Dizionari de Lenghe Furlane

pêl  pêl  [FO]

1. s.m. ogni singule struture in forme di fîl che e cres su la piel dal om e dai mamifars:  gno pari invezit nol pues viodi il gjat in cjase, al dîs che al piert pêi pardut (AAVV, Sul florî); jù pe muse al sintive ghiti, che lis lagrimis i travanavin i pêi de barbe (Riedo Pup, Viliacco)
   
   1. struture in forme di fîl che e pues jessi ancje su lis plantis:  i pêi de urtie a son chei che a bechin
2. s.m. complès di singui pêi:  cjavai di pêl colôr modon (Carlo Sgorlon, Prime di sere); al puartà cun se il so cjan, Fido, un bastart cun tant di pêl stelât (Pieri Menis, Lis çuculis dal Gjigjo); un fantacin ancjemò cence pêl su la muse (Gianni Gregoricchio, Trê feminis)
   Sin. mantel , pelande , pelice
   
   1. in cualchi espression ancje in riferiment ai cjavei des personis:  RAGNHILD e je une secje more cui luncs cjavei: e sune lis tastieris. Dopo o vin la junoniche cjantante HILDE e la bateriste MONIKA, rosse di pêl (Checo Tam, La maree nere)
   2. piel di animâl copât, tratade in maniere che i restin i pêi e che e tegni cjalt:  un capot cul golâr di peil (Novella Cantarutti, I cjans di not)
3. s.m. struture in forme di filament che e pues jessi su cualsisei superficie:  passâ la cjarte di veri par gjavâ il pêl dal len
4. s.m. (fig.) superficie di une masse di aghe:  Tite al passave tal so vieri paîs, niçulât di ca e di là dal volê dai siei amîs come un moscjin lizêr sul pêl di une aghe che si môf (Alan Brusini, La ultime partence)
5. s.m. (fig.) piçule cuantitât, sedi di alc di concret che astrat:  ur domandìn un pêl di rispiet e, seconde robe, ur domandìn di no continuâ a straçâ tancj bêçs (Francesc Placerean, Nadâl nus fâs capî che la storie e je plui profonde e biele di chel che e somee); cheste petizion no varès mote di un pêl la atenzion de politiche taliane pal câs des lenghis dal Friûl (Adrian Cescje, Memoriis di politiche linguistiche)
   Sin. ombre , onglise , ongule , spêl , tic¹ , ninin
   
   1. av. par rimarcâ une negazion:  se lui al taseve, Pitin no jes taseve pêl (Antoni Beline, Pre Pitin)
      Sin. gran , cree , fregul , nuie , lafè , lafè no

Polirematichis e espressions idiomatichis

• cuintri pêl loc.av., loc.s.m.
• di ogni pêl loc.pron.inv., loc.adi.inv.
• fâ dreçâ il pêl loc.v.
• fâ vignî il pêl dret loc.v.
• fâ vignî ogni pêl un pan loc.v.
• fâ vignî ogni pêl un pan pe vite loc.v.
• montâ a pêl loc.v.
• no vê pêi su la lenghe loc.v.
• par un pêl loc.av.
• pêl tal ûf loc.v.
• riçâ il pêl loc.v.
• slissâ il pêl loc.v.
• vê il pêl sul cûr loc.v.
• vignî ogni pêl un pan loc.v.
• vignî ogni pêl un pan pe vite loc.v.

Proverbis:

• barbe rosse pêl di diaul
• dulà che si stravuelç il mus al reste il pêl
• dulà che si tombole il mus al reste il pêl
• la bolp e lasse il pêl ma il vizi no
• la bolp e mude il pêl ma il vizi mai
• la bolp e piert il pêl ma no la piel
• la vacje dal bon bovâr e bute jù il pêl il mês di Zenâr
• ogni pêl al à il so çoc
• pêl ros e pêl di flôr, sot dal cîl no 'nd è piôr
• pêl ros, pêl dal diaul
• ros di mâl pêl cent diaui par cjavêl