Dizionari de Lenghe Furlane

forme  /-ò-/  for|me  [FO]

1. s.f. aspiet esterni di alc, determinât massime dal contor de superficie e dal volum:  Toni al zirà ator di chê grande struture fin a cjatâ une puartele a forme di retangul (Checo Tam, Il palaç); la Tiere le viodei dal alt, cun dutis lis formis dai continents (Checo Tam, Sense); le cjalave dentri di se e al restave moments incjantâts a cirî la plee de sô bocje, la forme dal so cerneli e il tai dai voi (Maria Forte, Il Bide di Miot)
   Sin. difûr , fate , figure , inficje , linie , sacume , stamp
2. s.f. tal pl., aspiet dal cuarp, spec. di une femine:  e stave ben atente che lis sôs formis no fossin masse in evidence, ancje se, dentri vie, no i displaseve di jessi cussì (Carlo Sgorlon, Ombris tal infinît)
   Sin. cuarp , linie , figure , inficje
3. s.f. aspiet, aparence:  a contavin di una storia scura, di un che al si era copât e al compariva in forma di cjara rossa (Novella Cantarutti, La strada di chel âtri mont)
   Sin. aparence , aspiet¹ , fate , figure , inficje , mostre¹ , sacume , stamp
4. s.f. gjenar di struture, maniere di articolâsi di une realtât:  i Celtics a jerin dividûts in putrops grops, che si guviernavin in forme republicane, plui di râr in forme di piçulis monarchiis (Josef Marchet, Cuintristorie dal Friûl fin sot la Italie); la materie prime plui conveniente […] par movi lis machinis intes fabrichis, lis nâfs intal mâr e lis locomotivis al jere il cjarbon, o miôr la sô forme alotropiche clamade stancol (Lorenzo Marcolini, La invenzion dal vueit inte lampadine di Turo Malignani. Storie, gnovis ipotesis e atualitât)
   Sin. fate , inficje , sorte , stamp , stîl¹ , tressadure , configurazion
5. s.f. categorie, grup di sogjets o elements che a àn chês stessis carateristichis:  la nestre storie evolutive e començà cui bateris, lis primis formis di vite comparidis su la Tiere 3,8 miliarts di agns indaûr (Claudio Tuniz, Evoluzion umane: la sience e mostre i segrets des nestris origjins)
   Sin. specie , sorte , fate , gjenar
6. s.f. maniere che si fâs une azion:  par sierâ il bec a une spie […] lis formis no son tropis, anzit a 'nd è une sole, la ultime e cence apel: la muart (Roberto Ongaro, Il muc); e patafave un so fi fûr di mût: une furie. Le viôt Pieri, si ferme e i dîs: «Ma parcè po, Mariute, i dâstu in chê forme a chê puare creature?» (Meni Ucel, Gjalinis); al è impuartant che, in forme progressive e cun atenzion al cuadri gjenerâl, si ledi a superâ il sisteme de autocertificazion cun chel de certificazion obietive (Donato Toffoli, Relazion dal Grup di lavôr "Planificazion linguistiche")
   Sin. fate , mût , maniere , sisteme , vie
7. s.f. stîl espressîf:  [Otmar Mainardis] un inteletuâl fin e salvadi, difûr dal svolâ e stramudâsi dal timp, isolât ma ancje inlidrisât fin tal cûr de realtât furlane, che al sielç une forme poetiche fûr dal timp (Sandri Carrozzo, Otmar Mainardis)
   Sin. ande , fate , maniere , mût , stîl¹
8. s.f. scheme, struture di componiment leterari o musicâl:  las cjançonetas a no son poesias - encje se la poesia a po ficjâsi denti intuna cjançoneta - ne a àn di vê forma di poesia, ma propit forma di cjançonetas (Giorgio Ferigo, In forma di peraulas…)
   Sin. implant , maniere , mût , struture
9. s.f. rispiet des normis di compuartament acetadis par convenzion tes relazions sociâls:  dî, si pues dî dut, ma cuntun pocje di forme
   Sin. ce che al covente , ce che si dîs , creance , difûr , educazion , finece
10. s.f. esterioritât, ce che si viôt di alc, dispès in contraposizion in complement cun ce che al è e ce che al fâs:  "La plovisine": une des lirichis tra lis plui cognossudis di chest autôr [Pieri Çorut], dulà che o cjatìn ispirazion, espression, contignût e forme (Roberto Iacovissi, Pieri Çorut); lis direzions dai moviments autonomistics a àn di pensâ a cheste pussibilitât [un coordenament tra regjons di confin] pacifiche te forme, ma formidabile te sostance (Josef Marchet, E se no nus dassin la autonomie)
    Sin. aparence , difûr , façade , muse¹ , scusse
11. s.f. cundizion psicofisiche di une persone, spec. di un atlete:  sul tacâ dal campionât tancj zuiadôrs no son ancjemò te miôr forme
    Sin. cundizion , stât²
12. s.f. [TS] filos. in Platon, essence, cause, carateristiche inteligjibile e concetuâl des cjossis materiâls, idee
    Sin. categorie , concet pûr , forme struturâl , idee , struture
    
    1. in Aristotel, principi sostanziâl di ogni jessi; essence dal jessi de sostance che i è imanente, no separabile e complementâr rispiet ae materie
    2. in Kant, la funzion a priori dal pinsîr che e ordene i dâts imediâts e particolârs de cognossince, in oposizion ae materie fenomeniche
       Sin. categorie , concet pûr
    3. te estetiche, la idee artistiche che e cjape realtât te opare; l'ordin, la organizazion dai elements che a son il contignût de opare
    4. te fenomenologjie di Husserl, la essence, la idee, la struture costante e universâl de esperience
    5. tal pinsîr di ispirazion struturaliste, la struture invariante intindude tant che model esplicatîf dai compuartaments e dai acjadiments concrets
       Sin. forme struturâl , struture
13. s.f. [TS] gram. aspiet morfologjic di un tiermin:  par solit il leme di une forme nominâl e je la forme dal nominatîf singolâr; il leme di une forme verbâl al è l'infinît dal verp in cuistion e v.i. (Vladimír Petkevič, trad. di Zorç Cadorin, Corpus linguistics)
14. s.f. [TS] gram. variante lessicâl di peraule:  ancje «braç», tal furlan di in dì di vuê, daprûf dal plurâl «braçs», al à la forme «bracis» (Zorç Cadorin, Cualchi ipotesi sul furlan di prin di scrivilu); dutis lis formis furlanis de peraule "nêf" (nêf, nef, neif, niof, …) (Zorç Cadorin, Presentazion dal DOF piçul)
15. s.f. [TS] dir. rispiet des regulis inte redazion dai ats o dai contrats, di mût che a puedin vê rilevance juridiche
16. s.f. [TS] biol. stadi di svilup, massime tai animâi che a àn fasis di cressite ben distintis
    Sin. fase , stadi
17. s.f. model par lavorâ cuntune cierte dimension e une cierte linie e cun ciertis carateristichis o dâ une cierte forme a materiâi, sostancis, tiessûts e sim.:  il cjaliâr al met il corean su la forme
    Sin. model , piece , stamp , stampon
18. s.f. toc intîr di formadi:  e leve a vendi tal marcjât, jù, te Basse, par tornâ sù, te Alte, cuntune forme o dôs di formadi, un doi o trê salams nostrans e un butilion di vin di chel bon (Fabian Ros, L'om che al pierdeve pinsîrs pe strade)
    Sin. piece

Polirematichis e espressions idiomatichis

• in forme di loc.prep.
• sot forme di loc.prep.
• su la forme di loc.prep.

Proverbis:

• cui che al è di biele forme in avrîl al torne
• lis scarpis si fasilis su la forme