Dizionari de Lenghe Furlane

masanâ  ma|sa|nâ  [AF]

1. v.tr. (ancje ass.) ridusi in tocuts, in grignei o in polvar, cuntune muele o cun altris imprescj, soredut in riferiment ae farine:  Rita e masanà il cafè e e implenà la napoletane di aghe, po e le tal tinel a cjoli lis cjicaris e i platuts (Carlo Sgorlon, Prime di sere); a puartavin a masanâ intun mulinut plui injù, di ca da la aghe, là di Molâr, che al jere ancje il batefiar e i pestei pal formenton e pal vuardi (Dino Virgili, La aghe da pît la cleve)
   Var. masenâ , masinâ , mosenâ
   Cfr. pestâ , fruçâ , fruçonâ , sminuça
   
   1. fâ ridusi in tocuts, in grignei o in polvar un materiâl, soredut in riferiment ae farine:  al mandave a mulin sul cricâ dì par sei il prin a masanâ, parcè che al diseve che lis muelis polsadis a davin plui bon savôr ae farine (Maria Forte, Il Bide di Miot)
2. v.tr. (fig., scherç., ancje ass.) mastiâ, mangjâ:  un toc di temul che nol fevelave trop: se i vanzave timp di tirâ flât, tra une bocjade e chê altre, al molave fûr un pâr di blestemis e po al tornave a masanâ (Josef Marchet, Lis predicjis dal muini)
   Sin. mastiâ , mangjâ , gramolâ , parâ jù , crustâ
   
   1. deventâ plui siôr, cjapâ cun aviditât:  chei cuatri magnatui di chenti, che no 'nd àn mai avonde di masanâ a cuatri ganassis…, gras come faìns che a fasin stomi (Alviero Negro, Int di masnade)
3. v.tr. (fig.) movi e tornâ a movi plui voltis
   Sin. menâ , remenâ , messedâ , zirâ , voltâ
   
   1. movi o fâ alc che al prodûs un sunsûr lunc:  il cîl al masanave tons e la aghe cu la brosate e dave il segnâl dal rogant (Maria Forte, La rive di Sant Pieri)
4. v.intr. (fig.) movisi e tornâ a movisi plui voltis, ancje di alc di imateriâl:  ma cenonè si jeve sù un burlaç: / dilunc e di traviars il nûl al svole; / al masane, al masane, e in fin dei fats / co l'à ben masanât a te la mole (Pieri Çorut, Il Strolic furlan par l'an 1833); il pinsîr i masanave dentri, e nol rivave adore a cidinâlu (Carlo Sgorlon, Prime di sere)
   Sin. balâ , mulinâ , sgurlâ , messedâsi , remenâsi
5. v.tr. (fig.) pensâ e tornâ a pensâ plui voltis, soredut alc di negatîf o problematic:  Delchi al veve vût dut il timp di roseâsi e di masanâ i siei pinsîrs (Gianni Gregoricchio, Delchi); Carlin al taseve, si viodeve che al masanave dentri di se e agne Menie lu lassà rumiâ i siei pinsîrs (Pieri Menis, Chei di Muraie)
   Sin. rumiâ , clucî
   
   1. sintî e tornâ a sintî une sensazion, une emozion, soredut negative:  la agne Baldasse e deventave ledrose e e masanave rabie cuintri di jê (Maria Forte, Cjase di Dalban)
6. v.tr. (fig.) fâ dams, ridusi in brutis cundizions, ridusi in nuie, sedi a nivel fisic e materiâl, sedi a nivel psicologjic, spirituâl e v.i.:  cheste societât ciniche e eficientiste ti masane e ti sfracaie (Antoni Beline, Sant Jacum, là che al finìs il mont)
   Sin. gramolâ , sfracaiâ , disfâ , fruçâ , tamesâ , drazâ
   
   1. bati in maniere une vore nete intune bataie, intune lote, intune sfide sportive, intun confront e v.i.:  zuiadôrs biei, cui cjavei biei, cui voi biei, cui nâs biei, ducj alts, ducj vuerîrs usâts a masanâ chei che a vevin denant! (Stiefin Morat, Donald dal Tiliment)
7. v.tr. (fig.) dî jenfri i dincj, dî in maniere pôc clare:  agne Mine e jere masse impegnade a filâ su lis sôs disgraciis e a masanâ improperiis, diretis a cui che e saveve jê (Franca Mainardis, Il sium di Lissandri); Prin di rispuindi Redo al veve masanât alc fra i dincj (Gianni Gregoricchio, Îr e doman)
   Sin. bradascjâ , mastiâ , trabascjâ , barotâ
8. v.tr. (fig.) fâ une distance, soredut lungje e cun velocitât e indurance:  dispès tirant dilunc, come se il cjatâsi framieç la int lu fasès sintî bracât, al masanave chilometros cence fermâsi, rivant fin là che la citât e deventave, un pôc a la volte, paîs (Amedeo Giacomini, Tal ospedâl)
   Sin. brusâ , mangjâ , gramolâ , mastiâ
9. v.tr. preparâ, fâ che alc al sucedi:  si podeve jessi sigûrs che l'avignî al masanave malatiis, dams, dificoltâts, robis che a lavin par ledrôs (Carlo Sgorlon, Ombris tal infinît)

Proverbis:

• aghe passade no masane
• aghe passade no masane plui
• cence aghe no si masane
• cui che al è prin tal mulin al masane
• cui che al rive prin tal mulin al masane
• di Fevrâr cor a masanâ se no la roie si impetrìs