Dizionari de Lenghe Furlane

platâ  pla|tâ  [FO]

1. v.tr. meti o tignî alc o cdn. tun puest dulà che altris no puedin cjatâlu:  e veve puartade le cassefuart dai cugnâts, platant la clâf che nissun al saveve dulà (Pieri Menis, Chei di Muraie); no no no, alore gno fi ultin lu plati… no lu mandi a murî… al à sedis agn (Checo Tam, Il testemoni)
   Sin. rimplatâ , sclupî , scuindi , strafuî , taponâ , cuvierzi , nascuindi , parâ sot
   
   1. fâ in mût che alc o cdn. nol sedi viodût o individuât:  a cjalavin ator riduçant e platant la bocje cu lis mans (Carlo Sgorlon, Prime di sere); dutis chês cjasutis di len e jerin cuviertis di ramaçs di pin o di frascjis di faiâr par platâlis ai aeroplans che a passavin di tant in tant (Pieri Menis, La glesiute dai alpins)
2. v.tr. meti alc tun puest sigûr o sot di alc, par che nol ledi pierdût, no si ruvini e v.i.:  ur veve platât dafonts de valîs trê fueutis di ulîf benedît (Dino Virgili, La aghe da pît la cleve)
   Sin. meti vie , taponâ
3. v.tr. tignî segret, no fâ savê, no fâ capî:  Nita… tu… no tu sês contente… tu âs alc dentri vie che tu ciris di platâ… jo no ai nissun dirit di savêlu, ma… (Dino Virgili, La aghe da pît la cleve); il vecjo al mostrave clare la sô premure, intant che la Ulive e saveve platâle ben (Maria Forte, La tiere di Lansing); Casanova al plate il non dal cont, ma i casanoviscj a àn scuviert che al jere il cont visentin Giorgio Marchetti (Pierluigi Visintin, Friûl e furlans te Histoire de ma vie di Giacomo Casanova)
   Sin. rimplatâ , sclupî , scuindi , strafuî , taponâ , cuvierzi , nascuindi , parâ sot
4. v.tr. (fig.) vê dentri alc che no si viôt, che no si note:  a jerin aromai secui che la maraveose citât e platave, sot la vernîs des sôs pieris e dai siei carnevâi cence fin, une vecjaie che i roseave i vues e i faseve fraidessi la polpe (Josef Marchet, Cuintristorie dal Friûl fin sot la Italie)
   Sin. clucî , covâ
5. v.tr. metisi di mieç tra l'ogjet e cui che al cjale:  i nûi nassûts dai vapôrs a rivarin parsore dal arc de spuinde e a platarin la lûs dal soreli, e la aghe ur parè dut arint (Agnul di Spere, Int no consumade)
   Sin. taponâ , cuvierzi , scuindi , nascuindi , parâ

Proverbis:

• a Sant Pieri il sorc al plate il puieri
• a Sant Pieri la blave e plate il puieri
• dispès il diaul al insegne a fâlis ma no a platâlis
• la cjase e plate ma no robe
• Sant Pieri, la blave e plate il puieri