Dizionari de Lenghe Furlane

comedâ  co|me|dâ  [FO]

1. v.tr. fâ che alc che al jere rot o disjustât o che nol funzionave ben al torni a puest:  il paron de oficine li che al lavorave je veve procurade [une moto Guzzi Falcone], incidentade e curumbulade, ma e veve fatis lis garis e lis veve vinçudis, duncje e meretave une seconde pussibilitât. Cussì Relio le veve comedade un pôc ae volte (Antescûr, Il svol dal Falcone); il tet, vieri come che al jere, al veve masse gotis par comedâlu e po i trâfs scuasit ducj carulîts o fraits (Lucio Perès, Il mâl dal mûr); si inzegnave a comedâ ancje svearinis e orlois, par cjapâsi un franc e passâ lis zornadis (Antoni Beline, Pre Pitin)
   Sin. cuinçâ , justâ , rangjâ , regolâ , sistemâ
2. v.tr. fâ che alc al sedi miôr di ce che al è:  cualchi senatôr de Sardegne al à presentât almancul un emendament che al comedàs il test dal dissen di leç (Marc Stolf, Rai e furlan: la Italie e je «una e incorreggibile»)
   Sin. justâ , dreçâ , mendâ , corezi
3. v.tr. fâ che un difiet si ridusi o al sparissi:  l'obietîf [dal gnûf diretôr] al è […] di meti in ordin lis competencis e comedâ lis disfunzions inte struture, che a jerin evidentis (Max Mauro, Un Friûl difarent: i 90 mhz di Onde Furlane)
   Sin. justâ , mendâ , corezi
   
   1. cjatâ une compensazion rispiet a alc di negatîf:  volarès rimedeâ, volarès podê comedâ, sierâ un voli su ce che al è sucedût, ma purtrop, a no pues fâlu (Costantino Smaniotto, Co l'amôr al cimie)
      Sin. justâ , mendâ , corezi
4. v.tr. (fig.) cjatâ une soluzion:  il Parlament al someave che al ves tante premure di comedâ il vulnus legjislatîf su la cuistion (Christian Romanin, Amato De Monte: Il Friûl, patrie des bataiis di civiltât); ducj i miei dubis a saressin restâts tant che prin, parcè che dute la cuistion e jere aromai imbombade di malfidence, e no si podeve plui comedâle (Carlo Sgorlon, Il dolfin)
   Sin. justâ , rangjâ , regolâ , sistemâ , dreçâ
5. v.intr. metisi in cunvigne, cjatâ une soluzion che ur ledin ben a plui di lôr:  Pieri e Dreute, i fradis di Anzuline, a vevin tentât di comedâ cun Vigji, ma chel al jere come incjocât e al dismenteave dut [il so impegn cun Anzuline] (Maria Forte, Il tei)
   Sin. cordâsi , justâsi , justâle
6. v.tr. meti intun ciert puest, meti in ordin:  e faseve une lave par che no cjapàs di zâl, le slargjave tal soreli su la jerbe dal prât, le comedave ben in rie (Maria Forte, La fie çuete); Nart al tirà incà la cjadree par che si sentàs il frut, e Mariute lu comedà tal so puest (Dino Virgili, La division); e scomence a cjarinâ Renato sui cjavei, po lu busse disintji: «Il gno tato la mê anime, tu, la mê lûs!». E comede i cjavei sgardufâts, e i spacuce il vistît: «Tu il gno biel, il gno tato…» (Meni Ucel, Tirâ sù fruts)
   Sin. disponi , distrigâ , ordenâ , rangjâ , regolâ , rezi
7. v.tr. fâ cuintri a cdn., a peraulis o ancje a pachis:  spiete che mi vegni dongje, e lu comedi ben jo chel disgraciât
   Sin. cuinçâ , justâ , rangjâ , regolâ , sistemâ , petenâ , costumâ , dreçâ

Polirematichis e espressions idiomatichis

• comedâ gustâ e cene loc.v.

Proverbis:

• cui che nol comede la piçule buse al comede la grande
• dut si comede fûr che il grop dal cuel
• dut si comede fûr che il vues dal cuel
• si po comedâ dut fûr che la muart