Dizionari de Lenghe Furlane

cuvierzi  /-è-/  cu|vier|zi  [FO]

1. v.tr. meti alc parsore, denant, intor di une robe par parâle, protezile, scuindile e v.i.:  meti [la creme] in terinutis o scudielis individuâls e cuvierzi cun pelicule a contat, in maniere che nol fasi la piel (Sandri Carrozzo, Menjar blanc); lis cuessis di purcit a vegnin selezionadis e netadis. 24-48 oris dopo a vegnin cuviertis di sâl (tant che a son i chilos di pês) e conservadis a une temperadure jenfri 0 e 4°C (Oscar Puntel, Un persut unic par un lûc unic)
   Sin. taponâ
   Var. cuierzi
   
   1. (ancje ass.) fâ o finî il tet di une costruzion:  i colps [di martiel] a sunavin come cjampanis di Pasche floride, tai lindarûi, tai diurincj… Po il sglinghinâ sec des planelis, dai cops: a cuvierzevin (Dino Virgili, La aghe da pît la cleve)
2. v.tr. stâ parsore, denant o dulintor di une robe cul efiet di parâle, protezile, scuindile e v.i.:  la piergule de ue e jere un ricam in trasparint, che al cuvierzeve di vert un toc dal curtîl (Maria Forte, Cjase di Dalban); une nêf minudine, glaçuline, e jentrave pes fressuris des puartis e dai barcons, e cuvierzeve di blanc il fen sui toglâts (Pieri Somede dai Marcs, 11 di Fevrâr 1929); il mûr par difûr al à la stabilidure che e cole jù a tocs e lu cuvierç la elare (Enrico Martina, Ricuarts e inlusions)
   Sin. taponâ
3. v.tr. protezi il cuarp dal frêt, dal aiar o ancje dal soreli, dal cjalt e v.i. cun vistîts o altri:  un sialet i cuvierç lis spalis (Alan Brusini, Gian Paolo Linda, I forescj); la mari no ja ce dâi di mangjâ, ne sa cun ce cuviarziju nel Inviar, cun ce socoriju ne lis malatiis che vegnin (Federigo Comelli, Il me paîs)
   Sin. taponâ , tapossâ , intapossâ
4. v.tr. jemplâ o tornâ a jemplâ:  cuvierzi lis busis cu la tiere e pescjâ il cjamp cul fin ancje di protezi lis semencis dai uciei (Andrea Pessina, Gaetano Vinciguerra, La preistorie in Friûl)
   Sin. colmenâ , imbunî , implenâ , incolmâ , taponâ , jemplâ
5. v.tr. jessi parsore di une superficie, di un lûc e v.i.:  framieç dai vignâi a son boscs di rôl e faiâr, che a cuvierzin soredut i çucs plui alts e lis cuestis plui in ombrene (Luigina Di Giusto, Andrea Guaran, Mauro Pascolini, La culine furlane)
   Sin. jemplâ , cjapâ
   
   1. jessi intune cierte dade di timp:  la ativitât de ALE e cuvierç sù par jù i ultins trentecinc agns, ma e fâs part di une prospetive storiche e politiche plui largje (Marc Stolf, Corsiche, Scozie, paîs Basc, Catalogne, Friûl… Europe)
      Sin. cjapâ
6. v.tr. di un sun, sunsûr e v.i., jessi sintût parsore di chei altris:  cun la sô vosone al cuvierzè lis ucadis dal popul (Tarcisio Venuti, La cjase di Toni); a passavin un daûr l'altri i cjars dai «paurs» tirâts di cjavalons neris, ros e blancs, plens di int parsore che e bacanave tant di cuvierzi il sdrondenâ des ruedis sul stradon (Pieri Menis, Tal bosc di Kebespok)
7. v.tr. dâ protezion, garanzie, sigurece:  o jerin cuvierts di un at formâl dal tribunâl (Christian Romanin, Amato De Monte: Il Friûl, patrie des bataiis di civiltât)
   Sin. protezi , sostignî
   
   1. intal lengaç militâr, protezi dal atac dal nemì:  tu jemple il sac e jo ti cuvierç cul mio Garand (Checo Tam, Sense)
      Sin. protezi , parâ
   2. zûcs intal zûc dai scacs, difindi un dai tocs, soredut il re, metint un altri toc fra chel in pericul e chel aversari
      Sin. parâ , difindi
8. v.tr. [TS] bancj. garantî di risis o pierditis, pal plui cun sigurazions
   Sin. sigurâ
   
   1. vê di ce paiâ ciertis spesis e paiâlis:  l'assessorât al disponeve di une cierte cifre di spindi, che no jere par nuie grande ni suficiente a cuvierzi lis spesis che a saressin coventadis (Adrian Cescje, Memoriis di politiche linguistiche)
      Sin. ecuilibrâ , meti in pâr , paiâ , pariâ , recuperâ , sodisfâ , vualivâ
9. v.tr. fâ in maniere che alc, massime di negatîf, disonest, difietôs e v.i., no si viodi o no si capissi:  la acuse di incompatibilitât de sielte di Lamuela cui criteris e à l'intindiment di cuvierzi la incoerence di cui che nol acete il so sisteme (Adrian Cescje, Memoriis di politiche linguistiche); une manfrine ripetude masse dispès ancje in dì di vuê, par cuvierzi o piês par justificâ intrics e robariis (Angelo Floramo, Cuintristorie dal Nûfcent 1990-2000)
   Sin. mascarâ , platâ
10. v.tr. (fig.) cjapâ dentri, includi:  promovi une produzion linguistiche che e cuvierzès dutis lis formis de comunicazion publiche (Adrian Cescje, Memoriis di politiche linguistiche)
    Sin. abraçâ , comprendi , considerâ , contignî , imbraçâ , includi , riferîsi , ripuartâsi , rivuardâ¹ , sierâ dentri , tocjâ
11. v.tr. sodisfâ lis esigjencis di une funzion, di un servizi e v.i.:  il numar di docents iscrit te Liste nol jere suficient a cuvierzi dutis lis classis (Patrizia Pavatti, La tutele de lenghe furlane a scuele); par cuvierzi i puescj di responsabil di cualifiche dirigjenziâl o di alte specializazion si pues cjapâ personâl a contrat a timp determinât (Aministrazion Publiche, Statût de Provincie di Udin)
    
    1. comunicâ cuntun servizi gjornalistic:  ancje la maniere di cuvierzi i fats de bande de plui part dai media e je emblematiche (Marc Stolf, La «marcetta su Gorizia» e altro marciume)
12. v.tr. dal mascli, spec. di une bestie, fâ l'at sessuâl, fecondâ:  puartâ a cuvierzi la vacje
    Sin. montâ

Proverbis:

• la cjase dai contents no je stade mai cuvierte
• si puarte la barete par cuvierzi la tegne