Dizionari de Lenghe Furlane

blave  bla|ve  [FO]

1. s.f. cereâl di divignince americane, lat. sient. Zea mays, une vore difondût in Friûl, che al prodûs grans in panolis, doprâts par mangjâ, massime par fâ la polente, o par fâ vueli:  la produzion di blave in Friûl e je favoride dal timp cun cetante ploie (Rino Gubiani, Studi da la evoluzion dal paisaç mediant i toponims); la blave e jere biele alte, parêts verdis parmìs des stradis (Agnul di Spere, Vivi a Codroip); tra coltâ, arâ, semenâ, srarî, solçâ, ledrâ, taiâ i cimots, cjapâ sù, disfueâ, lignâ, streçolâ, taiâ il soreâl, staipâ, specolâ… si po dî che dut l'an a lavoravin tor blave (Riedo Pup, I furlans e la blave); lontan de sô famee al jere come une plante di blave gjavade de tiere (Checo Tam, Sense); pan e vin e bigatele / che la blave e vegni biele, / di lontan e di vicin / e pan e vin (Luciano Rocco, La foghere)
   Sin. sorc , sorturc , cincuantin ipon. , bragantin ipon. , sorghete ipon.
   Cfr. panole , panoglete , fueade , sfueade , scus , scartòs , mangjadure , penac , soreâl , cimot , pini , penacul , picot , floc¹ , sede¹ , civon , corondul , curubul , cornul , cjincui , cjincul , cjanusson , scarondul , sbrundul , concul , çoncul , mugnule , brundul² , curnul , çuncui , çuncul , çunculi , scuful , comul , panoglat , cjon , panoglon , cjoncui , cjoncul , panoglot , clari , curubule , strassul , sclausson , curundul , mussul , botul , scatùs , scjatùs , mucel , mustul , cjuncui , cjiuncul , maçocul , corubul , sbronzul , bronzul , cjanôl , cjanon , scjanossum , semenâ , tamosse , ingranî , staipe , mucul
   
   1. spec. cun valôr coletîf, cuantitât di panolis o di grignei di chê plante:  un sac, un stâr, un pesenâl di blave; incjastâ la blave e messedâle par che no si paveàs (Maria Forte, Cjase di Dalban); al specolave cul zei jenfri lis gjambis, sot il puarti, e la blave di l'an passât e sunave sot i dincj dal fier a ogni strente e tal colâ tal zei (Dino Virgili, La aghe da pît la cleve); a cueievin patatis pes bestiis, râfs pai purcits, blave che o clamavin siops, e di Invier si fasevin i sclopets e te buiade de cinise si meteve cualchi cjastine o cualchi râf (Pieri Menis, Il cuader de none)
      Sin. sorc , sorturc
      Cfr. sclopet , siore , scartossâ , discartossâ , sgragnelâ , disgragnelâ , specolâ , dispecolâ , masanâ , farine , polente
2. s.f. [BF] grans di dâ di mangjâ ai nemâi
   Sin. foraç , gran , mangjadure , blave di cjaval
   
   1. non gjeneric dai grans di mangjâ:  se la anade e leve mâl cu lis blavis, il paron si avaleve sul vin (Adrian Cescje, Liniis di storie sociâl e economiche dal Friûl 1500 - 1800)
3. s.f. tal pl., i cjamps di blave:  al lave istès a passâ la ore ator pes blavis, cul cjan e cu la sclope (Riedo Pup, I furlans e la cjace)
4. s.f. (coloc., fig.) persone o int une vore furbe e une vore pôc di infidâsi:  se tu âs dafâ cun chel li, viôt di stâ atent di no cjapâle tal comedon, al è une blave di chês; in chel paîs e je une blave… (Giulio Andrea Pirona, Ercole Carletti, Giovanni Battista Corgnali, Il Nuovo Pirona)
   Sin. bolpat , dret , dreton , gjat , buine blave , buine lane , bon gjat , lane , plume , fiube , buine fiube

Polirematichis e espressions idiomatichis

• buine blave loc.s.f.

Proverbis:

• a Sant Pieri la blave e plate il puieri
• a Sant Ramacul la blave a va in penacul
• cuant che la ciale e cjante di Setembar, cui che al compre blave al sta mâl a tornâle a vendi
• dute chê blave che si semene tart e ven cincuantìn
• la blave a sta tai nûi
• ni messe ni blave no slungjin la strade
• par che e vegni biele ue e biele blave a vuelin cjantadis lis implorazions de ciale
• par vê biele la blave bisugne arâ di bessôi
• Sant Pieri, la blave e plate il puieri
• sul cjast cence blave no stan surîs