Dizionari de Lenghe Furlane

considerâ  con|si|de|râ  [FO]

1. v.tr. cjapâ alc in esam, pensâ cun atenzion a alc:  in chest articul mi fermi dome a considerâ il pês che e à vût intal cjamp tecnologjic e sientific la sô invenzion plui famose, ven a stâi la tecniche rivoluzionarie di produsi il vueit inte lampadine eletriche (Lorenzo Marcolini, La invenzion dal vueit inte lampadine di Turo Malignani. Storie, gnovis ipotesis e atualitât); la Hoover Institution de Universitât di Stanford e organizà conferencis par tornâ a considerâ la prospetive di un mont cence armis nucleârs (Alessandro Pascolini, Un mont cence armis nucleârs. Sfidis sientifichis e tecnologjichis)
   Sin. analizâ , esaminâ , indagâ , scrutinâ , studiâ , vandi , stazâ
   
   1. tignî tant che fonde di un resonament, di une deduzion e v.i.:  la cuistion dal rapuart tra cerviel e lengaç e devente plui interessante se o considerìn la capacitât uniche dal cerviel uman di cjapâ sù, tignî a ments e doprâ plui di une lenghe (Franc Fari, Il cjâf dai furlans)
2. v.tr. ricognossi a alc o a cdn. une cierte cualitât, identitât, entitât, situazion e v.i.:  il miôr arlêf di Bertoli al pues sedi considerât il cont Fabio Asquini di Feagne, che doprant une varietât di vît particolâr, il Picolit, al produsè un vin dolç di ue passe che al ve un grant sucès par dute la Europe di chei timps (Enrico Peterlunger, Storie curte de vît in Friûl); sedi lis plui grandis associazions sientifichis mondiâls sedi buine part de Europe a considerin la alimentazion artificiâl un intervent sanitari e il testament biologjic al è une realtât (Christian Romanin, Amato De Monte: Il Friûl, patrie des bataiis di civiltât); I Zûcs si celebrarin pe ultime volte tal 393 d. di C. e Teodosi I cuntun decret tal 395 ju sierà par simpri: a jerin considerâts une manifestazion religjose pagane intun Imperi deventât aromai cristian (Adrian Cescje, Viaç aes origjins dal Logos)
3. v.tr. vê une cierte opinion di cdn. o di alc:  se e je vere ce che nus contin - a àn dit-: che il Friûl al è considerât tant biel, che la sô int e je stimade tant brave, che i siei prodots a son judicâts tant bogns, bisugne frontâ il client di chê bande li, doprâ chê clâf li (Riedo Pup, In Friûl cul passepuart); ducj lu consideravin un pôc matucel in paîs (Checo Tam, La strie)
   Sin. calcolâ , ritignî , tignî , stimâ
   
   1. vê une buine opinion:  al è simpri cualchidun, massime se al è zovin, che al è seneôs di metisi in mostre, di sei considerât (Roberto Ongaro, Il muc)
      Sin. calcolâ , stimâ , preseâ

Proverbis:

• cui che al à provât il mâl al considere