Dizionari de Lenghe Furlane

program  /-àm/  pro|gram  [FO]

1. s.m. scheme di ce che si vûl o ce che si à di fâ, dal procedi e de direzion di lâi daûr, dai obietîfs e dai mieçs che si intint di doprâ par rivâ a un obietîf, tant a nivel individuâl, che aziendâl, nazionâl e v.i.:  chest program enunziât dal professôr Renzi al è propit chel che o vin adotât in chest lavôr: aplicazion dal principi de grafie unitarie e des regulis di pronunzie diferentis, adozion de grafie de Societât Filologjiche Furlane come pont di partence […] e adozion de coinè tradizionâl come varietât di riferiment (Xavier Lamuela, La grafie furlane normalizade); Wernher von Braun, o ben il pari de missilistiche e un dai fondadôrs dal program spaziâl american (Gloria Angeli, Associazion dal Centri Radio Astronomic de Mont di Muris di Ruvigne)
   
   1. complès di azions che a van daûr di un scheme:  programs di miorament gjenetic a son stâts puartâts indevant in Europe par tancj agns (Enrico Peterlunger, Lis varietâts di vît resistentis a lis malatiis)
2. s.m. idee, progjet di realizâ:  al stave par lâ in feriis e no se spietave che un muart i vignìs a butâ pal aiar i programs di setemanis di sflacje sportive a pescjâ in Jugoslavie (Sandri Di Suald, Ah! la provincie)
   Sin. dissen , plan¹ , progjet , proposizion , propueste
3. s.m. complès di ativitâts che a van daûr di ce che al jere previodût:  la visite de glesie fo la plui biele part dal program (Zuan Lurinçon, La Madalene)
4. s.m. liste di rapresentazions, spetacui, garis o altris manifestazions publichis previodudis intun ciert timp, intune stagjon o intune serie di incuintris:  dut il program dal festival al è stât cambiât e no si sa cui che al sune (Checo Tam, La maree nere)
   Sin. agjende , cartelon
5. s.m. trasmission televisive o radiofoniche:  diviers programs radiofonics si puedin scoltâ ancje in streaming e in podcast (Erika Adami, La lenghe furlane tai mieçs di comunicazion)
6. s.m. [TS] scol. plan de ativitât didatiche che un insegnant o lis autoritâts scolastichis a decidin di davuelzi intun o plui cors seguitîfs di un ciert ordin di scuele:  si cjate dut pront: locâi, libris, programs. La scuele e je une vore ordenade (Riedo Pup, I furlans e il mestri); i programs de Istruzion Publiche a tindevin a dislidrisâ de scuele lis influencis dai dialets (Odorico Serena, Il furlan tes scuelis e te universitât)
7. s.m. [TS] polit. complès dai criteris e dai obietîfs che su chel si fonde la azion di un partît o di un guvier:  i eletôrs a puedin restâ indiferents a programs politics che a tindin a rinfuarcî l'autoguvier o lis cundizions socioeconomichis dal teritori, ma a àn lis orelis ben spiçadis rivuart a programs politics che a vuelin comprimi e peiorâ chês cundizions (Sergio Cecotti, Il risultât eletorâl dai partîts di identitât teritoriâl - A case study: Scottish National Party)
8. s.m. spec. inte sfere religjose, artistiche, leterarie e v.i., formulazion di criteris, opinions e obietîfs di nature divierse, fate come presentazion o propagande di une corint, di un grup e v.i.:  [il grup artistic furlan dal prin Nûfcent] al jere tignût adun plui che di programs declarâts, di resons di afinitâts inteletuâls (Bepi Agostinis, Storie de art in Friûl)
   Sin. manifest¹
9. s.m. [TS] inform. secuence di istruzions scritis intun lengaç di programazion:  intal 2008 e soredut intal 2009 a son stadis puartadis insom dutis lis operazions par rivâ al program "Jude3". Al è un vêr tradutôr a trasferiment (Sandri Carrozzo, Franz Feregot, Jude - Traduzion automatiche dal talian al furlan)
10. s.m. [TS] tecn. intai eletrodomestics cul cicli automatic, secuence di operazions:  selezionâ il program de machine di lavâ