Dizionari de Lenghe Furlane

brincâ  brin|câ  [FO]

1. v.tr. cjapâ di buride o cunt ciert empit, o ancje cun violence:  lui, brincade une pistole che e jere picjade sul mûr, si meteve a berlà (Alan Brusini, Come tai romançs); il cjan lôf i veve brincât il braç (Roberto Ongaro, Il muc); il fantat al butà vie la pale, cun chê di brincâ Eliseo pal cuel, ma devant che al rivàs adore, l'om lu veve biel butât a rodolâsi su la jerbe di un cjamp (Carlo Sgorlon, Prime di sere); al brincà un piron su la taule e mi vignì sù pe muse par forâmi i voi (Antoni Beline, Pre Pitin)
   Sin. becâ , brancâ , cjapâ , çafâ , dâ la gafe , gafâ , piâ
   
   1. ancje dome cul sens di cjapâ, cjoli, ma intune espression plui enfatiche:  o brinchi il fiasc dal ramandul e lu proferìs al predi (Arturo Feruglio, Viaç a Vignesie)
   2. (fig.) ancje cun subiet astrat o inanimât:  la miserie lu veve brincât di piçul e no lu veve bandonât par in vite (Riedo Pup, Vigji Brusin)
2. v.tr. cjatâ in fal, cjapâ cui che al à fate une violazion:  i proprietaris di cumò, se a brinchin cualchidun a taiâ une cime sul lôr, al è afâr che i çoncjin lis mans (Josef Marchet, Lis predicjis dal muini); sul moment al pensà che lu vevin brincât par vie che nol paiave la IVZ (Fabian Ros, L'om che al pierdeve pinsîrs pe strade)
   Sin. cjapâ , cjatâ a nolis , cjatâ in cove , cjatâ in pache , cucâ , çafâ , dâ la gafe , gafâ , gatamâ , piâ , scuaiâ
3. v.tr. cjapâ cun fuarce, in mût di gjavâ la libertât:  i grancj gangsters a son stâts brincâts e metûts in galere (Riedo Pup, Par paiâ al vûl mistîr); i Rus a rivin adore, savê cemût, a brincâ lis siet feminis, polachis e russis, miscliçadis tal grum, lis gafin e lis puartin vie cun lôr intune caserme (Ivano Urli, Storie di Vera)
   Sin. brancâ , cjapâ , cjoli , curâ , çafâ , dâ la gafe , dâ la trate , gaspâ , imbraçâ , imbrancâ , imbrincâ , ingrampâ , lincinâ , petâ man , piâ
4. v.tr. (coloc.) cjapâ, massime cul ingjan, cu la prepotence o in maniere disoneste:  il lôr probleme al è chel di rivâ a spindi, a invistî, a riciclâ ducj i bêçs che a àn e che a brinchin (Riedo Pup, O Maradona o il caos)
   Sin. camufâ , gaspâ , gasparâ , gatamâ , imbrancâ , inculâ , larâ , puartâ vie , raspâ , sgarfâ , smafarâ , robâ , freâ , foti
5. v.tr. (fig.) di sensazions fisichis, fâsi sintî a fuart, dominâ:  la preiere i mûr sui lavris che za lu brinche la sium (Laurin Zuan Nardin, Daringad)
   Sin. becâ , cucâ , dominâ , grampâ , invistî , paronâ , tacâ , travanâ
   
   1. di sintiments o sensazions, jentrâ dentri te anime, dominâ in maniere imburide o violente:  scjampâ, par vie che il fûc al à cjapât il palaç dongje, scjampâ di dute chê intate che a si sint aromai sù pes scjalis, la pôre e torne a brincâ la frute, dulà lâ? (Carlo Tolazzi, La salamandrie tal fûc)
      Sin. cjapâ , strenzi , gafâ
6. v.tr. rivâ a vê une percezion imburide o ancje clare e precise:  la flame e veve tancj ponts di colôrs e lui scuasit al brincave cui voi ogni mudament (Maria Forte, La tiere di Lansing); cualchi volte, a stentavin a brincâ il significât precîs des proposizions teologjichis e a capî fin da pît lis diferencis sostanziâls des definizions (Riedo Pup, I furlans e la pinitince)
   Sin. cucâ , lumâ , lampâ , cjapâ sù
7. v.tr. cjatâ:  no soi stât bon di brincâ la strade juste (Arturo Feruglio, Viaç a Vignesie); no si sa ni cuant che il repert al sedi stât brincât, ni cui che lu ves olmât, ni indulà (Lucio Perès, Une lance longobarde cjatade a Baracêt)
   Sin. cjatâ fûr , sgarfâ , sgarfâ fûr , tirâ fûr
   
   1. (ancje fig.) scuvierzi, cjatâ alc di astrat, no materiâl e v.i.:  tes spesis al ingruès, par altri, tu brinchis simpri cualchi scont plui sostanziôs (Riedo Pup, I furlans e i prâts)