Dizionari de Lenghe Furlane

scjafoiâ  scja|fo|iâ  [FO]

1. v.tr. no lassâ respirâ, massime fin a fâ murî:  "O sin rivâts a scjampâ cuant che nus àn fat fâ tape intun paisut da la Austrie.[…] O vin scugnût scjafoiâ la vuardie… No mal dismentearai di vite mê…" (Gianni Gregoricchio, Trê feminis); une lavine che e veve stravuelt il cjampanili e part de canoniche, scjafoiant sot di se pre Laurinç e la perpetue (Roberto Ongaro, Cretevierte)
   Sin. sfisiâ
   Var. cjafoiâ , infoiâ , scjafuî
2. v.tr. (iperb., ancje ass.) meti in dificoltât il respirâ, gjavâ il flât:  il fornel al sfladave un fum di scjafoiâ, che, il vecjo al veve butât sù une cjarbonele vuaste e sierât il respîr (Maria Forte, Cjase di Dalban)
   Sin. sfisiâ
   
   1. (fig.) dâ une sensazion di opression:  no si po tignî dentri par simpri la angosse che e scjafoie (Gianni Gregoricchio, Trê feminis); il tinel, larc e plen di mobilie, al someave pront a scjafoiâti di baroc, tapêts e coltrinis (Carlo Tolazzi, La salamandrie tal fûc)
3. v.tr. studâ un fûc gjavant aiar:  scjafoie il fûc sul fogolâr cu la cinise prime di lâ disore (Giulio Andrea Pirona, Ercole Carletti, Giovanni Battista Corgnali, Il Nuovo Pirona)
4. v.tr. (fig.) strenzi alc intun complès fis, fâ che nol vedi avonde puest:  tun piçul tinel di une cjase puarete di un borc da Udin no inmò scjafoiât dal ciment (Pieri Somede dai Marcs, Un pugn di moscjis)
5. v.tr. (fig.) dâ alc, ancje di positîf, ma in esagjerazion:  scjafoiâ di buinis graciis (Giulio Andrea Pirona, Ercole Carletti, Giovanni Battista Corgnali, Il Nuovo Pirona)
   Sin. cuvierzi , jemplâ
6. v.tr. (fig.) impedî che alc al sucedi, si slargji, al cressi o al esisti:  une des dôs: o pierdi timp a tentâ di scjafoiâ lis consecuencis o tirâ sù lis maniis e intervignî cun coragjo e cun continuitât su lis causis (Riedo Pup, Delincuents si devente); un stât centralizât e fuart che cu la burocrazie, cui uficis e cui ents, al voleve scjafoiâ ogni forme di identitât e di diference (Angelo Floramo, Cuintristorie dal Nûfcent 1960-1970); lis ideis a van vongolant intai aiars par dute la Europe e i siums dai zovins nissun ju scjafoie…! (Alviero Negro, Int di masnade)
   Sin. blocâ , cidinâ , contignî , domâ , domeâ , frenâ , inibî , meti in tasê , ostacolâ , parâ , pidimentâ , platâ , staronzâ , stratignî , tibiâ
7. v.tr. (fig.) stratignî il pandisi di une emozion, di un sintiment, di un istint e v.i.:  Tilde no rivà plui a scjafoià la smare e e colà suntune cjadree, sangloçant di gnervôs (Gianni Gregoricchio, Trê feminis); no voleve capî che al jere miorât par no scugnî rindisi a chel rimuars che e tentave di scjafoiâ cui tuarts di lui (Maria Forte, Mabile la Lunghine)
   Sin. contignî , distudâ , frenâ , reprimi , stratignî , studâ , tibiâ
8. v.intr. (ancje fig.) no rivâ a respirâ, murî scjafoiât:  a san ancje trop timp che si pues tignî un cjâf dentri di une borse. Al è chel timp che al fâs la diference tra il raspâ cu la bocje la plastiche cun disperazion e il scjafoiâ (Carli Pup, La bolsa); al è ben che il Friûl si dismovi prime di scjafoiâ, intosseât di chest aiar malsan (Marc Stolf, Puce di fogne, puce di carogne)
   Sin. scjafoiâsi , sfisiâ , sfisiâsi
9. v.intr. (iperb., ancje fig.) respirâ cun pesantece, sintî che al mancje l'aiar:  cun chest cjalt o scjafoi
   Sin. sfisiâ , sfisiâsi , scjafoiâsi

Proverbis:

• la passion e scjafoie ancje la reson