Dizionari de Lenghe Furlane

fermâ  fer|mâ  [FO]

1. v.tr. fâ che une robe che si môf o che e pues movisi no si movi:  jê, cul pâl di fier, e torne a fermâ la puarte (Andreina Nicoloso Ciceri, Trê sûrs - Racconti popolari friulani I); il miedi al tignive Fonso pal braç, il fi i fermave lis gjambis, une infermiere e tacà a sburtâ il jet bande de puarte (Amedeo Giacomini, Tal ospedâl); il Bulo al puartà une man a fermâ lis vissaris che a si spopeavin di un slambri de panze e cu la curtiele vierte ta chê altre man, si metè a cori daûr a chel nemì (Maria Forte, Il Bulo di Crodio)
   Sin. blocâ , tignî
   
   1. no fâ lâ indevant une ativitât, une vore e v.i.:  se volês fâmi une grazie, sarès chê di permetimi di fermâ il mio lavôr tant che dure la visite di chei forescj (Zuan Lurinçon, La Madalene)
      Sin. cessâ , dismeti , lassâ , smeti , molâ , interompi
   2. interompi il funzionament di un aparât:  l'om al dismontà, al fermà il motôr, al gjavà de sachete une clâf, al vierzè la puarte di cjase e al jentrà (Roberto Ongaro, Cretevierte)
      Sin. studâ , distudâ
2. v.tr. fâ che cdn. nol puedi plui lâ indevant, vignî cuintri, lâ vie e v.i., ancje cu la autoritât o cu la fuarce:  lis trupis talianis a jerin scjampadis di buride, passant sul puint di Pinçan che al jere inmò in pîts e che al fo fat saltâ subit dopo par fermâ il nemì (Roberto Ongaro, Il muc)
   
   1. tignî impegnât, spec. in cjacaris:  une domenie, jessint fûr di Messe cu la mê femine e i fruts, le vin fermade e saludade (Pieri Somede dai Marcs, A jerin lagrimis); Zuanat al fermà Cuesim dongje il murut dal bearç, li dal poç, e si sentarin a discori (Dino Virgili, La aghe da pît la cleve)
   2. tignî come ospit:  siore Filumene ju fermave a gustâ (Maria Forte, La tiere di Lansing)
   3. des fuarcis dal ordin, fâ un control:  se mi vessin fermât i carabinîrs mi varessin di sigûr metût dentri (Checo Tam, Sense)
3. v.tr. impedî, no permeti alc o no permeti a cdn. di fâ alc:  al restà imbambinît e cence rispueste, scuasit vergognôs come un frut…, po al fermà altris domandis cu la sô ridade scjassose (Maria Forte, Cjase di Dalban); cundut che Cavedalis al fos contrari a cheste azion e al cirìs di fermâlu, Zucchi al decidè istès di lâ cuintri i todescs (Giovanni Pillinini, Zuan Batiste Cavedalis - Une vite esemplâr)
4. v.tr. [TS] dir. meti in stât di fer
5. v.tr. (fig.) concentrâsi cu la atenzion o fâ che alc al deventi sigûr tal pinsîr, tal ricuart e v.i.:  e cirive, cun voi seneôs, il borc di lui, propit a ret dal tei de cjase dai Santins, e di chê bande e fermave il so pinsîr restîf (Maria Forte, Cjase di Dalban)
   Sin. blocâ , inclaudâ , fissâ , tignî
6. v.tr. comunicâ l'interès par un ben o un serivizi, di maniere di tignîlu a disposizion, ancje paiant une capare o un anticip:  «Sì, Herr Müller, o ai cambiât cuartîr e lu ai fermât par un pieç a Lansing, cence disturbâ la vuestre famee» (Maria Forte, La tiere di Lansing)
   Sin. blocâ , prenotâ , risiervâ , impegnâ
   
   1. (scherç., pop.) impegnâ une persone pal matrimoni:  in chel an, biel tornât de Gjermanie, sot Sants, al pensà di lâ in cjase de pueme, a fermâle (Meni Ucel, Rosaris)
7. v.tr. meti sot secuestri:  i àn fermade dute la robe (Giulio Andrea Pirona, Ercole Carletti, Giovanni Battista Corgnali, Il Nuovo Pirona)
8. v.tr. fâ segn a un mieç di traspuart public che si vûl cjapâlu:  fermâ un taxi
9. v.intr. lassâ di fâ ce che si è daûr a fâ:  maiôr, o stais copant i nestris, fermait subit di trai! (Alan Brusini, Chei de vuere dal '15); ancje o crôt che al vedi fermât di plovi (Stiefin Morat, Donald dal Tiliment); a fermavin un moment di lavorâ (Dino Virgili, Cjase Basse)
   Sin. molâ , lassâ , finî , smeti , dismeti , cessâ
10. v.intr. viôt fermâsi :  il plevan al jere fermât a fevelâ cuntun om (Pieri Somede dai Marcs, Resurezion a Pontinie); o soi fermât te place dal paîs di Godie (Mario Beltramini, Jo e Graziella)

Proverbis:

• il timp al passe e no si po fermâlu
• ni par baiâ di cjan ni par ronâ di mus nol è stât mai fermât il cors de lune