Dizionari de Lenghe Furlane

netâ  ne|tâ  [FO]

1. v.tr. (ancje ass.) fâ deventâ net, liberâ di alc che al sporcje:  l'infermîr al meteve in sest il jet restât vueit, al voltave il stramaç, al cambiave i bleons, al si sbassave par netâ sot vie (Alan Brusini, Il malât di Cime Undis); freiava un pâr di voltis la lama su la magna de la cjamesa par netâla dal pantan (Federigo Comelli, Il me paîs); lâ sul barcon a cjalâlu, magari fasint fente di bagnâ i canelons o di netâ i veris (Roberto Ongaro, Cretevierte); e cjol fûr de sachete […] un di chei façolets di colôr che e use jê e e nete il nâs (Meni Ucel, La visite dal vescul)
   Sin. dismaglâ ipon. , lavâ ipon. , lustrâ¹ ipon. , mondâ , ramondâ , sborfinâ ipon. , smondeâ
   
   1. gjavâ vie ce che al sporcje:  un lavôr di mats a netâ il polvar come soflât dentri pardut (Maria Forte, Cjase di Dalban); netâ cuntun sbrendulat cragnôs lis maglis di vin sul banc (Franca Mainardis, Il sium di Lissandri)
   2. (fig.) liberâ di ce che al sporcje a nivel morâl:  ogni cristian al varès di scovâ e netâ e furnî, miôr che al po, la sô anime (Josef Marchet, Lis predicjis dal muini)
2. v.tr. (ancje fig.) fâ che un orghin dal cuarp, al funzioni ben che si liberi di alc che al disturbe:  al domandave un pocje di magnesie par netâ il stomi (Antoni Beline, Pre Pitin)
3. v.tr. gjavâ ce che nol è bon di mangjâ:  se o cjolês un folp fresc, netaitlu de robe di dentri e conzelaitlu: in cheste maniere la cjar e sarà plui tenare (Sandri Carrozzo, Polbo á feira - Folp a la galiziane); lis cuessis di purcit a vegnin selezionadis e netadis (Oscar Puntel, Un persut unic par un lûc unic)
   Sin. curâ , scuriâ
4. v.tr. fâ che alc al sedi libar di elements che a dan fastidi.:  Remo al netave de nêf puartis e barcons dal so ambient (Alan Brusini, Gian Paolo Linda, I forescj); par fâ un rocul o une bressane al jere prime di dut un grum di lavôr. Si veve di netâ il puest, di plantâ i çamars e lassâju cressi (Cristina Noacco, Faliscjis); oris di lavôr a gjavâ jerbe e a netâ strops (Josef Marchet, Lis predicjis dal muini)
   Sin. curiâ , scuriâ , disbratâ
   
   1. gjavâ ce che al da fastidi:  netâ lis jerbatis tal curtîl (Roberto Ongaro, Cretevierte)
5. v.tr. (fig.) cjapâ sù dut o vuastâ sù dut:  dal '17, pe fam, i Mucs a vevin netâts i cjôts e la stale, puartade vie la robe di valôr cun chê di vendile (Lucio Perès, Mê none Miute); chel barabar [Atile] al jere là [a Aquilee], da pît des sôs muris, cuntune pice mate di netâ e di rafâ sù dut (Josef Cjargnel, Atile a Aquilee)
   Sin. fâ fûr , netâ vie , puartâ vie , curâ , dispueâ , ramondâ , sfrancjâ , smondeâ , svalisâ , netâ fûr
6. v.tr. (fig.) mangjâ e bevi une vore o une vore svelt o dut ce che al è:  al spartìs lis cuatri pagnochis in trentesîs tocs di chê istesse vualece, une fete di pan a dute la barache, netadis intun amen (Ivano Urli, Storie di Min); cetantis voltis che o scuen butâ la semence tal cjamp daûr des scuelis? E ogni volte me netin, chês sboentadis di passaris (Meni Ucel, La visite dal vescul)
   Sin. lovâ , slapâ , slofâ , netâ vie , netâ fûr
   
   1. mangjâ i ultins vanzums:  a cressevin a sun di miserie, a cirîsi la magnocule pes cjasis, là che a ur devin la cjalderie de polente di netâ (Alan Brusini, Come tai romançs); contentâsi di chel che ti dan, supant e netant cul dêt ce che no rive a cjapâ sù la sedon (Ivano Urli, Storie di Vera)
7. v.tr. dispierdi e slontanâ:  nus netarin da la Afriche e nus jemplarin di bombis cence lâ masse pal fin (Francesc Placerean, Cuintristorie dal Friûl dal 1866 fint in dì di vuê)
   Sin. netâ vie , netâ fûr
8. v.tr. (zerg.) tornâ a doprâ in ativitâts legâls monede che e ven di azions criminosis
9. v.tr. (zerg.) copâ:  "Tornimi la cjase, ladron! - al zigà Telo cul revolvar in man - Tornimi la cjase se no o sfracassi sù dut, o fâs un plan, us neti ducj…" (Dino Virgili, La aghe da pît la cleve); une rafiche di metraie cuintri de aghe! Po dopo nissun rumôr. Ju veve netâts… (Checo Tam, La sentinele)
   Sin. copâ , disbratâ , dispicjâ , eliminâ , fâ la fuee , licuidâ , maçâ , rangjâ , sfulminâ , tirâ jù di spese

Polirematichis e espressions idiomatichis

• netâ di polvar loc.v.
• netâ fûr loc.v.
• netâ il polvar loc.v.
• netâ il polvar su la schene loc.v.
• netâ vie loc.v.

Proverbis:

• a cîl turchin si nete il cjamin