Dizionari de Lenghe Furlane

cuinçâ  cuin|çâ  [AF]

1. v.tr. tratâ intune cierte maniere, par dâ une cierte forme, preparazion o par meti a puest:  Ciroi al voleve dî chirurc, che une volte al podeve jessi ancje un barbîr, e il so lavôr al jere soredut chel di gjavâ sanc e cuinçâ stracueladis (Michela De Fazio, Cognons dal Friûl); "Cui isal chel sclapeçocs di barbîr che ti à cuinçât i cjavei in cheste maniere?" (Giovanni Miani, Barbîrs e pan)
   Sin. justâ , comedâ , regolâ
   
   1. preparâ alc, ancje a la mancul piês:  a àn scugnût cuinçâ un past di lidric par passisi, ma dut ur pareve bon parcè che a jerin tant contents (Andreina Nicoloso Ciceri, La fie e la fiastre - Racconti popolari friulani I)
   2. (antifr.) ridusi in brutis cundizions:  "Ah, brut infam! / besteate; a mi, a mi, cumò, a cuinçâti! (Zaneto Del Puppo, Lis animis dal Purgatori); [i partigjans] cul voli sul puint a studiin cemût cuinçâi i pilons (Ivano Urli, Storie di Min)
      Sin. regolâ , justâ , vuastâ , sassinâ , disjustâ , ruvinâ , fiscâ
   3. (fig.) cjatâ un rimiedi:  se avìn fat pal passât cualchi scjampade, / al baste par cuinçâle il pentiment (Ermes di Colorêt, I, 263)
2. v.tr. taiâ i cjâfs de vît par che la plante e cjapi une cierte forme e e fasi plui ue:  al lave a dâ une man, ogni tant, a cuinçâ vîts o a svangjâ o a semenâ verduris (Dino Virgili, La aghe da pît la cleve); ancje tai vignâi li ator a cuinçavin e a peavin lis vîts (Carlo Sgorlon, Prime di sere)
   
   1. taiâ lis cimis ancje di altris plantis, no dome de vît:  l'an cu ven o cuinçarai il garofolâr plui adore (Giuliana Pellegrini, Gotis)
3. v.tr. preparâ la piel o il corean par lavorâju
4. v.tr. preparâ il mangjâ cun sostancis sauridis, e in gjenar ancje grassis:  lis saradelis […] si cuincin cuntun fîl di vueli, asêt, pevar, mazorane secjade e ai (Emilia Baldassarre, Ort e cusine); une biele salate di cartufulis, magari di cuinçâ cun maionese e savôrs (Margherita Timeus, La trute, pescjâ e gustâ salût); comprâ un vues di persut par cuinçâ i sesarons (Arturo Feruglio, El lunis di Titute Lalele)
   Sin. insavorî , invueleâ ipon. , vueleâ ipon.
   
   1. (fig.) fâ deventâ plui bon:  po ben, cuince la mignestre / cuntun gran di bon umôr (Tite di Sandri, Coventavie invelegnâsi…)
5. v.tr. (fig., ancje iron.) insiorâ o messedâ alc cun plui elements:  lenghe e culture si confondevin […], al jere fintremai cualchidun che lis cuinçave di ideologjie marxiste leniniste in version maoiste nostrane (Adrian Cescje, Memoriis di politiche linguistiche); Don Franziskus al cuinçave invezit il discors cun bausiis e miezis veretâts (Checo Tam, Don Franziskus e Iskander)
6. v.tr. miorâ il teren butant sostancis che lu insiorin
   Sin. coltâ , inledanâ , ledanâ , spandi , ingrassâ

Proverbis:

• a cuinçâ la salate al vûl un mat a meti il vueli e un savi l'asêt
• ardiel vieri al cuince simpri ben
• il mâl dai altris nol cuince chel di nissun
• il mâl di un nol cuince chel di chei altris
• il mâl no i cuince i vues a dinissun
• il sâl al cuince e al discuince
• ogni gote e cuince un fasûl
• par cuinçâ ben il lidric al vûl: pal vueli un avâr, pal asêt un moderât e a messedâlu un mat