Dizionari de Lenghe Furlane

dissen  /-èn/  dis|sen  [FO]

1. s.m. rapresentazion fate cun segns e liniis:  lis mestris a insegnavin tantis robis. A contavin flabis e storiis e a fasevin fâ i dissens sul cuader cui lapis colorâts (Carlo Sgorlon, Ombris tal infinît); i dissens dal libri a son dal stes autôr, Antoine de Saint-Exupéry (Dree Venier, «No esistin piçulis leteraturis»)
   Sin. figure , ilustrazion , pipinot , schiç
   Var. dissegn , disen , disegn
   
   1. studi pe realizazion di un cuadri e v.i.:  Camillo nol rive a mantignî l'impegn cul re di France; o savìn di dificoltâts economichis […] e de impussibilitât di paiâ i dissens che Tiziano i à fat pal Teatri (Mario Turello, Il brevet); la compagnie dai siet Agnui e à podût vê, non sai cemût, il disen de future monede, e a 'nd stampin une serie, e ator ator, là che al veve di jessi scrit «Kaiser und König», ti sgnachin tant di «Regno di Buie» (Pieri Menis, Lis leiendis di Buie)
      Sin. aboç , sporc , schiç
   2. progjet grafic pe costruzion o pe fabricazion di alc:  al è stât cualchi probleme cui dissens, che a son stâts ritocjâts par rindi plui fuarte la struture in largjece (Oscar Puntel, Mario Collavino: une bandiere furlane parsore il gnûf World Trade Center di New York)
2. s.m. ornament fat di liniis, figuris, soredut stampadis, spec., su stofe, cjarte e v.i.:  ta chel a rivarin Brunhilde e Ingeborg. A vistivin des bielis tutis neris cun dai disens in rilêf (Checo Tam, Sense)
   Sin. figure , motîf
3. s.m. (fig.) forme di alc che si viôt:  si viodeve dome il dissen fat des ombrenis dai ramaçs di un olnâr (Michele Calligaris, Te vuate); la zornade e jere clare come un veri, e si viodeve il dissen di ogni cjase, ancje la mê, piçule e nete come une miniature (Carlo Sgorlon, Il dolfin)
   Sin. linie , forme , profîl
4. s.m. tecniche, art, materie di insegnament dal rapresentâ cun segns grafics:  o tornavi cjase aes cinc di sere, par po tornâ di gnûf a Sant Denêl, pe scuele serâl di dissen (Oscar Puntel, Mario Collavino: une bandiere furlane parsore il gnûf World Trade Center di New York)
5. s.m. (fig.) proponiment pal futûr:  Rico al veve scoltade dute la storie di Gjino, i siei dissens lis sôs opinions sul mont, su la vite (Roberto Ongaro, Il muc); un dissen di azion bisugne vêlu, di subit, ma si à di verificâ se al funzione e cemût che si à di corezilu par ordin (Adrian Cescje, Memoriis di politiche linguistiche)
   Sin. fin³ , intenzion , progjet , program , volontât
6. s.m. complès, des carateristichis formâls che a dan une cierte impression, identitât, diferenziazion e v.i.:  il nestri vantaç competitîf al è simpri stât te cualitât, tal dissen, tal stîl, te afidabilitât, tes tecnologjiis specializadis, te flessibilitât, tes rêts (Patrizia Tiberi Vipraio, Euro o no euro: isal chest il probleme?)
   Sin. aspiet¹ , design , linie , stîl¹

Polirematichis e espressions idiomatichis

• puartâ a dissen loc.v.

Proverbis:

• il timp e la muart a rompin i dissens