Dizionari de Lenghe Furlane

pesâ  pe|sâ  [FO]

1. v.tr. misurâ il pês des robis:  Anzule e fasè muse da ridi, po, cu la man industriade, e alçà une ace par pesâle, e cjalà la stuarzidure (Maria Forte, La cotule di none Betilde); la Ulive e butà il lat tal seglot, e spietà che lu pesassin e jal segnassin su la cjarte (Maria Forte, La tiere di Lansing)
   Sin. misurâ iper.
   
   1. (ancje ass.) ancje di strument par misurâ, rilevâ il pês:  fra une pese e chê altre e jere une diference dal dopli, çoè une pese e pesave un, chê altre doi simpri tal stes caric (Mario Beltramini, Jo e Graziella)
2. v.tr. (fig.) cirî di capî il valôr, la cualitât, lis carateristichis di alc o di cdn.:  une vore di lôr a son de opinion che par judicâ e misurâ il nivel di civiltât di un popul baste nome stazâ e pesâ la magjistrature (Riedo Pup, A restin nome carabinîrs e predis); o ai vude maniere di fevelâ cun Beline in plui di une ocasion, e di pesâlu (Adrian Cescje, Memoriis di politiche linguistiche)
   Sin. considerâ , stimâ , tamesâ , tignî cont , valutâ , vandi , misurâ
3. v.intr. vê un pês:  Tareson, un bocon di femenone che e pesave plui di un cuintâl (Roberto Ongaro, Il muc); [i purcits par fâ il persut di Sant Denêl] a àn di jessi di razis tradizionâls talianis e no pesâ plui di 160 chilos (Oscar Puntel, Un persut unic par un lûc unic)
   
   1. dâ une sensazion di un ciert pês:  e va tal armâr a cjoli la padiele di tiere dal cicin. Le cjol e e sint che no pese. I alce la covertorie e e je vueide (Meni Ucel, Il cicin)
   2. vê un pês grant:  dôs valîs che a vevin di pesâ parcè che i tiravin i braçs (Maria Forte, La tiere di Lansing)
4. v.intr. (fig.) vê impuartance:  la lôr peraule [dai conts di Madiis] e pesave come lis lôr palanchis imprestadis ancje al trentesiet par cent (Dino Virgili, La aghe da pît la cleve)
   Sin. incidi , influî
   
   1. vê un efiet, spec. negatîf:  la robe [la maniere di jessi tratade dai compagns] e à pesât ancje sul gno profit di scuele che al è lât a fâsi benedî (AAVV, Sul florî)
5. v.intr. (fig.) fâsi sintî cuntune pression, cuntune responsabilitât, cuntun pês economic, sociâl, psicologjic e v.i.:  [il guvier dal Ream di Italie] al spesseà a meti in vigôr dutis lis leçs, massime chês cuintri predis e glesiis, e dutis lis tassis che a pesavin su chês altris regjons (Josef Marchet, Cuintristorie dal Friûl fin sot la Italie)
   Sin. colâ¹ , grivâ , ingriviâ , mantignî , poiâ
6. v.intr. (fig.) jessi dûr di sopuartâ, dâ fastidi:  i pesave a mê mari la nostalgjie di cjase (Alan Brusini, Come tai romançs); [dopo un pôc che si cuincin vîts] al scomence a pesâti chel drandran, cence fin, chel stâ impins di un continui des siet a buinore tor cjâfs e vinceis sin a scûr (Meni Ucel, La "Fieste dai Roncs"); no ai nissune voie [di lâ a durmî], il jet mi pese se ben che mi sint tant strache, mi sentarai dongje il fûc (Pieri Somede dai Marcs, Vilie di Nadâl (teatri))
   Sin. displasê¹ , grivâ , rincressi
   
   1. produsi un stât psicologjic di opression o di malstâ, tant che se al fos un pês:  i mûrs di cjase i pesavin aduès, e par sintîsi ben al veve bisugne di jessi intun locâl e di vê intor tante int (Carlo Sgorlon, Prime di sere); al sintive a pesâ intorsi la malinconie de stagjon, dal timp, da la etât (Dino Virgili, La aghe da pît la cleve)
      Sin. aflizi , cjalcjâ , oprimi , scjafoiâ , tibiâ
   2. di alc o di cdn., jessi un intric, un impegn:  "[…] Ti vino mai dit che no sin contents di te?… E chel al vûl dî che, par pesâ, no tu pesis, se no tal varessin fat savê che al è un pieç…" (Maria Forte, Cjase di Dalban)
7. v.intr. di une part dal cuarp, sintî o fâ sintî i efiets de fadie, de strache:  i voi a tachin a pesâmi e mi indurmidìs cul libri in man (AAVV, Sul florî); la sium e je grande, e il cjâf al pese, e al torne di gnûf a pleâsi (Meni Ucel, Comprension)
8. v.intr. jessi dûr di digjerî:  dute chê cuince e je ancjemò che mi pese sul stomi

Polirematichis e espressions idiomatichis

• fâ pesâ loc.v.
• pesâ su la anime loc.v.
• pesâ sul cûr loc.v.
• valê tant aur che si pese loc.v.

Proverbis:

• a no vê voie, dut al pese
• cui che i pese di lavorâ al cîr ogni scuse par polsâ
• plui a 'nd è e mancul a pesin
• plui si devente viei, plui i carnevâi a pesin
• purcit e marcjadant si pesiju daspò muarts
• se la crôs no si vûl che e pesi, si à di puartâle e no di strissinâle