Dizionari de Lenghe Furlane

potence  /-èn-/  po|ten|ce  [AF]

1. s.f. il jessi potent, il vê la fuarce di produsi efiets:  une sapience lontane tal timp ma dongje dal om e che vuê, denant de potence de nestre sience, si inludisi che no coventi plui (Redazion La Patrie dal Friûl, Un avignî vert e sustignibil)
   Sin. podê² , possance , fuarce
   Var. potenzie
2. s.f. fuarce politiche, economiche e v.i. di un grup, di un complès, di une nazion e v.i.:  i caporions dai partîts talians - gjavant cualchidun - no vuelin savê di autonomiis che ur puartaressin vie lis jevis nazionâls de lôr potence (Josef Marchet, M la autonomie); une gnove forme di autonomie dal Imperi si disvilupe pe contee principescje di Gardiscje, cuistade di un cjasât di grande potence economiche e politiche tant che chel dai Eggemberg (Ferruccio Tassin, Autonomie tal Friûl austriac); i siôrs dal cjistiel a usavin a meti fûr, in segn de lôr potence e ricjece, une lungje cjadene di aur (Pieri Menis, Lis leiendis di Buie)
   Sin. fuarce
   
   1. grup, comunitât, nazion e v.i. che e à tante fuarce, che rispiet a altris e à une posizion fuarte:  une corse ai armaments di bande de Union Sovietiche e des potencis ocidentâls (Alessandro Pascolini, Un mont cence armis nucleârs. Sfidis sientifichis e tecnologjichis)
3. s.f. energjie fisiche:  la potence dai lôr cuarps, e la bondance dal desideri, a jemplavin il vueit des peraulis mancjantis tal vocabolari dal cûr (Nello Malisano, Cuant che il cûr nol cjate peraulis)
   Sin. energjie , fuarce , gnerf , virtût , vivôr
4. s.f. fuarce e incisivitât espressive, artistiche e v.i.:  la forme ‘popolâr' di scrivi di Beline e je sì intal so complès di straordenarie potence espressive (Adrian Cescje, Memoriis di politiche linguistiche)
   Sin. eficacitât , fuarce , gnerf , incisivitât , inzen , sgrimie , viamence , intensitât
5. s.f. [TS] filos. pussibilitât di produsi o di vê un mudament
   
   1. inte filosofie aristoteliche, la capacitât des sostancis di deventâ ce che a son, perfetis par essence lôr
6. s.f. [TS] fis. lavôr di une o plui fuarcis intune unitât di timp
   
   1. energjie produsude intune unitât di timp:  i fîi dulà che e passe la corint eletriche si scjaldin e a burissin fûr potence di riscjaldament proporzionâl al cuadrât de intensitât (Lorenzo Marcolini, La invenzion dal vueit inte lampadine di Turo Malignani. Storie, gnovis ipotesis e atualitât); In Regjon o vin 188 implants idroeletrics par 0,5 GW di potence instalade e 1800 GWh prodots al an (Matteo Mazzolini, Autonomie energjetiche nol vûl dî autarchie)
   2. aer. energjie dal motôr rispiet aes cundizions di svolt
   3. fis. tes machinis semplicis, fuarce aplicade par ecuilibrâ la resistence
7. s.f. [TS] mat. in aritmetiche e algjebre, prodot di un numar, clamât base, moltiplicât par se stes lis voltis segnadis di un altri numar, clamât esponent
8. s.f. ancje cun iniz. maiusc., entitât sorenaturâl:  une dimension invisibile, magjiche, dulà che a vevin il lôr nît lis Potencis spirituâls che a devin fuarce e vite a dut chel che al esisteve (Carlo Sgorlon, Prime di sere); clamâ su la assemblee il jutori di cualchi potence dal cîl (Angelo Floramo, Papis e antipapis. Cividât, 1409. L’omaç dal Concili a Gregori XII)
   
   1. inter. [BF] tant che esclamazion e invocazion de divinitât