Dizionari de Lenghe Furlane

finî  fi|nî  [FO]

1. v.tr. puartâ ae fin, ae conclusion, fâ fin insom:  cuant che Eliseo al veve finît une vore, il vecjo i dave alc, e ogni volte si meteve i ocjâi, al tirave fûr il tacuin e al contave dîs voltis lis cjartis di cent e di mil (Carlo Sgorlon, Prime di sere); par plasê, tornìn a cjase. O finissarìn il zîr une altre volte (Antoni Beline, Pre Pitin)
   Sin. compî , completâ , concludi , sierâ , terminâ , ultimâ
   
   1. fâ une azion fin insom, di maniere che l'obiet al sedi esaurît:  al tacà a mangjâ biel planc e finide la mignestre al tocjà un toc di pan tal vin (Carlo Sgorlon, Prime di sere); al finì cun dute calme il spagnolet e al tornà dentri (Amedeo Giacomini, Tal ospedâl)
   2. doprâ fin insom un prodot, une risorse, une sume e v.i., di maniere di no vêndi plui a disposizion:  o vin finît il lat, puedistu lâ a comprâlu?
   3. cuntun complement in agns, jessi te date juste di nassite:  in chê zornade mio pari al finive otantecuatri agns (Pieri Somede dai Marcs, A è lade cussì…); a puedin vignî elets intal Consei regjonâl i eletôrs che a varan finît 25 agns di etât inte dì des elezions (Aministrazion Publiche, Statût Speciâl de Regjon Autonome Friûl-Vignesie Julie)
      Sin. fâ
   4. ancje ass., riferît a une cualsisei azion che si capìs dal contest:  o ai finît! [la predicje] O varès tantis robis di dîus, ma gracie a Diu o vignarai a cjatâus, se o pues, tes vuestris parochiis (Francesc Placerean, Di ducj i dons dal Spiritussant, cumò al covente il don dal coragjo)
      Sin. compî , completâ , concludi , sierâ , terminâ , ultimâ , fâ , finîle
2. v.tr., v.intr. in costruzions cun "di" e infinît, puartâ insom une azion:  la clape e veve finît di mangjâ e, jevâts in pîts, i fantats si parecjavin a là (Roberto Ongaro, Il muc); e veve volût finî di studiâ a Triest, une lauree in lenghis (Carlo Tolazzi, La salamandrie tal fûc)
   Sin. cessâ , molâ , lassâ , finîle
   
   1. no fâ plui une cierte azion:  Oh! là, ancje chest [client] al finirà di vignî a tormentâmi (Pieri Somede dai Marcs, Une scarpute); preait il Signôr di no deventâ mai vecjos, parcè che, cun fîs come che o vês tirâts sù, ni bogns ni usâts a fâ nuie, in chê dì che o finirês di servî o començarês a intrigâ (Riedo Pup, I furlans e i frutins); cumò vonde… finìs di fâ la frute… (Pieri Menis, Chei di Muraie)
3. v.tr. (fig.) copâ une persone o une bestie massime se za feride o in agonie:  dopo de fusilade dal ploton di esecuzion, l'uficiâl al finive il condanât cuntun colp di pistole
4. v.tr. fâ patî, butâ intune brute cundizion:  o vevi propri il cjâf a nolis; è dut colpe des disgraciis che mi àn biel finide chest an (Luigi Gortani, La ospitalitât)
   Sin. copâ , butâ jù , sassinâ , tudâ , disfâ
5. v.tr. fâ in mût che alc al sedi definitîf e che al vedi efiet:  «[…] al è siôr Simon che ti spiete» dissè la Ulive «Chel al è seneôs di finî l'afâr» (Maria Forte, La tiere di Lansing)
   Sin. fâ , sierâ
6. v.tr. sierâ tant che tiermin o confin:  chê muraia maestosa de lis Alpis che finissin la Italia (Federigo Comelli, Il me paîs)
   Sin. sierâ
7. v.intr. jessi te fin, rivâ ae fin, concludisi:  intant al jere finît il bal e Nicola le puartave daprûf il banc domandant ce che e voleve bevi (Alan Brusini, Il svindic di Rosute); la vuere e je finide, al diseve, e si à di perdonâ (Cristina Noacco, Faliscjis); Tal an 1500, ae muart dal cont Leonart, la dinastie dai conts di Gurize e finìs e la Contee e passe sot dai Asburc (Ferruccio Tassin, Autonomie tal Friûl austriac)
   Sin. cessâ , concludisi , dismeti , murî , sierâsi , terminâ
   
   1. ancje impers., lassâ di sucedi, no sucedi plui:  al veve finît di plovi ancjemò doi dîs prin, ma in chê stradate lis pocis no si jerin suiadis (Carlo Tolazzi, La salamandrie tal fûc)
   2. murî:  miôr come te. Tu âs di pensâ dome par te. Finît tu, finît dut (Carlo Sgorlon, Prime di sere); di front a la sigurece di finî o vevin bisugne di dâ un sens al mont e a la nestre vite (Franc Fari, La evoluzion dal çurviel e de cussience tai vertebrâts)
      Sin. murî
   3. esaurîsi:  chel capitâl al jere finît, e sun chê monede no si podeve plui fâ nissun cont (Carlo Sgorlon, Il dolfin)
8. v.intr. vê une cierte forme o maniere di jessi te fin, te terminazion, te estension e v.i.:  il mûr, di une bande e di chê altre, al finive in dôs toratis (Dino Virgili, La aghe da pît la cleve)
   Sin. lâ a finî
9. v.intr. butâsi, confluî:  il roiâl dal so mulin, rigjavât dal Luri, al finive intun palût plen di cjanis e di crots (Dino Virgili, La aghe da pît la cleve)
   Sin. butâsi , lâ , lâ a finî
10. v.intr. jessi, rivâ, capitâ, sore dut in mût acidentâl o cence vê volût:  in ce puest jerio finît? Se almancul o ves cjatât une indicazion di podê capî (Checo Tam, Sense)
    Sin. capitâ , lâ , lâ a finî
    
    1. jessi pierdût di cualchi bande:  cuissà dulà che a son finidis lis clâfs…
       Sin. imbusâsi , lâ , lâ a finî
11. v.intr. cjatâsi intune cierte cundizion, pal solit negative:  Toni Aiz, al finì in galere a vite nome par vê sberlât «abasso Mussolini» (Alan Brusini, Chei di Cjasarse); dopo vê fat tantis strambariis chel puar om al à finît tal manicomi e là al è stât sierât cuatri agns (Pieri Somede dai Marcs, Strambariis); la gnove, come che o savês, e finì su ducj i gjornâi (Fabian Ros, L'om che al pierdeve pinsîrs pe strade)
    Sin. lâ , lâ a finî
    
    1. cul complement predicatîf dal subiet:  cussì il pampalugo (2 di spadis) al finì cjapât dal siet di briscule di Mario e par 61 a 59 la cubie Uchin-Mario e vuadagnà la finâl (Checo Tam, Se ti perdi tuo danno)
    2. cun daûr "a" e un infinît:  tancj emigrants in Belgjiche a finivin a lavorâ in miniere
       Sin. metisi
12. v.intr. vê une cierte evoluzion o conclusion o risultât:  cuntune trame che a moments e sfilie il surealisim e che e finìs in tragjedie (Fabian Ros, Festival di Pesaro 50+1); il Micul al finì par tiere, butât jù di un sganaf […] Reson o tuart, lis partidis dal Bulo a finivin cussì che ducj i siei resonaments si ingrumavin tes mans (Maria Forte, Il Bulo di Crodio)
    Sin. lâ , lâ a finî
13. v.intr. rezint costruzions cul infinît, jessi o vê tant che risultât, tant che conclusion di un ciert procediment:  la cuistion dai «Trê cjapitui» e finì cul dividi il patriarcjât (Josef Marchet, Cuintristorie dal Friûl fin sot la Italie); la sô vitorie su la muart che e finìs cul jessi ancje la nestre vitorie su la muart (Francesc Placerean, Crist resurît al colme dute la sperance dal om); se al starà inmò te barache al finirà par malâsi pardabon (Pieri Somede dai Marcs, Cjase di fitâ)
    
    1. ancje impers.:  al tone al tone, e al finirà par plovi
14. s.m.sing. fin, moment, pont, puest dulà che alc o cdn. al finìs:  cuant che a forin sul finî des cjasis a taiarin fûr pai prâts (Roberto Ongaro, Il muc); sul finî de matine Laurinç al le a cjaminâ de bande de campagne (Agnul di Spere, I prâts des Savodagnis)
    Sin. fin² , finâl

Polirematichis e espressions idiomatichis

• finî di patî loc.v.

Proverbis:

• ce che no si vûl finî si fâs di mancul di començâ
• cuant che a passin i codons, i uciei a finissin
• cuant che a vegnin i sivilots a finissin i uciei
• cuant che no si rive a dî: "glorie di Diu!" al è finît dut
• cuant che no si vûl finî si fâs di mancul di tacâ
• cuant che si scomence mâl, si finis piês
• cui che al mûr al finìs di patî
• cui che al scomence mâl al finìs piês
• cui che al scomence masse voris no 'nt finìs nissune
• cui che al scomence une vore in dì di vinars no le finìs plui
• cui che ben al scomence ben al finìs
• cui che nol sa sbassâsi a timp e lûc le finìs cul cjâf sbûs
• cui che nol scomence nol finìs
• finide la messe, brusade la cjandele
• finide la zornade, finît il lavôr; finide la gnot, finît il ripôs
• finîts i lens, si raspin lis stielis
• i sants lu scomencin e Sant Andree lu finìs
• mai no si scomence mai no si finìs
• miôr no dî che scomençâ e no finî
• miôr polente che e dure che no pan che al finìs
• muarte la piore e je finide la lane
• pic pic, il taiepiere nol deventarà mai ric: finît di picâ, finît di mangjâ
• se il gjal al cjante daspò di misdì, il bontimp al è par finî
• si scomence cul pôc e si finìs cul trop
• tic tac, al fâs il cjaliâr; finît di ticâ, finît di mangjâ
• une robe si sa cemût che e scomence ma no cemût che e finìs