Dizionari de Lenghe Furlane

dâ dongje    [CO]

1. loc.v. fâ in mût che plui elements, materiâi o imateriâi, a sedin insiemi o coordenâts o disponibii:  cu lis moletis al dave dongje i stiçs restâts te cinise (Pieri Menis, Il pignarûl); "Savêso che a Udin a àn di dâ dongje une scuadre par zuiâ di balon?" (Dino Virgili, La aghe da pît la cleve)
   Sin. unî , meti dongje , zontâ , riunî , tirâ dongje , tirâ adun , parâ dongje
   
   1. fâ alc che al è componût di plui elements:  al faseve scjaipulis pai uciei, al preparave lis viscjadis par lâ a tindi, al regolave la biciclete o la gurlete di sô none, al dave dongje un taulin (Pieri Menis, Sul agâr); se la sume no fos stade tant grande, le varès dade dongje jê (Maria Forte, La tiere di Lansing)
   2. costituî un complès fat di plui elements:  imbastî une forme instituzionâl che e rispieti lis dôs componentis economichis e culturâls che a dan dongje la nestre Regjon (Pietro Fontanini, Il spieli di Trent e di Bolzan)
   3. vê dentri di se plui elements:  la Assemblee de comunitât linguistiche furlane e da dongje plui di 100 comuns là che si fevele par furlan (Sandri Carrozzo, No sarà une leç a salvânus: o vin di cambiâ noaltris)
2. loc.v. fâ alc di mangjâ:  "Bêf ancje un got, plui tart la mê femine e darà dongje alc di cene… e contimi ce novitâts sono in paîs…" (Pieri Somede dai Marcs, Resurezion a Pontinie); i dave dongje la robe par che e mangjàs (Jolanda Mazzon, Fûr di timp)
   Sin. cumbinâ , prontâ , parecjâ , fâ , preparâ , meti dongje

Components:

• dâ v.tr., v.intr.
• dongje av., prep., adi.inv.