Dizionari de Lenghe Furlane

gran  gran  [FO]

1. s.m. semence di forment o di altris cereâi:  meti dodis grans di vuardi o di forment sul fogolâr dongje dal nadalin (Sandri Carrozzo, Nadâl)
   Sin. grignel
   
   1. spec. tal pl., cuantitât di chês semencis, massime tant che aliment e marcjanzie:  Cortâl al veve cuatri mulins, ma cumò a zirin dome doi, chel di Segat, che al masane ancjemò grans, e chel di Brussul, che nol fâs plui farine ma curint (Cristina Noacco, Faliscjis); i siôrs a tignivin platât il gran disint che no 'nt vevin (Dino Virgili, La aghe da pît la cleve)
      Cfr. grossam
2. s.m. semence plui o mancul piçule e taronde, ancje no di cereâi:  un gran di cafè; cuntune brucje di garoful e cualchi gran di pevar neri (Giorgio Pascoli, Il Litum: jerbis salvadiis te cusine)
   Sin. grignel
3. s.m. ognidune des singulis pomulis che a componin un rap:  o ai mangjât un gran di ue (Dino Virgili, La aghe da pît la cleve)
   Sin. grignel , asin¹
4. s.m. robe piçule plui o mancul taronde:  un gran di tampieste; e sbrisse su grans di savalon (Sandri Di Suald, Ah! la provincie)
   Sin. grignel , asin¹
   
   1. ognidun dai elements plui o mancul taronts che a formin la corone dal rosari:  lis domandis si corin daûr come i grans de corone, intant che si pree (Cristina Noacco, Faliscjis)
5. s.m. spec. in espressions negativis, cuantitât minime:  o soi vignude in citât parcè in paîs no ai gran di fortune (Pieri Somede dai Marcs, Butìnle in staiare); si tirà di bande, malapaiade e cence plui gran di sperance (Josef Cjargnel, La mont cu la spice discrodeade)
   Sin. fruçon , ombre , ongule , fregul
6. av. in proposizion negative, par dâ plui fuarce ae negazion:  jo no i crodevi gran une peraule (Alan Brusini, Come tai romançs); nancje jo no ai polsât gran, forsit pal cjalt (Franca Mainardis, Il sium di Lissandri)
   Sin. cree , nuie , nuie di nuie , lafè no , fregul , pêl , asin¹

Proverbis:

• a fâ bon pan, al vûl bon gran
• al è muart chel che al tabacave e al à lassât un carantan; al è muart chel che nol tabacave e no 'nd à lassât gran
• al vâl plui un gran di pevar che no une balote di mus
• cui grans si fâs il stâr
• farine blancje a fâs bon pan, tiere nere e fâs bon gran
• ogni uciel nol cognòs il gran
• puar chel uciel che nol cognòs il gran
• se si lu mangje in jerbe, no si lu à in gran
• tiere nere e fâs bon gran, farine blancje a fâs bon pan
• tiere nere e fâs bon gran, tiere blancje a lasse murî di fam
• tiere nere e fâs bon gran, tiere blancje e fâs murî di fam
• tiere rosse e fâs bon gran, tiere blancje a lasse murî di fam