Dizionari de Lenghe Furlane

tirâ sù    [FO]

1. loc.v. fâ fuarce di trazion par fâ vignî sù o par fâ stâ adalt, dret e v.i.:  al da il segnâl di tirâ sù il sipari (Pieri Çorut, Il salam di siôr Tomâs); cetante aghe che e tirave sù dal poç! E spesseave a buinore a incolmâ cjaldîrs e podinis cun aghe serene (Maria Forte, Cjase di Dalban)
   Cfr. jevâ , alçâ
   
   1. movi o indreçâ insù, adalt une part dal cuarp:  [il cjaval] al scomençave a nulî l'aiar suspietôs, a tirâ sù il music, come se al sintis il gno odôr (Carlo Sgorlon, Il dolfin); Dolfo Melchior al tirà sù i voi e ju inclaudà su la muse di Berto (Gianni Gregoricchio, Trê feminis)
   2. movi, puartâ, meti adalt, ancje cence trazion:  [il zuiadôr di balon] al veve cjarinât la bale cui doi pîts tirantle sù cul tac (Stiefin Morat, Gjeometriis)
2. loc.v. cjapâ sù alc di par tiere o di dulà che al è poiât:  la int [tal funerâl] passave butant i grums di tiare di un antîc rît. […] Tiri sù un pugn di tiare ancje jo e mi dirêç viars la buse (Sandri Di Suald, Ah! la provincie)
   Sin. cjapâ sù , cuei¹ , racuei , cjoli sù
3. loc.v. spec. di rosis e di pomis, cjoli distacant de plante o dal teren:  nus àn puartât intun altri cjamp parcè che si veve di tirâ sù i prodots de campagne (Max Mauro, Buchenwald 1944)
   Sin. cjapâ sù , crevâ , çumâ , dispecolâ , dispicjâ , racuei , spiulâ , cuei¹ , cjoli sù , cjapâ , cjoli
4. loc.v. (fig.) rivâ a otignî, a vê, a fâsi dâ alc, soredut in grant numar:  jenfri il 1977 e il 1979 il Comitât popolâr pe Universitât dal Friûl al tirà sù cirche 125 mil firmis (Max Mauro, Un Friûl difarent: i 90 mhz di Onde Furlane); [Ugo Pellis] al rivà a tirâ sù lis peraulis dome (si fâs par mût di dî) di 727 paîs dai 1000 che a jerin stâts programâts [pal atlant linguistic] (Giovanni Frau, Peraulis in libertât: i atlants linguistics); a saran tirâts sù i dâts tai stes 20 comuns dal scandai dal 1998 (Oscar Puntel, Fotografâ la lenghe: dopo 15 agns la Universitât dal Friûl e prepare la gnove ricercje sociolinguistiche che nus disarà cemût che al sta il furlan)
   Sin. cjapâ sù , cjoli sù , dâ dongje , dâ adun
   
   1. rivâ a cjapâ, a vuadagnâ, a scuedi une cierte sume di bêçs:  al tirave sù alc cul lâ in marine, o a disboscâ, o a spiulâ e, dopo, a vendi e passarins e çocuts e stielis, e cualchi chilo di forment (Alviero Negro, Chel moscjo dal gno von); un ciart Konko, boxer cormonês ad ôr de pension e che al tirave sù cualchi franc ta combatiments di sagre di paîs (Stiefin Morat, Donald dal Tiliment)
      Sin. tirâ sot , scuedi , cjapâ , cjoli , meti in sachete , tirâ
5. loc.v. procurâ a se stes une cierte cundizion o cjatâsi intune cierte cundizion, soredut negative:  si viôt ancje l'abûs ne basse int, / mancjant il vin, di bevi aghe di vite, / e altris potoriis, che si van vendint; / robe a proposit par scurtâ la vite, / par tirâ sù des buinis malatiis, / e par crepâ a la svelte sun doi pîts (Pieri Çorut, Il Strolic mezan. Pronostic par l'an 1854); mi vevin fate tirâ sù une pipine sacratissime e dopo di vêmi ridût e sorât fin avonde, mi vevin lassât dute la gnot sul prât a cjapâ il bagnum (Pieri Menis, La gjaline robade)
   Sin. cjapâ , cjapâsi
6. loc.v. fâ vignî sù aspirant:  [intant che la cjase e bruse] si pare la bocje cu la man par no tirâ sù chel fumat (Dolfo Zorzut, No je plui vive); al tirà sù une prese di tabac di nâs sul ledrôs de man (Dino Virgili, La aghe da pît la cleve)
   
   1. ancje di condot, dispositîf, machinari e v.i.:  i veve netade la nape che no tirave. "Un pôc di cjalin ingrumât, cumò e tire sù ancje il spolert!" dissal (Maria Forte, Varc di confin); chê plataforma ta lis ultimis dôs setemanis a tirava sù sempri mancul petroli (Stiefin Morat, Donald dal Tiliment)
7. loc.v. fâ deventâ plui grant di misure, cuantitât, intensitât, valôr e v.i.:  par trop che al tiràs sù il presit jê no voleve savênt di vendiju (Raffaele Serafini, Soreli jevât a mont); la pussibilitât ufierte de leç 482/99 e à di judâ a tirâ sù il nivel complessîf dai procès di aprendiment/insegnament (Marilena Beltramini, Scuele e educazion plurilinguistiche)
   Sin. jevâ , alçâ , parâ sù , cressi , incressi
8. loc.v. dâ ai fruts ce che al covente par cressi, sedi tant che robe materiâl, sedi tant che educazion, valôrs e v.i.:  "[…] al è stât fortunât di cjatâ in jê siore parone, une mame, lui che nol à mai cognossût la sô al à provât la felicitât di jessi tant amât, di jessi tirât sù cun tant afiet, cun tante amorose delicatece" (Pieri Somede dai Marcs, Mame…); Min al è un frut. Tirât sù lavorant, cemût che a usavin tirâ sù i fruts in chei agns (Ivano Urli, Storie di Min)
   Sin. cressi
   
   1. ancje riferît a bestiis o plantis:  "[…] cui sussidis che mi spietavin o comprarai une vidiele di tirâ sù" (Pieri Somede dai Marcs, L'ombrenâr); biât om, al veve cirût dusinte francs dai Muraie par comprâ la polente e un purcitut di tirâ sù pal Unvier che al ven (Pieri Menis, Chei di Muraie); al fâs il contadin a Bugnins e al tire sù robe par chei de citât e le puarte a vendi al smistament di Palme (Stiefin Morat, Donald dal Tiliment)
   2. dâ une formazion, une culture, une preparazion:  cussì [cul spirt nazionalistic] a son stâts tirâts sù i mestris e professôrs, cussì e je stade direzude dute la culture taliane, cussì e à simpri cjaminât la nestre pedagogjie (Josef Marchet, Scuele incurabil); Il Reziment al veve bisugne di int stimade, di fede, che e saveve ce che e voleve dî la vuere, par tirâ sù lis reclutis, par insegnâur un pôc di amôr di patrie di chel vêr (Pieri Menis, Sul agâr)
9. loc.v. meti un mecanisim, in stât di funzionâ, spec. zirant une suste:  Valantin […] al si impense che bisugnàs tirâ sù chel orloi, tant par savè vie pe gnot ce ore che je (Giovanni Gortani, La teme - Une gnot intun cjastiel)
   Sin. cjamâ , cjariâ
10. loc.v. dâ fuarce fisiche, morâl o psicologjiche a cdn.:  «Se no tu viodis di chê femine, ti va cun Diu…» e disè la comari a Agnul. «I covente sostance… bisugne tirâle sù …» (Pieri Menis, Chei di Muraie); la puarine e veve passât un brut Unviar. El cûr nol è a puest. La Primevere la à tirade sù un fregul, ma l'Istât la à copade, zovine ancjimò (Arturo Feruglio, I stivâi di Zuan Batiste)
11. loc.v. (fig.) fâ cressi la ecitazion, la agressivitât, la ostilitât e v.i.:  polemichis fatis dome par tirâ sù la int cuintri dai forescj
    Sin. saborâ , sburtâ , stiçâ , stomblâ , uçâ
12. loc.v. (fig.) puartâ a une cundizion miôr:  migrâ al vûl dî ancje lassâ, e il Friûl dopo de vuere al à pierdude cetante int, che e podeve tirâlu sù (Francesc Placerean, Cuintristorie dal Friûl dal 1866 fint in dì di vuê); la sô situazion e je la plui distante dai Dipartiments italics, e la sô mancjance di canâi a fasaran simpri chest paîs il plui puar se nol rivarà a tirâ sù lis sôs produzions, ven a stâi a tirâ sù la agriculture, il cumierç e la industrie (Adrian Cescje, Liniis di storie sociâl e economiche dal Friûl 1500 - 1800)
    Sin. alçâ
13. loc.v. costruî o fâ deventâ plui alte une struture:  e disin che Atile, par gjoldi di plui el spetacul dal fûc di Aquilee, al vedi fate tirâ sù intune gnot la culine dal cjiscjel da Udin (Arturo Feruglio, Viaç a Vignesie); e je la strade di Plovit di fâ, di tirâ sù l'arzin dal flum vie insom dai orts (Dino Virgili, La aghe da pît la cleve); an par an ju metevi di bande ducj [i bêçs], un parsore l'altri, fintremai che o 'nd ai vûts avonde par comprâ il fonts e tirâ sù chel lûc che o soi a stâ ancjemò (Josef Marchet, Lis predicjis dal muini)
    Sin. costruî , edificâ , fâ , fâ sù
    
    1. fâ ancje alc di imateriâl o organizatîf:  par chel, jo o dîs, tornâ a meti in pîts e tornâ a tirâ sù fiestis come chê di sante Colombe al fâs part de ricostruzion dal nestri mont e dal nestri ambient (Francesc Placerean, La vite di chest mont, cence un pôc di spirt, e devente brute e insopuartabile); di tant timp o vevi la idee di tirâ sù un tercet acustic di ispirazion folk band inglese dai agns Sessante (Redazion La Patrie dal Friûl, Lino Straulino: tra ricercje e gnove creazion)
14. loc.v. fâ, in sens une vore larc, soredut alc che al pues compuartâ un sfuarç, une complicazion o consecuencis negativis:  no si sa mai che al vegni dongje Jacum […] e ti tiri sù une naine argomentative filosofiche che no finìs plui (Raffaele Serafini, Contis sot spirt); il plevan di Pinçan al à tirade sù une barufe apostoliche romane cun chel di Ruvigne (Angelo Floramo, In chê dì. 2e pontade)
15. loc.v. puartâ cun se, soredut cuntun mieç di traspuart:  finide la setemane il Nino al cjamà seglots di ram cjandelîrs e lampions a petrolio sul triciclo, al tirà sù ancje Eliseo e lu menà a Udin (Carlo Sgorlon, Prime di sere)
    Sin. cjapâ , cjoli , cjapâ sù , cjoli sù
16. loc.v. (zerg., pop.) cirî di cognossi cdn. cun chê di imbastî un rapuart sentimentâl o sessuâl:  al fevelave di cjatâ une fantacine di "tirâ sù" (Checo Tam, Pentecoste)
    Sin. cumbinâ
17. loc.v. lâ sù in rive fuarte:  il mus rivât dulà che la strade e scomence a tirâ sù, si fermà (Angelo Covazzi, Il miracul des panolis)
18. loc.v. soredut dal aiar, movisi insù, lâ adalt o di une bande che si pues calcolâ ad alt o setentrionâl:  la puarte abàs e jere vierte e al tirave sù un garbinat sfondrât (Antoni Beline, Pre Pitin)

Components:

• sù av., inter., s.m.inv., adi.inv.
• tirâ v.tr., v.intr.