Dizionari de Lenghe Furlane

cjoli  /-ò-/  cjo|li  [FO]

1. v.tr. cjapâ alc, massime cu lis mans:  e va tal armâr a cjoli la padiele di tiere dal cicin. Le cjol e e sint che no pese. I alce la covertorie e e je vueide (Meni Ucel, Il cicin)
   Sin. cjapâ , cjapâ sù , cjoli sù , gafâ , grampâ , racuei , tirâ sù
   Var. toli , tuoli , cjueli , tioli
   
   1. di une bestie, cjapâ cu la bocje, cul bec, cu lis çatis, e v.i.:  la gjate e à cjolt i gjatuts pal copin e ju à puartâts te cove
2. v.tr. puartâ vie, puartâ alc cun se par tignîlu, par doprâlu:  se ti covente alc, tu puedis cjoli ce che tu vûs (Carlo Sgorlon, Prime di sere)
   
   1. viodi di vê alc tacant a doprâlu:  al jere frêt di fûr e Matie al tornà in cjase a cjoli il capot e la siarpe (Pieri Menis, Sul agâr)
3. v.tr. tirâ vie, tirâ fûr par tignî o par puartâ di cualchi bade:  Clement, par esempli, che al leve a cjoli glerie te Tor cu lis vacjis, tornant, si fermave a Godie plen di fam e di sêt (Riedo Pup, I furlans e lis bestiis)
   
   1. impedî, fermâ:  tirâ de bande une tende pesante che e cjol dute la lûs (Maria Forte, Cjase Basse); Vigjute no someave plui chê: une tossite che i cjoleve il respîr e che le veve tormentade cualchi an indaûr e jere tornade (Pieri Somede dai Marcs, Nardon e Vigjute di Nani); un dolôr cussì sbalsamant che no lu lassave nancje vaî, che i cjoleve la fuarce di ribelâsi (Pieri Menis, Sul agâr)
   2. dî o dimostrâ il contrari:  si ben che, a dî il vêr, in chei agns a Biliris a jerin a vê il capot juste […] i bolpats dal paîs, chest nol cjol che di frêt a 'nt fos plui di vuê (Meni Ucel, Messe a straoris)
      Sin. gjavâ
4. v.tr. [CO, TS] zûcs intai zûcs di cjartis, meti une cjarte tra chês che si ten in man o tra chês che si à vinçût:  a briscule ogni zuiadôr al met jù une des trê cjartis che al à in man, po, prime di fâ une altre zuiade, al cjol une cjarte dal mac
   Sin. pescjâ¹ , cjapâ , cjapâ sù , cjoli sù
5. v.tr. sielzi e comprâ:  cor sù in speziarie a cjoli lis medisinis di cheste recipe (Maria Forte, Cjase di Dalban); mi coventin cinc francs par cjoli il sâl, il vueli, il zucar (Pieri Somede dai Marcs, La buteghe dal barbîr)
   Sin. cjapâ , cuistâ , comprâ
6. v.tr. doprâ come mieç di traspuart:  o voi in stazion a cjoli la coriere
   Sin. cjapâ
7. v.tr. ricevi, acetâ ce che al ven proferît:  il premi al varà di jessi cjolt di persone o di un fiduciari cun deleghe scrite (Aministrazion Publiche, Regolament di "Zâl par Furlan")
   Sin. cjoli sù , cjapâ , ricevi , vê , tirâ , cjapâ sù
8. v.tr. vê in possès ma no in proprietât, daûr di ciertis cundizions:  sô pari, natîf di Braçan, al veve cjolt in afit un mulin su lis nestris roiis (Catarine Percude, La mulinarie)
9. v.tr. tacâ a tignî cun se alc o cdn. par puartâlu di cualchi bande:  si va a cjoli la robe de nuvice cul cjar e i bûs ducj inrosâts (Dino Virgili, La aghe da pît la cleve); il president si scusà che nol veve tant timp par gustâ. E i tocjave mangjâ pôc e lizêr. Un elicotar al sarès vignût a cjolilu aes dôs justis (Agnul di Spere, Un sorbet di limon)
   Sin. cjapâ sù , cjoli sù , tirâ , tirâ sù
10. v.tr. puartâ vie alc, spec. cu la fuarce:  [Carli il Grant] al fasè un maçalizi di chei Langobarts che a si jerin rivielâts. Altris a 'ndi mandà vie lontans, altris a 'ndi metè in preson e ur cjolè dut ce che vevin (Josef Marchet, Cuintristorie dal Friûl fin sot la Italie); cuant che a àn di preparâ un popul e fâlu deventâ sotan e fâlu ubidî simpri in dut e pardut, la prime robe che i cjolin, i cjolin la sô lenghe (Francesc Placerean, I furlans a àn di preâ te lôr lenghe par cuistions di religjon e di dignitât)
    Sin. cjoli sù , curâ , puartâ vie , robâ , gafâ
11. v.tr. fâ murî:  o prei Chel là sù che mi cjoli daurman, prin che o puedi viodi i miei paîs plui progredîts di cussì! (Josef Marchet, Lis predicjis dal muini)
12. v.tr. di alc, impegnâ un ciert puest o un ciert timp:  lis facendis burocratichis, tra bancje, pueste e comun, mi àn cjolte dute la matine
    Sin. tignî , cjapâ , puartâ vie
13. v.tr. sielzi e paiâ par fâ un lavôr:  lui al veve cjolt un bon avocat, ma nol rivave a viodi lis robis avonde claris par decidi ce fâ (Agnul di Spere, Frêt); il sindic lu veve cjolt a zornade tal ufici dal lavôr e dai sussidis (Pieri Menis, Chei di Muraie)
    Sin. cjapâ , cjapâ sù , cjoli a vore
14. v.tr. sielzi cdn. par une cierte funzion:  al casting dal prossim reality, chest colp, o soi sigûr, a ti cjolin ancje te (Maurizio Mattiuzza, Al prossim casting ti sielzin te)
    Sin. becâ , brincâ , cjapâ sù , cjoli sù , cucâ , dâ sotet , piâ , tirâsi dongje
15. v.tr. sielzi e tignî tant che compagn sentimentâl, soredut cul matrimoni:  jo no i volevi ben: lu ai cjolt par dismenteâti te che tu jeris sposât (Dino Virgili, Ombrenis sul liston); cheste siore e à cjatade la magne tal cjamp e le à copade, però dopo i à dite: Va là, va là, jo ti ai copade te, ma tu cjoliti mê madone! (Sandri Carrozzo, Il miluç de magne); cjolmi me, cjolmi ninine / contentine tu sarâs / une male perauline / tu di me no tu varâs (Popolâr, Cjolmi me)
16. v.tr. acetâ e tignî in famee:  une frute che o vin cjolte par caritât (Alviero Negro, Int di masnade)
    Sin. cjapâ sù , cjapâ , tirâ dongje
17. v.tr. (fig.) tratâ cdn. intun ciert mût
18. v.tr. dâ acet a alc o a cdn. intun ciert mût:  lu vevin cjolt in fraie tra di lôr, subit che al jere tornât, come un "fi prodic" (Amedeo Giacomini, Tal ospedâl); sant Pieri, inmusonât e grintôs, nol faseve altri che bruntulâ e cjoli dut par traviers chel che i diseve il Signôr (Catarine Percude, Lis âfs)
    Sin. piâ , tignî , cjapâ
    
    1. capî, considerâ intune cierte maniere:  avocats e leterâts a rapresentavin par lui une categorie pericolose, che e tindeve a cjoli come realtât chel che al jere dome il prodot dai lôr desideris e de lôr volontât (Giovanni Pillinini, Zuan Batiste Cavedalis - Une vite esemplâr)
       Sin. cjapâ , considerâ , calcolâ , viodi
19. v.tr. sielzi ce fâ e metilu in vore:  a Comission e scomençà subit a cjoli decisions impuartantis (Giovanni Pillinini, Zuan Batiste Cavedalis - Une vite esemplâr)
    Sin. cjapâ
20. v.tr. bevi o mangjâ, in gjenerâl o soredut cuant che si è tun ambient o cuant che si è ospits:  jentrait, comodaitsi! Cjolêso alc, di ce che al è: un got di cafè di vuardi, un tai di bacò? (Roberto Ongaro, Il muc); tu sâs che il miedi ti à ordenât di no cjoli ni cafè, ni licôrs (Pieri Somede dai Marcs, Un pugn di moscjis); fermiti un moment, che o lin a cjoli alc insiemi (Pieri Menis, Destins)
    Sin. bevi ipon. , mangjâ ipon. , parâ jù
21. v.tr. fâ jentrâ cualchi sostance tal organisim, glotintle o in altris manieris:  Vigji Trep, che dopo i otante al à scugnût cjoli lis gotis, lis contave une par une fin la ultime (Riedo Pup, I furlans e lis medisinis); bisugne che si meti in jet, doman matine che e cjoli une purghe (Pieri Somede dai Marcs, Ursule); cjoli une medisine che si crôt che e funzioni al pues ativâ i mecanisims de ricompense che a molin la dopamine, un impuartant neuromediatôr che al jude la persone a stâ subit ben (Franc Fari, Neurosiencis dal dolôr)
    Sin. gloti , parâ jù , meti dentri
22. v.tr. regjistrâ une misure:  il marangon i cjol la misure e po i fâs il coni e jal met a strent (Andreina Nicoloso Ciceri, Chê de principine - Racconti popolari friulani I)
    Sin. misurâ , cjapâ
23. v.tr. pensâ che alc o cdn. a sedin un altri par vie che si somein:  di lontan lu vevi cjolt par so fradi
    Sin. scambiâ , cjapâ
24. v.tr. ancje in espressions retorichis o enfatichis, sielzi tant che esempli, model, argoment e v.i.
    Sin. ripuartâ

Polirematichis e espressions idiomatichis

• cjoli ator loc.v.
• cjoli il bon in man loc.v.
• cjoli il sium loc.v.
• cjoli il trê di cope loc.v.
• cjoli in dolç loc.v.
• cjoli in zîr loc.v.
• cjoli la man loc.v.
• cjoli la peraule di bocje loc.v.
• cjoli pal boro loc.v.
• cjoli pal cûl loc.v.
• cjoli pal nâs loc.v.
• cjoli part loc.v.
• cjoli sù loc.v.
• cjoli vie loc.v.
• lâ a cjoli tal ort loc.v.

Proverbis:

• bisugne cjoli il ben cuant che al ven e il mâl cuant che si scuen
• bisugne cjoli l'abûs e tornâ l'ûs
• bisugne cjoli la int come che e je
• cjoli il ben cuant che al ven e il mâl cuant che si scuen
• cjoli l'abûs al è tornâ l'ûs
• cjolimi di grant e tornimi di piçul
• cuant che il Signôr al vûl pierdi un, i cjol il judizi
• cuant che no 'nd è, no si 'nt po cjoli
• cui che al vûl un cjan di cjace che lu cjoli di raze
• cui che al vûl vivi e che al vûl stâ ben che al cjoli il mont come che al ven
• cul pôc si cjol e cul trop si fâs gnocis
• cun zeis no si va a cjoli aghe
• dulà che a 'nd è, si po cjoli
• dulà che no 'nd è no si po cjoli
• il mont al è simpri biel par cui che lu sa cjoli
• il vin i da fuarce a la lenghe e ur e cjol a lis gjambis
• no bisugne cjoli une gjate tal sac
• no si cjol la ombrene par une sole ploie
• no stâ mai cjoli une gjate intun sac
• par stâ ben: cjoli il mont come che al ven
• prin di lâ a cjoli il purcit, si à di fâ il cjôt
• prin ton a soreli jevât, cjol il sac e va a marcjât; prin ton a soreli a mont, cjol il sac e va pal mont
• si cjol lis moletis par no scotâsi
• siroc e tramontan a menin vin e pan, buere e garbin a cjolin pan e vin
• tant si 'nd à e tant la int si 'nt cjol
• un bon consei cjolilu ancje di un cjalçumit