Dizionari de Lenghe Furlane

licuidâ  li|cui|dâ  [CO, TS]

1. v.tr. econ. sierâ i conts definint, calcolant il vê di vê e il vê di dâ e in câs paiant:  "A lui se a i pararessia di podei licuidâ mê madrigna da la sô part e vei jo in man dut, essi paron espotic di fâ se che i crôt miei" (Ovidio Colussi, Il paron)
2. v.tr. econ. sierâ une ativitât o une societât, fâ lis operazion che a coventin par sierâ i conts di une ativitât o di une societât che e cesse, soredut paiant i debits e vendint, ancje par pôc, o cedint elements patrimoniâi:  la Casse di imprestance privade [...] e je stade licuidade tal 1829 (Lucia Pillon, L'archivio storico della Cassa di Risparmio di Gorizia (1831-1992))
3. v.tr. dâ une sume di bêçs, paiâ:  [la Regjon] e je daûr a prometi di licuidâ i dams des tampiestadis vecjis (Riedo Pup, Il Strolic furlan 1976)
4. v.tr. vendi, soredut a presit bas:  i erêts a vevin spesseât a licuidâ dut, Rico al veve comprât par un blanc e un neri un vecjo landò pensant di fâ cualchi nauli (Maria Gioitti del Monaco, Il nauli); [tal bazâr] si licuidavin ogni sorte di strafaniçs: vistîts fûr di mode, scarpis a ponte pai veions, borsetis di siore, ocjâi fumè, tiracjis (Alan Brusini, Par stradis lungjis)
5. v.tr. (fig.) puartâ une situazion a une soluzion:  lis cuistions di interès mondiâl, confederâl, des federazions etnichis dai comuns federâts o dai comuns libars, come ancje chês finanziariis a vignaran tratadis e licuidadis in compensazion, ma in maniere di no scjafoiâ la autonomie ni la libertât di nissun (Josef Marchet, Moviment Autonomist Furlan pe Federazion dai Popui)
   Sin. comedâ , sistemâ , justâ
   
   1. dâ un judizi svelt e definitîf:  al sarès facil licuidâ la cuistion cu la vecje regule “cul pes al va il blanc” (Margherita Timeus, La renghe de Cinise)
      Sin. paiâ
   2. rispuindi in mût di sierâ une cuistion:  "[...] In ogni mût, o proviodarai jo di comedâ la robe." Lu veve licuidât cussì, cun pocjis peraulis, ma dentri vie al saveve che il fantaçut nol veve fevelât dibant (Roberto Ongaro, Il muc)
      Sin. paiâ
   3. mandâ vie cdn. o saludâ cdn. che al va vie:  "Di li no tu mi scjampis bambin e ancje chê bardesse e sintarà al so da vê... Lassait dome che o licuidi al pitôr e po o farìn i conts." (Costantino Smaniotto, Co l'amôr al cimie)
      Sin. cumiatâ , spedî , licenziâ
   4. meti cdn. te cundizion di no podê fâ nuie, soredut di no podê fâ dams:  [...] cu la prospetive federaliste europeane, considerade la sole in stât di dâ soluzions ai “problemis des piçulis nazionalitâts”, licuidâ i “iredentisims” e dâ garanziis ae “rivade di une pâs stabile e di lungje durade” (Marc Stolf, La libertât di lenghe tant che dirit fondamentâl. Atualitât e complessitât dai contignûts de “Cjarte di Chivasso”)
   5. copâ cdn. o fâ sparî alc:  contadins cun intor i vistîts dai nobii che a àn pene licuidâts (Donato Toffoli, I 500 agns dal riviel de Joibe Grasse); in Italie a son tornâts a vivi i Conseis Comunâi, ma par no licuidâ un scjalin [de jerarchie] (Josef Marchet, Jerarchie); dut chel che o fasìn al somee provisori. Come se al fos pussibil che al vignìs licuidât intune gnot (Carlo Sgorlon, Ombris tal infinît)
      Sin. copâ , fâ fûr , dispicjâ , tirâ jù di spese
   6. finî dal dut alc di mangjâ o di bevi o une risorse o une sume di bêçs e v.i.:  jo o vevi licuidade za la mê part [di sgnape], chê di Fresc e la prionte che nus vevin dade (Riedo Pup, L'armistizi dal '16)
      Sin. fâ fûr