Dizionari de Lenghe Furlane

cumbinâ  cum|bi|nâ  [FO]

1. v.tr. meti dongje dôs o plui robis, ancje secont un criteri o par vê un ciert risultât:  mangjâ san, svariant e cumbinant il plui pussibil lis diviersis mangjativis al è il mût plui facil e sigûr par garantî un apuart adeguât di energjie e di sostancis (Guglielmo Pitzalis, Mangje san 1); [il popul catalan] al à vude de sô bande la glesie, che e à savût cumbinâ religjositât e culture, libris pe anime e libris pe ment (Antoni Beline, Sant Jacum, là che al finìs il mont)
   Sin. acuardâ , amalgamâ , armonizâ , compagnâ , conciliâ , cubiâ , incubiâ , justâ , leâ , messedâ , miscliçâ , misturâ , svicinâ , unî
   Var. combinâ , cuminâ
   
   1. rindi compatibil, conciliâ:  cumbinâ il bon e il biel
      Sin. acuardâ , amalgamâ , armonizâ , compagnâ , conciliâ , cubiâ , incubiâ , justâ , leâ , messedâ , miscliçâ , misturâ , svicinâ , unî
2. v.intr. jessi in armonie:  al sucedeve dispès che il coro di chei che a jerin in glesie nol cumbinàs cul coro di chei che a jerin difûr, cundut che un capelan si scanàs e si disbraçàs su la puarte de glesie par vuaiâ lis vôs des dôs schiriis (Meni Ucel, Otavari a Madone)
   Sin. confâ , tacâ , cordâ , cordâsi , cumbinâsi
3. v.tr. fâ in maniere di vê o che cualchidun altri al vedi:  a comprâle gnove i varessin coventâts almancul 400 mil francs, ma lui le veve cumbinade ben (Antescûr, Il svol dal Falcone); un ben primari: cumbinâ un sflic di tiere di proprietât e fâsi sù, magari un tic a la volte, une cjase che nissun podès plui parâti fûr (Roman Michelot, La cjase dai contents); se tu vuelis tabac di troi, disimi che tal cumbini ben jo
   Sin. procurâ , fâ vê , rangjâ
4. v.tr. rivâ a fâ alc che al à bisugne di une cierte organizazion, di un ciert ordin, di une cierte presentazion e v.i.:  o vevi fevelât cul deputât dal Pci Arnalt Baracêt, che al menave la cause de tutele des minorancis linguistichis, par che nus cumbinàs un incuintri cu la Jotti (Adrian Cescje, Memoriis di politiche linguistiche); Margarite, la parone, i voleve ben par chel so mût di fâ, chel contentâ i clients in dutis lis manieris, chel cumbinâ lis robis che nissun nol jesseve de buteghe cence vê comprât (Alan Brusini, Amîs come prime)
   Sin. dâ , fâ , meti in at , meti in vore , petâ , realizâ , sistemâ , meti sù
   
   1. rivâ a fâ alc, a produsi un risultât:  chest guvier, colegjalmentri considerât, al cumbine pôc (Riedo Pup, Ocjo di no pintîsi)
   2. dâ dongje a la svelte o cemût che si pues:  cun trê breons di peç, doi cavalets e un paion sglonf di scus di panole, i vevin cumbinade la cjamare (Alan Brusini, Come tai romançs); gjachetin lu cumbinà intune gjachete di tele militâr che jê e intenzè di blu te lissiarie (Roberto Ongaro, Il muc); la prime sclope je veve cumbinade Zili fari tun fusîl a bachete che al jere une clotie, di copâsi parie (Alan Brusini, Par stradis lungjis)
      Sin. rangjâ , dâ dongje , argagnâ
   3. fâ alc di sbaliât, scoret, mâl fat e v.i.:  Fatime e Bruno si cjalarin tra di lôr come par motivâ che dopo dut chel che e veve cumbinât, la vecje no meretave plui nissun rispiet (Carlo Sgorlon, Ombris tal infinît); come mestri, se cjapave dispès cun Neto, che al jere fat par dut fûr che par imparâ a lei e a scrivi, e che a scuele (in canoniche), nol jere bon di stâ fer un moment e a 'nt cumbinave di chês! (Meni Ucel, Neto)
5. v.intr. rivâ a fâ alc, cjapâ une decision, cjatâ une soluzion:  cumbinistu o âstu bisugne che ti judi?; il plevan - se o ai capît dret - al à cumbinât cuntun predissut di Udin, che al vegni a dî messe a Gargagnà dutis lis fiestis, fintremai che nol capitarà un altri capelan (Josef Marchet, Lis predicjis dal muini); lu cîr un pocjis di voltis e no si rive insom di nuie… e rive la ultime zornade par presentâ la ufierte e mi dîs che nol cumbine di viodimi (Sandri Carrozzo, Piçulis storiis di mafie furlane); no stâ a vê pôre, in cualchi maniere o cumbinìn
   Sin. rivâ
6. v.intr. rivâ a sedusi:  e je pocje frice ca ator ma usgnot o cumbinarìn cun cualchi todescjone in discoteche, fiditi! (Checo Tam, Milions di agns)
   Sin. tirâ sù
7. v.intr. metisi dacuardi:  po ben, cumbinarìn, è miserie di dut cumò, mi darês un pocje di blave che non si 'nd cjate in nissun lûc (Pieri Somede dai Marcs, Vilie di Nadâl (teatri))
8. v.tr. (fig.) decidi prime un risultât cuntun imbroi:  i presidents des dôs scuadris a àn cumbinade la partide
   Sin. comprâ , justâ , trucâ²

Polirematichis e espressions idiomatichis

• cumbinâ sù loc.v.
• cumbinâle v.pron.

Proverbis:

• "se" e "ma" no san ce cumbinâ