Dizionari de Lenghe Furlane

scusse  scu|sse  [AF]

1. s.f. membrane esterne, plui o mancul gruesse e dure, che e fâs di protezion di pomis, tubars o altris parts vegjetâls:  a vevin mangjât un chilo di mandarins. Nissun zeut par butâ vie lis scussis, e jê lis veve metudis tun gjornâl, e il gjornâl te borse (Agnul di Spere, In viaç di domenie); la scusse ruspie dai pôi sul ôr da la aghe (Dino Virgili, La aghe da pît la cleve); sul prât il piorâr al soflave tun sivilot fat di scusse di morâr (Pieri Somede dai Marcs, Clâr e scûr)
   Cfr. pelisine , piel , scuarce
2. s.f. part esterne e plui o mancul dure ancje di altris robis, soredut di mangjâ, no dome vegjetâls
3. s.f. corace dure di cierts animâi, soredut dai crustacis:  scussis di cais vueidis e crevadicis (Maria Forte, Il vivi al è chel rangjâsi)
4. s.f. (fig., scherç.) piel di une persone o di animâl:  «Puars i puars» al diseve Berton de Rosse, un omenon di scusse palombe, che al veve la malatie de sflacje e si poiave saldo al lament (Maria Forte, La tiere di Lansing); [i cavalîrs] ogni trê cuatri dîs a mudavin scusse e ogni volte a deventavin plui biei (Catarine Percude, I viars di sant Jop)
   Sin. corean¹ , piel
   
   1. vite:  dal '51, l'an del diluvi […] a 'nd veve vude tante [di pôre] che à fat avout se rivave a salvâ la scusse, di lâ al perdon a Sant Antoni (Giovanni Gortani, La cjargnele dal avout)
5. s.f. (fig.) aparence, aspiet esteriôr:  [lis cuatri timporis] a jerin cussì impuartantis e sintudis de societât contadine che la Glesie lis veve tiradis dentri cence problemis tal calendari liturgjic cristian, mudant dome la scusse (Sandri Carrozzo, Jenfri vîfs e muarts)
   Sin. scus
   
   1. caratar di une persone, cemût che al ven viodût difûr:  al jere stât simpri masse pleadiç. Al veve simpri molât cuant che al jere di tignî dûr. Masse bon… Fin che nol veve plui podût saltâ fûr di chê scusse. Al jere propit chel destin di rindisi a ducj che lu faseve disperâ (Maria Forte, Mabile la Lunghine); culì la int e je malfidente, ruspiose di scusse, dificile di capî (Alan Brusini, Gian Paolo Linda, I forescj)
6. s.f. cualitât di cui che al resist cun facilitât al dolôr, aes faturis, che si ripie di malatiis, che al ven fûr di pericul e v.i.:  "Coragjo" dissè jê "o vês une buine scusse ancjemò" (Maria Forte, Chê massanghe plui grande); «Bastian, cun chê scusse che o vês, o scugnarês murî di vecjaie: lis malatiis nuie di fâ!» (Alan Brusini, Il malât di Cime Undis)
   
   1. cui che al resist cun facilitât al dolôr, aes faturis, che si ripie di malatiis, che al ven fûr di pericul e v.i.
7. s.f. [BF] persone che no si compuarte ben, che al è pôc ce fidâsi:  al è une scusse, chel li! (Giulio Andrea Pirona, Ercole Carletti, Giovanni Battista Corgnali, Il Nuovo Pirona)
   Sin. lane , blave , plume , fiube

Polirematichis e espressions idiomatichis

• fâ la scusse loc.v.
• lassâ la scusse loc.v.
• mudâ scusse loc.v.
• puartâ fûr la scusse loc.v.
• salvâ la scusse loc.v.

Proverbis:

• se tu mangjis luvins e tu ti voltis indaûr tu viodarâs cualchidun a mangjâ lis scussis