Dizionari de Lenghe Furlane

copâ  co|pâ  [FO]

1. v.tr. fâ murî in maniere violente:  ju decimavin pe vergogne di sei scjampâts […] a jerin i carabinîrs «cuntun cjapielon sul cjâf e une palandrane intor che a someavin muiniis di ospedâl». E li ti copavin un su ogni dîs, chei pôcs disgraciâts che i mucs a vevin sparagnât (Alan Brusini, Come tai romançs); a è cuestion nomo di cjermins e cunfins / copâ un di ca: tu sês sassin; copâ un di là: tu sês eroe / ma i parons nestis e lôr son simpri chei (Giorgio Ferigo, Un soldatin); Eliseo al preà Diu che no i cjapàs chê rabie furiose che i veve fat copâ doi umign e passâ vincjesiet agns in galere (Carlo Sgorlon, Prime di sere); al faseve il daziâr, e i disè che e jere lade in multe par vie che e veve copât il purcit cence visâlu lui, par che al podès vignî a controlâ il pês e metii il dazi (Roberto Ongaro, Cretevierte)
   Sin. maçâ , sassinâ , fâ fûr , fâ jù , dispicjâ , tirâ jù di spese , mandâ a mangjâ il lidric pal poc , mandâ a fâ tiere di bocâi , netâ , fâ la piel , mandâ a fâ di spie al farc
   Cfr. copament , coparie , copadice
   
   1. fâ che alc nol esisti plui:  cuant che il furlan al sarà muart, o scomet che la storie e contarà che o sin stâts nô - i ultras - a copâlu cu la strambarie di volê domandâ di insegnâlu a scuele (Riedo Pup, Al jere une volte il furlan); lis "cassis di espansion": un polmon di ciment par incanalâ lis aghis, copant un dai ecosistemis plui interessants da la Europe (Angelo Floramo, Cuintristorie dal Nûfcent 2000-2010)
2. v.tr. causâ la muart, ancje cence volontât o cence violence:  une jone cjadude a traviers dal jet e veve copât sâr Cecco (Catarine Percude, La mulinarie); la pelagre e vinceve, copant masse int (Elio Varutti, Il Risorziment a Martignà)
3. v.tr. (iperb.) fâ mâl, fâ dam, ridusi intune situazion o cundizion negative
   Sin. abati , acanâ , brusâ , butâ jù , disfâ , disombolâ , fâ fûr , fâ jù , maçâ , sassinâ , scanâ , scuintiâ , scunî , sdramassâ , sflancâ , macolâ , ruvinâ , sdrumâ
   
   1. (fig.) cjastiâ cun severitât, ancje dant jù fuart:  o farai in mût che mê mari no viodi, se no, chê, mi cope (Meni Ucel, La ombrene)
   2. (fig., iperb.) gjavâ la voie di vivi, o ancje lis sperancis, il bon umôr, dâ une grande delusion e v.i.:  mi jere vignude la voie di paiâur di bevi a ducj, ma par fortune no lu ai fat. A varessin sigûr stracapît e il lôr refudâ mi varès copât (Alan Brusini, Gian Paolo Linda, I forescj); chê peraule e copà chel puar vieli: al restà come intrunît un lamp, po al sgramà fûr un racli di vît tal curtîl e al jentrà in cjase che nol viodeve dai voi (Dino Virgili, La aghe da pît la cleve)
   3. (fig.) ancje riferît a situazions, robis, ideis, pussibilitâts e v.i.:  i sorestants e chei che a messedin bêçs, politiche e storie a àn cheste virtût: di copâ un paîs o une valade, fâ scjampâ la int disperade e disdegnade, comprâ par un blanc e un neri dute la robe e po rivâ a spiegâ che chel al è un lûc ideâl par vivi e che al è il câs di "valorizâ" il puest (Antoni Beline, Pre Pitin)
4. v.tr. (fig.) stracâ une vore:  vuê, ce il cjalt, ce il lavôr mi àn copât
   Sin. butâ a cuarts , disfâ , distruzi , maçâ , finî , sassinâ , scunî , sflanchinâ , sdrumâ
5. v.tr. [BF] (fig.) fâ che alc che al bruse o che al fâs lûs no le fasi plui:  copâ la lum (Giulio Andrea Pirona, Ercole Carletti, Giovanni Battista Corgnali, Il Nuovo Pirona)
   Sin. studâ , distudâ
6. v.tr. fâ pierdi dut il valôr, dutis lis buinis cualitâts:  la cjar e sarès buine, ma chê salse triste le cope
   Sin. ruvinâ , sassinâ

Proverbis:

• bisugne copâ chê gjaline che e fâs l'ûf e po lu bêf
• copâ int, palâ nêf, sbroiâ morârs e spacâ coculis, al è dut timp pierdût
• cuant che il purcit al è gras, e je ore di copâlu
• cui bêçs e cu la amicizie si cope la justizie
• cui che lu copin o che si difint o che al cîr di murî di bessôl
• fiere continue e cope cjavai
• il plui bon mus al cope il paron
• ind cope plui la lenghe che no la spade
• l'avâr al coparès lis moscjis par vendi la piel
• l'avâr al cope il pedoli par vendi la piel
• l'avâr al cope il pulç par vendi la scusse
• l'om al à fat la machine, la machine e cope l'om
• lis trê contentecis dal om: lâ coscrit, copâ il purcit, murî la femine
• masse amôr ti svuarbe, masse dolôr ti cope
• trê voris a son dibant: palâ nêf, bati coculis e copâ oms