon [de basiliche] al fevele al nestri voli e al nestri cûr (Antoni Beline, Il misteri de nestre storie)
-
s.m.
[TS]
mec.
element metalic, o di altri materiâl dûr, di forme cuadre o esagonâl, cuntune buse a marivît, par fermâ lis vîts
Sin. bulon
-
s.m.
aste avonde fine a sezion cuadre, ancje cun segnadis unitâts di lungjece, doprade par segnâ liniis dretis:
[il mestri] nus faseve sierâ il pugn […] e cul cuadrel di disen de bande dal tai nus pestave ben ben il pugn (Pieri Somede dai Marcs, Il gno prin mestri)
-
s.m.
ogni aste avonde fine a sezion cuadre, che e forme il telâr di une scjaipule
Polirematichis e espressions idiomatichis