Dizionari de Lenghe Furlane

mendâ  men|dâ  [CO]

1. v.tr. fâ in mût che alc nol vedi plui erôrs o difiets:  miorâ il dizionari intai agns mendantlu par ordin des sôs imperfezions (Adrian Cescje, Memoriis di politiche linguistiche); mi mendave lis mês traduzions di latin, mi insegnave la storie e la gjeografie, mi viodeve i compits di talian (Carlo Sgorlon, Il dolfin)
   Sin. corezi , justâ , dreçâ , comedâ
   
   1. [TS] dir., polit. fâ buine une modificazion di un test cun valôr legâl o uficiâl:  i cartei bilengâi metûts in vore a son dome uns 70: mancul di chei proviodûts de leç dal 1976, mendade de Cort costituzionâl (Renzo Balzan, Pale e pic cuintri dai slovens); altris oris a contindi i articui, chei che tancj convignûts des minorancis a vevin za acetâts e mendâts in mês di corispondence (Adrian Cescje, Memoriis di politiche linguistiche)
   2. fâ che un erôr o un difiet no sedin plui, no vedin plui efiet:  cumò al sarès il moment di mendâ lis falopis di dîs agns, no di pierdi timp in discussions cence efiet (Walter Tomada, Lis bataiis di scombati tal 2019); si à di zontâ une zornade interie, par meti in rie lis robis e mendâ lis falopis (Raffaele Serafini, B123ST)
   3. fâ in mût che cdn. nol fasi cierts erôrs o che si compuarti miôr, ancje in gjenerâl, tes relazions umanis, te vite e v.i.:  o mi mendais chei cuatri besteoi che mi fasin deventâ mat, o pûr jo o doi sù e o stoi a cjase (Meni Ucel, Il muini)
      Sin. dreçâ , costumâ
2. v.tr. (ancje ass.) cusî par meti a puest un tiessût, un vistît e v.i. che al à busis, sbregaduris e v.i.:  si sentarin daprûf dal fogolâr e a tacarin a cusî e a mendâ (Gianni Gregoricchio, Trê feminis); e comedave, e blecave, e mendave chei cuatri sbrendui par no spindi nancje un carantan (Franca Mainardis, Aiar di cjase)
   Sin. comedâ , pontolâ , straponzi