cjapâ  cja|pâ  [FO]

  1. v.tr. strenzi o tacâ a strenzi e a tignî cu lis mans:  Zuantoni in serpe al cjalave fis devant, tal scûr. Ogni tant al cjapave lis redinis tune man sole e cun chê altre al palpave un pac, in bande, di no pierdilu (Dino Virgili, La massarie); la fie che e jere furbe, e cjape piron, curtìs e sedon che a jerin di aur, e ju sgnache te sachete di so pari (Popolâr - Andreina Nicoloso Ciceri, Maletegne - Racconti popolari friulani I); al lusôr dal frigo viert Zac Moraulis al scrusignâ chel vueit cence sperance dai riplans, po al cjapà un bussulot di jogurt, al controlà la date e lu butà vie parcè che al jere scjadût (Franco Marchetta, Light my Fire)
    Sin. brancâ , brincâ , cjapâ sù , cjoli , cjoli sù , gafâ , grampâ , imbrincâ , ingrampâ , racuei , tirâ sù
    1. di une bestie, strenzi e tignî cul bec, cu lis çatis, e v.i.:  cuant che al alçà la gjambe il cjan i cjapà i bregons e la polpete (Angelo Covazzi, I dincj)
      Sin. becâ , brincâ , gafâ , grampâ , muardi ipon.
    2. strenzi e tignî o movi cuntun imprest:  cjapâ un claut cu lis tanaiis e gjavâlu dal len
  2. v.tr. strenzi o tacâ a strenzi cdn. e a tignîlu, massime cu lis mans e cui braçs, ancje tirantlu sù, sedi par afiet, che par judâ, che par fâ dal mâl e v.i.:  Vera e cjape Werner tal braç, che al è spaurît e nol sa ce fâ e indulà lâ a platâsi, lu ten parât sot di se e lu cuiete a sun di bussadis (Ivano Urli, Storie di Vera); intun empit di rabie, i salte intor e lu cjape pal stomi (Alviero Negro, Int di masnade)
    Sin. brincâ , cjoli , cjoli sù , grampâ , imbrincâ , ingrampâ , tirâ sù , strenzi , striçâ , strucâ
  3. v.tr. [CO, TS] zûcs ancje ass., intai zûcs di cjartis, meti une cjarte che e jere su la taule, tal mac o zuiade di chei altris, tra chês che si à in man o tra chês vinçudis:  al sarès bastât cjapâ un fant, dome un umil fant ma, par disgracie, il so compagn Meni al jere parimentri dordel come Mario e nol capì che l'amì al veve il capon (Checo Tam, Se ti perdi tuo danno); Toful al cjapà il pio e al poià lis cjartis sieradis sul ôr de taule, al ingrampà la sô tace e le scolà tune glotude butant il cjâf indaûr (Dino Virgili, La aghe da pît la cleve)
    Sin. cjapâ sù , cjoli , cjoli sù , tirâ sù , pescjâ1 ipon.
    1. tai scacs, te dame e in altris zûcs, gjavâ une pedine o un toc al aversari:  dopo vê cjapât un toc, il pedon al cambie colone e al va indenant su la colone dal toc che al à cjapât (Nilde Teresa Negro, Zuìn di scacs)
      Sin. mangjâ
  4. v.tr. fâ in mût di vê alc a disposizion, cul lâ a procurâsal e cul tignîlu sot man par podê doprâlu:  cjapâ 1 litri di lat di mandule: gjavâ un cop par disfâ l'amit di blave intune scudiele e meti a boli il rest cu la piel di limon e la bachete di canele, cuant che al jeve il bol studâ e lassâ in infusion (Sandri Carrozzo, Menjar blanc)
    Sin. cjapâ sù , cjoli , cjoli sù
  5. v.tr. sielzi e comprâ:  o cjapi trê etos di formadi di chel vecjo, par plasê; za che tu vâs fûr, passe ancje a cjapâ il pan
    Sin. cjoli , comprâ , cuistâ
  6. v.tr. doprâ come mieç di traspuart:  scuintiât, scanât, scunît e avilît no i restave nuie altri che cjapâ l'avion e tornâ a cjase (Fabian Ros, Eivissa mon amour); no cjapâ la machine co no si à di slontanâsi plui di chel tant; fâ lis scjalis e no cjapâ l'assensôr (Guglielmo Pitzalis, Metiti in moto!); ogni an lis solitis robis: la bande, il pichet di onôr, i intervents des autoritâts, i discors dai uficiâi de caserme e po il president dai combatents… e finalmentri il ghiringhel prime di tornâ a cjapâ la coriere (Checo Tam, Lis pinessis)
    Sin. cjoli
  7. v.tr. ricevi, acetâ alc che al ven proferît:  la prevision de radiazion di fonts a 3 grâts Kelvin e je stade sperimentalmentri verificade (e i verificadôrs a àn par chest cjapât il premi Nobel) (Sergio Cecotti, Teologjie algjebriche); il dì di sant Roc si menin li, in rie sul ôr de strade, i nemâi dal Borc a cjapâ la benedizion (Dino Virgili, La Çucule)
    Sin. cjoli , ricevi , vê
    1. ancje ass., vignî in possès di un compens, di une sume o di alc che si à dirit di vê:  cu lis scjaipulis, cui riclams e cul lâ ator pal mont a fâ il mistîr dal oseladôr a cjapin inte anade dai biei bêçs in cualchi paîs, ma al è râr il câs che chei bêçs a vedin dreçade nissune famee (Catarine Percude, L'oseladôr)
      Sin. dâ dongje , tirâ dongje , vê , tirâ , scuedi , vanzâ
  8. v.tr. jentrâ in possès ma no in proprietât di alc, a ciertis cundizion:  cjapâ un libri de biblioteche publiche; cjapâ a fit un apartament
    Sin. cjoli
  9. v.tr. jentrâ in possès di alc che al ven consegnât, che al jere stât mandât e v.i.:  al è stât cussì che une dì o cjapi une letare dal prefet che al mi dîs di tornâ a studiâ la pratiche e intant di spietâ prin di lâ indenant (Pieri Menis, Lis scuelis e la nêf)
    Sin. cjapâ sù , cjoli sù , tirâ , tirâ sù , vê , ricevi
  10. v.tr. puartâ vie alc, spec. cu la fuarce, cul imbroi o cence vê dirit:  Pine i veve contât a Tite la vitace che e veve fate di zovine e ce che e faseve cui vedrans par cjapâur i bêçs e la robe, e i veve domandât perdon imbroiantlu ancjemò une volte par che al murìs in pâs (Pieri Menis, Chei di Muraie)
    Sin. cjoli sù , cucâ , curâ , puartâ vie , cjoli , netâ , netâ sù , netâ vie
  11. v.tr. rivâ a otignî un titul di studi, une licence, un titul e v.i.:  si sin fats il cûl noaltris par laureâsi, par cjapâ la specializazion, altri che pierdi timp ator pes stradis come chei ca (Maurizio Mattiuzza, La maiute di Zidane); cuant che a sintirin che al veve cjapade la patente si ingrisularin e si domandarin scaturîts cui che al jere stât chel batecul che i veve dât in man une arme tant pericolose (Antoni Beline, Pre Pitin)
    Sin. cjoli
  12. v.tr. rivâ a otignî alc di no materiâl, massime alc che al ven dât di altris par fiducie:  cjaparìno avonde vôts par jessi determinants, al ven a stâi par mudâ il cors de storie tune direzion positive? (Sergio Cecotti, Il risultât eletorâl dai partîts di identitât teritoriâl - A case study: Scottish National Party); se alc al funzione, nuie di miôr che fâlu incressi e cjapâ i compliments (Sandri Di Suald, Comunicâ la autonomie)
    Sin. vê , ricevi
  13. v.tr. rivâ in timp par scoltâ, viodi e v.i.:  a lavin a cjapâ un toc de Messe e dal Jespui di Pre Zaneto (Maria Forte, Cjase di Dalban)
  14. v.tr. vê di patî alc di negatîf:  la Gjermanie aie cjapadis chês vuadulis che le fasin cainâ cumò, cuant che e jere une federazion di tancj stâts scuasi indipendents? (Josef Marchet, Cjalâ plui inlà); scugnî stâ zitos e cuços, di une pestadice a chê altre, a sopuartâ robariis, mangjariis e a cjapâ rips tal cûl di ognidun che al rivave (Alviero Negro, Int di masnade)
    Sin. becâ , vê , vanzâ , puartâ dongje , puartâ a cjase
    1. sport in diviersis dissiplinis, pierdi un pont, subî un pont dal aversari:  o ai tacât cui zovins e te stagjon 61-62 o ai fat lis ultimis 4 partidis in serie A: la prime o vin cjapât 5 goi cu la Fiorentine, ancje se no jere propit tant colpe mê (Christian Romanin, Dino Zoff: «O vin lidrîs buinis, o vin di tignîlis di cont»)
  15. v.tr. vê une pene, une condane, un cjastì e v.i.:  la uniche lenghe che si podeve doprâ a scuele e jere il talian, intant che a fevelâ par furlan (e ancjemò di plui par sloven), si podeve cjapâ une multe (Sandri Carrozzo, La colonie); si spietave la fusilazion. E invezit al à cjapât nome sîs mês di galere (Riedo Pup, Il prin moto)
  16. v.tr. rivâ un bersai:  dal 1941 lis primis bombis a àn cjapât Berlin e la aministrazion e à stabilît di stramudâ fûr de citât lis oparis artistichis e i documents storics (Zorç Cadorin, Doi autografs di Toni Broili framieç dai manuscrits furlans di Berlin conservâts a Cracovie); ogni un tant de rive çampe de Vorska i canons a sbaravin. I ricovars che i alpins a vevin prontâts in presse a tignivin dûr, se no ju cjapavin in plen (Agnul di Spere, Cjalant la rive)
    Sin. cucâ , rivâ
  17. v.tr. rivâ li che al è cdn. altri:  al si tacà a cori daûr ai doi viandants. Fat un bocon di strade ju cjapà (Luigi Gortani, Il mestri sore ducj i mestris)
    Sin. rivâ , jonzi
    1. rivâ a pâr cun cualchidun altri:  par i siei cutuardis agn al jere ben metût, al veve zaromai cjapât il pari in altece (Carlo Tolazzi, La salamandrie tal fûc)
  18. v.tr. racuei e puartâ vie alc che si cjate
    Sin. cjoli , cjapâ sù , cjoli su
  19. v.tr. rivâ a tignî o a copâ une bestie, spec. cjaçant o pescjant:  fin sot la rive di Sant Pieri si slungjavin pocis e poçalis e plui injù la roie e il lavio dulà che Diu al semenave par lui vriutis, tencjis, gjavedons, bisatis, sgjardui e temui. Se l'om al cjapave alc di plui preseât, Taresie i diseve: - Chest vendilu ae Siore (Maria Forte, Il vivi al è chel rangjâsi); al pensave che, dopo, chei uciei ju cjapave lui te sô bressane incurnisade di vert (Maria Forte, Il vivi al è chel rangjâsi)
    Sin. becâ , brincâ , cjaçâ , cucâ , curâ , pescjâ1
  20. v.tr. rivâ a tocjâ, a tignî o a stratignî cdn.:  e Nando a clamâju [i fruts], a berlâur, a scufiotâju ancje, co al rivave a cjapâju, che nol jere tant facil, che a jerin tant che faìnis (Meni Ucel, Il muini)
  21. v.tr. vê une relazion sessuâl, o ancje obleâ a vê une relazion sessuâl:  un che mi è jentrât tal jet che o jeri dome une frutine e che mi à cjapade cun fuarce e dispresit (Antescûr, Se Diu al vûl)
    Sin. doprâ , foti , fotâ
  22. v.tr. intun rapuart sessuâl, jessi penetrât o fâsi penetrâ:  i lavris […] si fasin infûr, si strenzin intor di lui, lu cjapin dut, sù e jù, e la lenghe e bale une musiche dolce e disperade (Spirt Anonim, Anime)
  23. v.tr. meti in stât di fer o di arest:  une dì lu cjapin des sôs bandis che al ven jù de montagne e nol à documents, une robe che ai Todescs ur puce di stiç tant di calcolâlu partigjan (Ivano Urli, Storie di Min); i dodis sotans che a vevin cjapâts e mandâts sot procès par cheste istesse reson, a son stâts ricognossûts inocents e molâts (Alviero Negro, Int di masnade)
    Sin. arestâ , becâ , brincâ , cucâ , curâ , grampâ , piâ , scuaiâ , gafâ , gatamâ
    1. cjatâ un a fâ alc che nol va ben cence che sal spieti:  la mestre lu à cjapât che al copiave
      Sin. brincâ , cucâ , curâ , scuaiâ , becâ , gafâ , gatamâ
  24. v.tr. rivâ dongje o intor, cjatâ intune cierte situazion o posizion:  i Vanuts a lavin [li di dôs muracis vanzadis di une bressane] a parâsi dal maltimp se ju cjapave a tradiment tal mieç dal cjamp (Dino Virgili, Devant di dut il cîl); o vignîs ca di nô a parâsi se us cjape la ploie a viert (Dino Virgili, La aghe da pît la cleve)
  25. v.tr. rivâ a someti, a controlâ in graciis di une azion militâr:  ta chei agns e je la vuere jenfri Vignesie e l'Imperi. Il conflit tra la Republiche di Sant Marc e i Asburcs al tache intal 1508 e al va indenant a sangloç fin al 1516. Ta chescj agns la Patrie dal Friûl e ven cjapade e molade dai doi esercits plui di une volte (Carli Pup, Il Friûl de Joibe Grasse dal 1511); i comandants - i scriveve so pari - a capissin nome la lôr: par cjapâ une culine a son bogns come nuie di riscjâ un zovin. No san, lôr, un om ce che al vâl (Riedo Pup, Dreute)
    Sin. concuistâ , meti sot , ocupâ , sotanâ
  26. v.tr. sedusi, cjapâ tal laç:  mi à cjapât cul so mût di fâ di misteri
    Sin. cjapâ tal laç , cjapâ te vuate , concuistâ , inmagâ , piâ , sedusi
    1. stiçâ une vore di interès:  [il film galês Y Syrcas - Il Circ] al è un film inmagant cun plui nivei di leture e cuntune narazion che e cjape il spetatôr in mûts diferents (Fabian Ros, Profii_festival); al sucedè cuasi subit che o fos ancje jo cjapât dal libri, che al fevelave di Alessandri il Grant (Carlo Sgorlon, Il dolfin)
      Sin. cjapâ tal laç , cjapâ te vuate , concuistâ , inmagâ , piâ , sedusi
  27. v.tr. tignî un ciert spazi:  il puest che chel grant om al veve sielzût pes scuelis, al cjapave un toc di vignâl di un paron, mieç cjamp di une puare femine cun cuatri fruts che e no veve che chel, un toc di ort di un che al jere in Americhe e po par mieç al passave il canâl di irigazion (Pieri Somede dai Marcs, Lis scuelis e la nêf); i cjistiei [di jets] a cjapin il sît par lunc, par traviers e cun di plui par adalt, stant che ogni cjistiel al à cuatri plans, ven a stâi cuatri brandis (Ivano Urli, Storie di Vera); da une viertidure che e cjape mieze parêt cu la vereade a cuadrei di cristal e jentre une lûs sflandorose e a traviers i veris si viôt da lontan lis napis altis altis di une fabriche (Pieri Somede dai Marcs, Un pugn di moscjis); al tirà fûr un libron che al cjapave dut il taulin, si sentà da gnûf lecantsi il dêt poleâr (Dino Virgili, La aghe da pît la cleve)
    Sin. tignî , puartâ vie
  28. v.tr. tignî impegnât:  individuâ un argoment dissiplinâr, un par classe, che al cjapàs ancje dome pocjis oris di lezion (Adrian Cescje, Memoriis di politiche linguistiche); ancje in ducj chei altris dîs a son ingropâts un cul altri dutrine, alenament, compits di scuele, messis, voris di cjase, che mi cjapin la setemane complete (AAVV, Sul florî)
    Sin. puartâ vie , domandâ , mangjâ
  29. v.tr., v.intr. (fig.) di sensazions fisichis o psicologjichis, di sintiments, estris, atitudins e v.i., fâsi sintî a fuart, dominâ la persone:  i veve tocjât la sede de piel e si jere sintût a cjapà di un sgrisul, dai pîts ae lidrîs de cope (Maria Forte, La tiere di Lansing); biel che la lûs e leve murint sul imbrunî, mi à cjapât come un afan, une malinconie, une ribelion a chest scugnî simpri lassâ lis robis bielis a pene che si à scomençât a gjoldilis (Antoni Beline, Sant Jacum, là che al finìs il mont); al scole ancjemò un pocjis di tacis e al monte sù sul cjadreon: la cjoche oratorie lu cjape dal dut… Al piert la reson, al tache a çavariâ e al dismentee dut (Riedo Pup, Filosofie padronâl); ur veve cjapade la rabie, par vie, che al jere stât concedût ancje ai forescj di vignî a bati la aste (Alviero Negro, Int di masnade); cjapât di une pôre istintive o sieravi une altre volte la puarte cu la clâf (Alan Brusini, Gian Paolo Linda, I forescj); ma ce smanie us aie cjapâts, dulà vêso il sintiment, dulà intindêso e dulà crodêso di rivà? (Riedo Pup, No sin bogns di fâ fieste)
    Sin. becâ , dominâ , grampâ , cjoli , tacâ , travanâ , strenzi , muardi
  30. v.tr. sintî, vê une sensazion fisiche o psicologjiche, un sintiment, un estri e v.i.:  o ai cjapade tante di chê pôre, che il sanc mi è lât dut in aghe (Franca Mainardis, Il sium di Lissandri); il princip che al veve cjapât simpatie tal gnûf amì lu pree di stâ cun lui un pôcs di dîs (Andreina Nicoloso Ciceri, I trê cjadreons - Racconti popolari friulani I)
    Sin. vê
  31. v.tr. sielzi e tignî a vore:  par cuvierzi i puescj di responsabil di cualifiche dirigjenziâl o di alte specializazion si pues cjapâ personâl a contrat a timp determinât (Aministrazion Publiche, Statût de Provincie di Udin)
    Sin. cjapâ sù , cjoli a vore , cjoli , cjoli sù , tignî , cjapâ a vore
  32. v.tr. tacâ a fâ une cierte funzion:  cheste liberalitât e podeve produsi situazions creativis, ma par sigûr no cjatave la adesion di Tosoni, che cuntune vision plui pragmatiche a pene cjapade la incarghe [di diretôr] al invie di pet une riorganizazion de radio e de programazion (Max Mauro, Un Friûl difarent: i 90 mhz di Onde Furlane)
    Sin. cjapâ sù , cjoli
  33. v.tr. sielzi e tignî tant che compagn o compagne sentimentâl:  Cramaris al à cjapât, come femine, la fie de sûr dal Pelegrin di S. Denêl (Bepi Agostinis, Storie de art in Friûl)
    Sin. cjoli , tirâ sù , tirâ dongje
  34. v.tr. sielzi e meti in vore dopo di vê considerât plui pussibilitâts:  Pierluigi Visintin al à let, studiât e in cualchi câs doprât soluzions za cjapadis di chescj tradutôrs (Sandri Carrozzo, Note dal curadôr ae traduzion dal Infier di Dante); la linie uficiâl in Italie e je che nol è sucedût nuie, che il conflit linguistic nol esist, che no je mai stade cjapade nissune misure agressive par rivâ ae sostituzion linguistiche (Sandri Carrozzo, Il Friûl tra conflit invisibil e alienazion); la vicinie si riunive sot il tei, in place, par che la int e fevelàs, e discutès e po e decidès. Li si sintive il pro e il cuintri e li si cjapave la decision (Riedo Pup, I furlans e la partecipazion)
    Sin. cjoli
  35. v.tr. sielzi e lâ par une strade, di une cierte bande, daûr di un ciert percors e v.i.:  il prin toc si fasevilu a zigzag fra plantis vidricis di faiâr, po si cjapave une scjalute cui scjalins larcs che si strenzevin simpri plui (Pieri Menis, La vuere sul Freikofel); Baldo al cjapà il troi dal ronc (Dino Virgili, Devant di dut il cîl)
    Sin. cjoli , fâ
    1. v.intr. lâ di une cierte bande:  al è rivât intal ultin il moment di saludâsi e di cjapâ ognidun la sô direzion (Ivano Urli, Storie di Min)
      Sin. lâ , zirâ ipon. , voltâ ipon. , svoltâ ipon.
  36. v.tr. acetâ alc o cdn. intun ciert mût, tignî intune cierte considerazion:  chei altris doi no si scomponin cuissà ce, tant che se no cjapassin la robe pardabon (Alan Brusini, Par stradis lungjis); al veve imparât une robe che chei altris no savevin, ven a dî cjapâ lis robis cemût che a vignivin, cjalâlis di adalt, cun distance e cence passion (Carlo Sgorlon, Prime di sere); tu cjapis lis robis masse sul tragjic tu (Costantino Smaniotto, Co l'amôr al cimie)
  37. v.tr. (fig.) tratâ cdn. intun ciert mût:  - No si sa ce maniere cjapâju! - al zonte Zaneto. - Siôrs po! Se o soi jo, o duar tun batifier! (Riedo Pup, La gjambe di Zaneto); se jo o fos in te, chel frutat o provarès a cjapâlu cu lis buinis (Pieri Menis, Chei di Muraie)
  38. v.tr. in costruzions cu la preposizion "a", dâ jù, dâ pachis:  jo us cjapi ducj a bastonadis se no si tirais di bande (Luciano Rocco, La foghere); sfaçât al jere stât! Ma lui no si jere inrabiât; se jal ves dite cualchidun altri lu varès cjapât a patafs (Pieri Menis, Ta la ombre dal santuari)
  39. v.tr. frontâ un ciert argoment, metisi a esaminâ cdn. o alc, dispès tal imperatîf in formis cun valôr enfatic o retoric:  cjapìn, par esempli, la peraule «caritât». Par latin e ancje par talian al vûl dî «amôr»; amôr par Diu e pal prossim (Riedo Pup, I furlans e la caritât)
    Sin. cjalâ , viodi , considerâ
  40. v.tr. fâ jentrâ tal organisim, soredut mangjant o bevint:  medisinis di cjapâ par bocje
    Sin. cjoli , bevi ipon. , gloti ipon. , mangjâ ipon. , parâ jù ipon.
  41. v.tr. di flum, lât, mâr e v.i., jessi destinatari de aghe puartade di un altri flum:  la Roie, costruide in cirche 100 agns a partî dal 1100 che e cjape la aghe dal Tiliment a Ospedâl Piçul (Rino Gubiani, Studi da la evoluzion dal paisaç mediant i toponims)
    1. ancje di altris robis che a puedin vê un flus, une corint:  ae buinore la statâl e cjape la plui part dal trafic che al va de citât e dai paîs te zone industriâl
  42. v.tr. esponisi ai elements naturâi:  «Ti viôt ros di muse: âstu cjapât soreli?» (Ovidio Colussi, Il pilustrât); cumò taponiti, di no cjapâ frêt (Jolanda Mazzon, Cungjò Friûl)
    Sin. cjoli
  43. v.tr. jessi infetât di une malatie o tocjât di un stât patologjic o di un traume:  ma parcè stâstu intal frêt? Ma sêstu mat? E cence scarpis? Tu ti cjapis une polmonite, tu, frut, crôs di Diu! (Laurin Zuan Nardin, Il rucjin); un dolôr sort. No mâl: un fastidi, come se o ves cjapât un cric o une slocje (Meni Ucel, Tant parom)
    Sin. becâ
  44. v.tr., v.intr. tacâ a vê une cierte carateristiche:  il cogo si indurmidìs e tes pagjelis dut al cjape di stiç (Andreina Nicoloso Ciceri, La fie e la fiastre - Racconti popolari friulani I); cui râfs si prepare un altri plat che si cjate dome te cusine furlane: la broade, fate cun chestis lidrîs tignudis a cjapâ di garp inte trape, gratadis, cuetis e servidis in gjenar par compagnâ cjar bulide o in altris ricetis (Sandri Carrozzo, Une regjon di cerçâ); lis oris i puartarin un spi di clâr e la nêf e cjapà alc come di lune (Maria Forte, L'avôt); o vin une alternance di senis che si davuelzin in plene nature, une nature salvadie e fuarte che ae fin e cjape un aspiet infernâl (Fabian Ros, A esmorga)
    Sin. cuistâ
  45. v.tr. tacâ a compuartâsi intune cierte maniere:  Min e Barban lant dongjelaltris pe strade a àn cjapade cun di plui la mende di robâ cualchi robe a suiâ sul ôr dai curtîi, une gjachete, une cotule, un pâr di bregons (Ivano Urli, Storie di Min); Michêl al veve cjapade la ande di lâ ogni domenie tor la une dopomisdì in cjase di gno barbe Grispi (Meni Ucel, I macarons)
  46. v.intr. preparâsi e lâ o tacâ o fâ alc a la svelte:  tu cjapis e tu vâs cjase a polsâ (Raffaele Serafini, Contis sot spirt)
    Sin. cjapâ sù , cjapâsi sù
  47. v.tr. (fig.) vê par vie di une origjin, di une cause e v.i.:  une localitât impuartante dilunc de vie Postumie e jere chê di Ad Quadruvium (Codroip), che e cjapave il non de crosere cu la vie che di Concuardie e leve bande il Noric (Mirta Faleschini, Stefano Magnani, Aldo Candussio, Gaetano Vinciguerra, Protostorie e storie romane in Friûl)
    Sin. cjoli , ereditâ , trai
    1. vê alc che si somee cun chel di un parint o di cualchidun che al à vût une influence:  o crôt di vê cjapade di gno pari cheste smanie di vivi: zornade dopo zornade, par altri, cence pensâ a ce che al à stât e cu la sperance che il doman al sedi miôr dal vuê (Gianni Gregoricchio, Trê feminis); ancje jo o ai cjapât la misogjinie e la misantropie di gno barbe ornitolic (Checo Tam, Sic transit gloria mundi)
      Sin. cjoli , ereditâ , cjapâ sù
  48. v.tr. riprodusi une figure, un ogjet, un ambient:  cjapâ un model di profîl
    Sin. fâ , tirâ jù , cjoli
    1. cul mieç de machine fotografiche o de cineprese:  e zire une fotografie dulà che Vera e il Nino si son fats cjapâ mudâts di nuviçs e Vera e à intor il vistît nuviçâl imprestât di mê mari (Ivano Urli, Storie di Vera); [il forestîr] si tire indaûr par cjapâ la fotografie de statue (Arturo Feruglio, Viaç a Vignesie)
      Sin. fâ , fotografâ , cjoli
  49. v.tr. osservâ e regjistrâ un dât, une carateristiche e v.i.:  cul jutori di robots si à proviodût a netâ il fabricât dal reatôr (1 Lui) e a cjapâ misuris dosimetrichis (2 Lui) (Alessandro Pascolini, Il disastri de centrâl nucleâr di Fukushima Dai-ichi); Gjildine, cun chê di fâsi cjapâ la pression e je lade dal miedi (Jaio Furlanâr, Doi metros)
    Sin. misurâ
  50. v.tr. ancje ass., rivâ a vê un segnâl, spec. cuntune radio o une television:  Checut al zire la manopule [de radio]: Beromünster… Monteceneri… Blue blue the love is blue… "Cjapade" al dîs il frutut (Checo Tam, Beromünster e Monteceneri); si pues lâ a Sant Florean e fâ altris zîrs a pît tal mieç de nature. La robe biele e je che il celulâr nol cjape (Marta Vezzi, I Plans di Vurgnè a Dimponç, une aziende agricule come puint jenfri des gjenerazions)
    Sin. ricevi
  51. v.tr. interpretâ intun ciert mût une peraule, une espression, un discors e sim.:  il contest al è chel de maledizion di Caìn, ma si pues cjapâlu come une maledizion o un pês de vite stesse, cence implicazions di colpe e di pecjât (Antoni Beline, Sant Jacum, là che al finìs il mont)
    Sin. intindi , interpretâ , capî
  52. v.tr. pensâ che cdn. o alc a sedin cualchidun o alc altri che si somee:  jê e la sô femine [dal protagonist de conte] a jerin tant che dôs gotis di aghe. Lis varessin cjapadis par zimulis (Fabian Ros, Un piçul particolâr); un om che al à chê di cognossi la veretât al à di jessi bon di fâ la diference e di no cjapâ une cuarde par un sarpint o une lusigne par un ferâl (Fabian Ros, Il lôf); a Casere Pâl Grant, barachis e barachins, restâts tant timp sepulîts sot de coltre blancje, si mostravin tal soreli: si varès podût cjapâju benissim par cjasutis di un borc di montagne (Pieri Menis, La glesiute dai alpins)
    Sin. scambiâ , cjoli
  53. v.intr. di une plante, meti lis lidrîs tal teren:  intant il tei plantât za grant si jere brincât a fuart a la tiere. Al veve cjapât ben (Maria Forte, Il tei)
    Sin. inlidrisâsi , insedâsi
    1. (fig.) tacâ a vê sucès:  a vevin pôre che la iniziative e finìs tal nuie e invezit e à cjapât e cumò le tornin a fâ ogni an
  54. v.intr., v.tr. di fûc, flame, combustibil e v.i., scomençâ a brusâ:  il fûc al à cjapât il palaç dongje (Carlo Tolazzi, La salamandrie tal fûc); dâi fûc al gjornâl; e soflâ par che a cjapin i stecs; e meti dentri i vidiçs par che il fûc si nudrissi (Meni Ucel, La Gjis); voltait la çocje di chê altre bande, e cjape plui ben (Pieri Somede dai Marcs, Vilie di Nadâl (teatri))
    Sin. piâsi , impiâsi , piâ , brusâ , impiâ
  55. v.intr. di materiâl che si da sù tenar, e che dopo al à di leâ, di tignî dongje e v.i., indurîsi:  lassâ i tocs te smuarse par une ore par che la cole e cjapi ben
Polirematichis e espressions idiomatichis Proverbis:
  • a fâ un plasê, si cjape doi displasês
  • al vûl mistîr in dut e lassâur cjapâ lis surîs ai gjats
  • ancje lis bolps vielis si lis cjape
  • bisugne cjapâ i uciei cuant che a passin
  • bisugne cjapâ lis vuitis cuant che a passin
  • bisugne lescjâ par cjapâ gjambars
  • cuant che il nûl al va a soreli jevât, mole il bo e va pal prât; cuant che il nûl al va a soreli a mont, cjape il bo e va a disconç
  • cuant che l'uciel al è fûr de scjaipule, si stente a cjapâlu
  • cui che al cjape il lot al cjape disgracie
  • cui che al da al torne a cjapâ
  • cui che al duar nol cjape pes
  • cui che al vûl cjapâ ducj i uciei che a passin no 'nt cjape nissun
  • cui che al vûl cjapâ il gût, bisugne che si bagni il cûl
  • cui che di gjat al nas al cjape surîs a scûr
  • cui che lis cjape a son sôs
  • cui che no si inzegne al cjape la tegne
  • cui sglavaçs no si cjape uciei
  • cul plui bati la strade, la bolp si cjape tal fier
  • cuntun sôl laç no si cjape il jeur
  • cuntune sole fave no si po cjapâ doi colomps
  • da la aghe si cjape il pes, dal fûc nuie
  • dut chel che di gjat al nas surîs al cjape
  • i cjatîfs: cjapâju cuant che a vegnin e lassâju lâ cuant che a van
  • i umign si cjapiju pe peraule, i bûs pai cuars
  • il durmion nol cjape pes
  • il mont al è come che si sa cjapâlu
  • il mont al è di cui che al sa cjapâlu
  • il ragn cu la sô tele al cjape moscjis ma no moscjons
  • il solt che si cjape a sotet al è un solt benedet
  • in vuere si va cun doi sacs: un par dâlis e un par cjapâlis
  • l'aur nol cjape magle
  • la strade plui curte a je chê che si cjape daurman
  • lasse cjapâ lis surîs ai gjats
  • lassii cjapâ la surîs al gjat
  • lis moscjis si lis cjape plui prest cu la mîl che no cul asêt
  • mâl par cui che lis da, piês par cui che lis cjape
  • more nere e intenç la ue: lasse la more, cjape la ue
  • no bisugne cjapâ dutis lis moscjis che a svolin
  • no si cjape lis moscjis cul asêt
  • plui adalt si va, plui grant bot si cjape
  • plui si cjape, plui si cjante
  • se nol è spavent no si cjape uciei
  • si cjape plui moscjis cuntune tace di mil, che no cuntune bote di asêt
  • tes barufis si va cun doi sacs: un par dâlis e un par cjapâlis
  • un len sec al cjape plui prest che no un vert
  • un len sec al cjape prime che no un vert
Segnale un erôr a dizionarifurlan@serling.org

Altris Imprescj

Dizionari Talian-Furlan

Il plui complet dizionari dal Talian al Furlan (passe 76.000 lemis) e no dome.

Dizionari Furlan-Talian

Dizionari ortografic dal Furlan al Talian.

Formari e cuadris flessionâi

Par cognossi la flession dai lemis furlans: la coniugazion pai verps e la declinazion pai nons e adietîfs.

GNOVE VERSION 2026

Coretôr Ortografic

Il coretôr online pai tescj furlans.

GNOVE VERSION 2026
Cul patrocini di
Universitât dal Friûl