cjoli sù
[AF]
-
loc.v.
cjapâ alc che al è par tiere o poiât di cualchi bande che si pues calcolâ plui in bas dal subiet o ancje cjapâ in sens gjeneric o intensitîf:
a cjolevin sù i claps jenfri lis Sinis dal binari 3 e ju tiravin ridaçant di gust, cirint di fâ svolâ par aiar chê scjate di bire (Agnul di Spere, La scjate rosse)
Sin. cjapâ sù
-
cjapâ un prodot de tiere:
a vevin un biel clamâlu a cjoli sù il sorc o a meti forment (Catarine Percude, L'oseladôr)
-
loc.v.
fâ montâ o permeti a cdn. di montâ tun mieç di traspuart par puartâ ator:
"O vin visât Savôr: us passe a cjoli sù ator lis sîs" (Stiefin Morat, Donald dal Tiliment)
Sin. cjapâ sù
-
loc.v.
fâ in mût di vê alc, soredut domandant ator:
fâsi judâ a cjoli sù lis firmis par presentâ lis sôs listis (Adrian Cescje, Memoriis di politiche linguistiche);
e basoâi son chei che van ator cul luminut, come chel pota di Diogjene, a cjoli sù peraulis e cjants e liendis, e creps e tauli rotis e armârs carolâts, come vô, Mario, e come me (Ugo Pellis, Dô peraulis di preambul a Storiutis gurissanis)
Sin. cjapâ sù
-
loc.v.
acetâ alc che al è proponût di altris o che si ven in cualchi maniere in contat, tant che une idee, une dotrine, une religjon, un mût di fâ e v.i.:
una femina che pensa cul so cjâf no pol impastâ al so sarviel cuntun atri; no pol adatâsi a cjoli sù li impunions e li usansi di un atri (Ugo Pellis, Catinuta)
Sin. cjapâ sù
-
loc.v.
cjapâ une responsabilitât, une incjarie e v.i.
Sin. cjapâ sù
Components:
-
cjoli
v.tr.
-
sù
av., inter., s.m.inv., adi.inv.
Proverbis:
- al pâr che la sô crôs a sedi la plui grande ma se si cjale chê di chei altris si torne a cjoli sù la sô
- cuant che il diaul al devente vieli, al cjol sù la corone
- cuant che la Mariane e à il cjapiel, met jù il falcet e cjol sù il ristiel
- cuant che lis monts a àn il cjapiel, met jù la pale e cjol sù il ristiel
