Dizionari de Lenghe Furlane

paronâ  pa|ro|nâ  [AF]

1. v.intr., v.tr. jessi paron, vê la proprietât:  al restave li dome il prin fi a paronâ, pal antîc dirit di mâs dal prin di mari (Dino Virgili, La aghe da pît la cleve)
2. v.intr., v.tr. vê podê, autoritât di comant, domini politic e militâr:  i talians a Adue a vignivin massacrâts dai neris che a crodevin di podê paronâ come nie (Alan Brusini, Come tai romançs); i Gôts no paronarin mai inte France di tramontan (Zorç Cadorin, Cualchi ipotesi sul furlan di prin di scrivilu)
   Sin. comandâ , dominâ , guviernâ
3. v.intr. vê ande di paron:  dopo che la sô viele e jere lade a paronâ ta chel altri mont, Nart, par un pôc al veve sintût la mancjance dal so comant, ancje se si sintive plui libar (Roberto Ongaro, Cretevierte)
   Sin. comandâ , detâ leç , imponisi , menâle di paron , meti leç , safarâ , safaronâ , sbraghessâ , sparonâ
4. v.intr., v.tr. (fig.) ancje cun subiet inanimât o ancje imateriâl, vê une presince dominante, determinante, impuartante, difondude e v.i.:  il vuicâ dal ristiel, rompint il grant cidinôr che al paronave ator, la faseve sveâ fûr des sôs fantasiis (Franca Mainardis, Il sium di Lissandri)
   Sin. dominâ , regnâ
5. v.tr., v.intr. di sensazion, sintiment, dibisugne e v.i., vê il podê di comandâ la anime e il cuarp:  il pinsîr di cjatâmi cun Otti al parone dut il gno jessi (Alan Brusini, Gian Paolo Linda, I forescj); in curt, il sium al veve paronât il so cuarp, peant il so spirt intun lancûr penç di sensazions e di visions (Franca Mainardis, Grivôr)
   Sin. dominâ
6. v.tr. rivâ a tignî controlât un istint, une inclinazion, une passion e v.i.:  la mê fote si misture cun alc di plui complicât che no rivi a paronâ e che mi sabore la anime (Alan Brusini, Gian Paolo Linda, I forescj)
   Sin. cidinâ , contignî , controlâ , fermâ , frenâ , gloti , imbrenâ , moderâ , morestâ , reprimi , scjafoiâ , somerzi , sorevinci , stratignî , svuarbâ , tignî , tignî a brene , tignî in brene , tignî indaûr , tignî in stangje , tignî in strope , tignî pe cjavece
7. v.tr. rivâ a cognossi, a controlâ, a doprâ cuntune vore di proprietât:  [Josef Cjargnel] le parone ben, la lenghe, ben une vore, e al sa tirâ fûr di jê colôr e espressivitât (Laurin Zuan Nardin, La saghe de tradizion orâl)
   Sin. cognossi , savê¹ , dominâ