Dizionari de Lenghe Furlane

brusâ  bru|sâ  [FO]

1. v.tr. fâ che alc al vegni cjapât dal fûc, par scjaldâsi, par fâ di mangjâ, par distruzi, par ritualitâts e v.i.:  Mine, se no fos stât pai lens che e brusave di Invier, no si sarès nancje mai dade pinsîr di chel biel toc di tiere (Franca Mainardis, Il sium di Lissandri); al tornâ in cusine e impiât un fulminant al brusà il testament su la cinise dal fogolâr distudât (Pieri Somede dai Marcs, La cjarande); cosacs e todescs a tornarin a passâ la Tor e a brusarin Nimis e Faedis e compagn a faserin sù pe Cjargne, obleant i partigjans a parâsi tai boscs (Francesc Placerean, Cuintristorie dal Friûl dal 1866 fint in dì di vuê)
   Sin. ardi
2. v.tr. consumâ tant che combustibil:  gracie a la fusion nucleâr che e bruse idrogjen, [lis stelis] a produsin energjie (Bepi Zefon, Il Sisteme Solâr e lis sôs leçs); fâ su une centrâl par brusâ biomassis (Walter Tomada, Al sofle aiar gnûf sul Friûl)
   
   1. dal cuarp, di un organisim vîf, doprâ une cierte energjie:  Giorgio al à scomençât a fâ schi di fonts tai prins agns Otante, par brusâ lis caloriis di une cene di Nadâl cjargnele (Bete di Spere, Otubar, mês de racuelte)
3. v.tr. ruvinâ, vuastâ cun brusaduris, scotadis:  al à brusât il vistît cul spagnolet
   Sin. brusinâ , brustulî
   
   1. ruvinâ il mangjâ cul cueilu masse:  "Sacrament, vin brusâts i biscots!" (Ivano Urli, In file)
      Cfr. brusinâ , brustulî , brustulâ
   2. ruvinâ alc cul lassâlu masse sul fûc o cul scjaldâlu masse
   3. (fig.) ruvinâ, fâ un dam:  i budiei mi coventin: no ai volontât di brusâju [cul vin trist] (Josef Marchet, Lis predicjis dal muini)
   4. (fig.) doprâ mâl, straçâ cence costrut:  plen di maluserie pai agns che al veve brusât tal forest (Mario De Apollonia, Il timp par ledrôs)
4. v.tr. fâ une scotade, une ustion:  lui si ostinava a deneâ, e i judis vevin fati brusâ li plantis dai pîts par fâlu confessâ il so dilit (Ranieri Mario Cossâr, Il lusôr di luna)
   Sin. scotâ , sbrovâ
5. v.tr. (fig.) fâ secjâ:  braidis brusadis dal sut, dulà che un riul di aghe par bagnâ nol rive mai (Josef Marchet, Dret e ledrôs)
   Sin. secjâ , candî , incandî , arsî , cantesemâ
   
   1. ancje dal frêt, fâ secjâ une plante:  parmìs des plantis si viodeve la jerbe brusade de glace e de zulugne (Carlo Sgorlon, Prime di sere)
6. v.tr. (fig.) fâ deventâ une vore cjalt:  la fiere lu brusave e la salive i bulive tal sgrasaiâr (Pieri Somede dai Marcs, La letare de mame)
7. v.tr. [CO, TS] med. cauterizâ une feride
8. v.tr. (fig.) di sintiment o sensazion, cjapâ une vore a fuart:  chest amôr e cheste passion lu brusavin intune maniere, che ogni argoment al jere bon tant che pont di partence par rivâ a fevelâ di ce che a i stave a cûr (Franca Mainardis, Il sium di Lissandri); [une] ansie cence motîf, che e brusave la viele (Carlo Sgorlon, Ombris tal infinît)
   Sin. ardi
9. v.tr. finî dal dut o scuasi dal dut une risorse, un prodot e v.i.:  la distribuzion a gratis e va benon: il gjornâl al ven brusât intal zîr di pôcs dîs (Anna Bogaro, Tosoni: nus mancje un setemanâl)
   Sin. fâ fûr , brusâ sù
10. v.tr. (fig.) esaurî une fuarce, abilitât, un sintiment e v.i.:  al jere rivât insom, pardabon, strac, plui che strac, brusât dentri de ricercje de perfezion (Spirt Anonim, Gjelât di cjocolate)
    Sin. incandî , suiâ
11. v.tr. (fig.) lei dut tun colp:  "Ti isal plasût il libri che ti ai prestât?" "Une vore, lu ai brusât in doi dîs"
    Sin. fâ fûr
12. v.tr. (fig.) vinci in maniere secje:  brusâ la concorence; brusâ un record
    Sin. fruçonâ , polverizâ , sbaraiâ , sdrumâ , dâ il fum
    
    1. passâ in velocitât:  une percussion dal zuiadôr svuizar, che al bruse Emanuelson e lu oblee a fermâlu in maniere iregolâr: rigôr (Marc Stolf, Milan - Udinese 1-2)
       Sin. dâ il fum
13. v.tr. ruvinâ lis pussibilitâts di sucès, soredut fasint pierdi il bon non o straçant oportunitâts o lant indevant intun moment o intune situazion che no dan sperancis:  no vuei ni brusâ lis mês soluzions, ni i criteris gjenerâi che lis ispirin (Adrian Cescje, Memoriis di politiche linguistiche); [l'atacant] al controle malementri e al bruse une bale di aur (Marc Stolf, Udinese - Torino 1-1)
    
    1. straçâ, no gjoldi fin insom:  cuissà cetantis voltis, in chei agns, che al veve bramât chel moment e cumò nol voleve brusâlu intune batude di voli (Roberto Ongaro, Il muc)
14. v.tr. fâ pierdi, fâ sparî:  bastarès cjalâ la edilizie dulà che la crisi e à brusât 7 mil puescj di vore dal 2008 al 2016 (Walter Tomada, Economie sdrumade. Tant che un secont taramot)
15. v.tr. (zerg.) fâ che alc o cdn. al vegni scuviert intant che al veve di restâ segret:  i doi coleghis che us fasevin di vuardie a son stâts brusâts par une soflade (Franco Marchetta, Il numar 1089)
16. v.intr. jessi cjapât des flamis e distrut dal fûc, fasint lûs e calôr:  il Pignarûl al bruse e al scjalde (Pro Loco Paîs di Sant Marc, Pignarûl); a àn piât fouc a Sant Zuan, zent. Dut a brusa, dut a mour, dut a lûs (Pier Paolo Pasolini, I Turcs tal Friûl)
    Sin. ardi , brusâsi
    Cfr. buiâ
17. v.intr. jessi une vore cjalt:  ocjo cu la mignestre, che e bruse
    Sin. scotâ , sbrovâ
18. v.intr. (fig.) scotâ di fiere:  ma tu tremis, anime, tu brusis ancje! (Carlo Tolazzi, La salamandrie tal fûc)
    Sin. bulî , sbrovâ , buiâ
19. v.tr., v.intr. dâ une sensazion di cjalt:  o soi madûr, al è un soreli che al bruse, e la Sierade e pâr il mês di Lui (Pieri Somede dai Marcs, Tripoli bel sol d'amore)
    Cfr. buiâ
20. v.tr., v.intr. iritâ o dâ la impression di iritâ la piel o altris parts dal cuarp:  lis gotis di sudôr i brusin tai voi (Franco Marchetta, Madalene); al butà jù une tace di scotch par distudâ il fogôr che i brusave la gose (Fabian Ros, Un piçul particolâr)
21. v.intr. di une part dal cuarp, dâ une sensazion di iritazion o di cjalt e jessi rosse, par vie di une inflamazion o ancje di une emozion fuarte:  la frutate e voltà la muse in bande a cjalâ tal nuie, i miluçs de muse i brusavin (Dino Virgili, La aghe da pît la cleve); si jevà sù strache, cul cjâf che i pareve di plomp, i vues rots, i voi che i brusavin come se e ves vût dentri une sgrafute di savalon (Pieri Menis, Chei di Muraie)
    Sin. buiâ
22. v.intr. (fig.) sintî un sintiment o une sensazion une vore a fuart:  o brusavi de voie di savê cun precision cemût che a jerin ladis lis robis (Carlo Sgorlon, Il dolfin)
    Sin. ardi
23. v.intr. (fig.) di sintiment o di sensazion, jessi vîfs:  su la bocje, i brusave ancjemò chê bussade di Rico (Dino Virgili, La Çucule)
    Sin. ardi , buiâ
24. v.intr. dâ fastidi, displasê, rancûr, rabie e v.i.:  dal sigûr no sarès colade in cierts fai che mi brusin ancjemò (Gianni Gregoricchio, Trê feminis); lis peraulis di Nando a brusavin tal stomi di Bepo (Pieri Menis, Une letare par Bepo); al po nome crodi se no mi bruse scugnî lassâ cheste citât sul moment che o scomençavi a compenetrâle! (Arturo Feruglio, Viaç a Vignesie)
    Sin. pesâ
25. v.intr. (fig.) fâ vignî pôre di consecuencis brutis, soredut di alc di ilegâl o disonest o injust:  i bêçs che al imprestave a brusavin su la palme de man vierte (Dino Virgili, La aghe da pît la cleve)
    Sin. brusâ i dêts , scotâ
26. v.intr. (fig.) interessâ une vore:  al vûl comprâ la braide cul vignâl di siôr Simon che al è in vendite, e mi dîs di lâ a tratâ daurman... Lu à scrit dôs voltis te letare, come se chê robe i brusàs di vêle (Maria Forte, La tiere di Lansing)
    Sin. buiâ , premi²

Polirematichis e espressions idiomatichis

• brusâ il paion loc.v.
• brusâ l'avent loc.v.
• brusâ ulîf loc.v.

Proverbis:

• a brusâ lens verts, si fâs fum e no fûc
• a brusâ patùs, si tire dongje cimis
• al è miôr brusâ siet vilis che no pierdi un dirit
• al è miôr che si brusi la cjase pluitost di gjavâ un miluçâr
• finide la messe, brusade la cjandele
• la bore o che e bruse o che e scote
• miôr brusâ un paîs che no dismeti une usance
• no si à di brusâ la cjase par netâ fûr i pulçs
• plui si messede e plui si bruse
• plui si volte e plui si bruse
• une bree che no ten claut e je dome di brusâ