Dizionari de Lenghe Furlane

disfâ  dis|fâ  [FO]

1. v.tr. fâ che ce che al è stât fat al torni cemût che al jere prime di fâlu:  une cusidure i vignì stuarte, e cussì e scugnì disfâle e tornâle a fâ, mâl ancje cheste volte (Carlo Sgorlon, Prime di sere); o fâs fadie a contâ i ponts epûr mi pâr di no vê sbaliât, no volarès che mi tocjàs disfâ dut un zîr di fiers (Pieri Somede dai Marcs, Il prossim); in chest mont dut al è fature: fâ e disfâ, comprâ e vendi, vivi e murî (Maria Forte, La tiere di Lansing)
   Sin. dâ jù , fâ jù
   
   1. vierzi un contignidôr par meti in ordin il contignût:  une cjadree cun sore la valîs inmò di disfâ (Alan Brusini, Gian Paolo Linda, I forescj)
      Sin. vierzi
   2. vierzi il jet par fâ cjapâ aiar o par mudâ i bleons:  vuê al è di disfâ il jet e meti i linzûi a lavâ
      Sin. vierzi
   3. tornâ a vierzi alc che al jere leât:  al ingrampave chel aur [i cjavei bionts] tes sôs mans e i disfave il cocon (Maria Forte, Cjase di Dalban)
      Sin. disgropâ , disleâ , dispeâ , disberdeâ , disbroiâ , dismolâ , distorteâ , disvoluçâ , disgredeâ
2. v.tr. (fig.) fâ che alc nol vedi plui efiet, nol vali plui:  a vevin disfat il so matrimoni par vizi di origjin (Carlo Sgorlon, Il dolfin)
   Sin. anulâ
3. v.tr. fâ passâ une sostance dal stât solit a chel licuit:  nêf a Zenâr e Fevrâr, cussì penze che nancje Sant Josef nol rivà a disfâle dute (Maria Forte, La tiere di Lansing); metêt a disfâ la cjocolate a tocuts cu la spongje (Daria Miani, Lis rosis dal desert)
   Sin. dismolâ , scuaiâ , sfantâ , smolâ , siolzi , dislidi , fondi
   
   1. (fig.) spec. in comparazions, fâ che alc, pal solit negatîf, al pierdi fuarce o si sfanti:  la vôs e sunà cuiete, come la aghe di bol su la glace a disfâ il scatûr (Carlo Tolazzi, La salamandrie tal fûc)
4. v.tr. fâ jentrâ in soluzion:  metêt sul fûc un cit cui 500 ml di aghe e il zucar: fasêtlu disfâ in mût che al vignedi fûr un sirop (Chiara Spizzo, Scussis di naranç candidis); bibitis forestis che ti disfin ancje clauts e ti fasin digjerî ancje scaiis di modon (Riedo Pup, I furlans e la television)
   Sin. dissiolzi , siolzi , dissolvi
5. v.tr. dividi alc intes parts che lu componin:  e je in cjamare che e disfe un vistît par cumbinâsi une cotule (Pieri Somede dai Marcs, Un pugn di moscjis)
   Sin. disarticolâ , disbletâ , discometi , discomponi , vierzi , fâ jù
6. v.tr. fâ che un grup, un orghin colegjâl, une comunitât, une istituzion e v.i. no vedin plui union, no vedin plui ativitât, no esistin plui:  il patriarcjât di Aquilee al è stât disfat il 6 di Lui dal 1751 (Francesc Placerean, L'ultin patriarcje: Denêl Dolfin); in Comun al pâr che a vein disfate la comission (Riedo Pup, Pantianis di cjase e gjats di fûr vie); se plui di un milion di furlans stranfâts pal mont tal ultin secul no àn disfat il popul furlan, al è di jessi sigûrs che i plans dai urbaniscj e lis buzaris de politiche cui rudinaçs dal taramot no sepuliran il Friûl (Francesc Placerean, Cuintristorie dal Friûl dal 1866 fint in dì di vuê)
   Sin. siolzi , dissiolzi , dissolvi
7. v.tr. ruvinâ, spec. fasint a tocs:  il nestri mont nol varà vite lungje. I oms a fasin di dut par disfâlu (Carlo Sgorlon, Ombris tal infinît); al è miei, sì, che a vedin disvidrignît il bosc, disfat il puint, splanât e ramondât il salt (Dino Virgili, Come tornâ fruts); puar Tite, bessôl, al à fat, siei fîs in cuatri a disfin! (Dino Virgili, La division)
   Sin. butâ a cuarts , consumâ , devastâ , disdrumâ , disgubulâ , dissipâ , disterminâ , distirpâ , disvinidrî , parâ a bocons , parâ a fruçons , parâ a tocs , parâ jù , sassinâ , sbridinâ , scrofâ , sdramassâ , sfantâ , sfulminâ , strucjâ , sdrumâ , distruzi
8. v.tr. (fig.) bati dal dut intun conflit, intun confront, intune competizion e v.i.:  i Francs a son vignûts ca dal 774 e a àn disfat il ream dai Langobarts (Francesc Placerean, La nestre storie)
   Sin. bati , çoncjâ , disbletâ , domâ , folpeâ , fracaiâ , fulminâ , sbaraiâ , sbridinâ , sconfizi , sdramassâ , seâ , sfulminâ , somerzi , stramontâ , strapassâ , strucâ , talpassâ , vinci , sdrumâ , distruzi
9. v.tr. (fig.) fâ patî, dâ une vore soference, fâ un dam fisic o psicologjic, ancje fin a copâ:  il mâl al cjapave pît, par tancj miedis che a vessin clamât, e lu disfave a tossudis (Maria Forte, Cjase di Dalban)
   Sin. butâ jù , scunî

Polirematichis e espressions idiomatichis

• fâ e disfâ loc.v.
• sul disfâ di lune loc.av.

Proverbis:

• ce che al è scrit in cîl, nissun no lu disfe in tiere
• cui le fâs, cui le cjate fate e cui le disfe
• fâ e disfâ al è dut un lavorâ
• fâ e disfâ e je dute vore
• fâ e disfâ, si impare a lavorâ
• il diaul nol disfe crôs
• il fûc al disfe la glace
• la buine femine a fâs la cjase, la triste le disfâs
• la femine daben e fâs la cjase, la femine mate le disfe
• la femine e fâs l'om o pûr lu disfâs
• la robe si fâs lavorant e si disfe zirandolant
• la umiditât e disfe la glace
• sant Blâs se al cjate glace le disfâs, se no 'nt cjate ind fâs