Dizionari de Lenghe Furlane

regolâ  re|go|lâ  [AF]

1. v.tr. meti une regule o un complès di regulis, di normis, imponi il rispiet di un ciert compuartament e v.i.:  al veve tignût dûr par un pôc, smaniôs di no vê ce fâ cun nissun, ma la leç che e regolave la vite dai zovins e jere plui fuarte de volontât di un sôl (Gianni Gregoricchio, Îr e doman); la Filologjiche e je par Cjanton la uniche istituzion titulade a decidi in cont de grafie de lenghe furlane, stant che e veve regolade "la grafie bielzà tal 1920" (Adrian Cescje, Memoriis di politiche linguistiche)
   Sin. normâ , dissiplinâ , guviernâ
   Var. regonâ
2. v.tr. fâ corispuindi a une cierte regule o ben a un ciert ordin, criteri, misure, cuantitât e v.i.:  regolâ i cops savoltâts dal burlaç (Meni Ucel, Il gjat); zontâ a pôc a pôc il brût bulint, simpri messedant. Regolâ di sâl (Giorgio Pascoli, Il Litum: jerbis salvadiis te cusine)
   Sin. comedâ , ordenâ , rangjâ , sestâ , vuaiâ , justâ
3. v.tr. fâ che alc al sedi o al funzioni o al sucedi intune cierte maniere, cuntune cierte forme, misure, intensitât, dinamiche e v.i.:  lassìn che vadi il mont come che al va; / jo farai chel che o pues, / e prin di scomençâ / vês di permeti, che o regoli i imprescj (Pieri Çorut, Il Strolic furlan par l'an 1847); al veve man di fâ di dut e, finît di lavorâ, al veve simpri dopo ancjemò alc di sbisiâ: […] al regolave la biciclete o la gurlete di sô none, al dave dongje un taulin, al dave di blanc in cjase, al tirave sù un mûr (Pieri Menis, Sul agâr); cuant che un camarin nol conservave ben il salam lu clamavin lui a sistemâ i barconuts a tramontan e a buere e a regolâ i aiars (Riedo Pup, I furlans e il mestri)
   Sin. justâ , sestâ , rangjâ , regjistrâ
4. v.tr. viodi dai lavôrs che a coventin par tignî in ordin, net, furnît di ce che al covente ambients tant che la cjase, la stale o sim.:  la camarelute e ven a regolâ la stanze (Arturo Feruglio, Viaç a Vignesie)
   Sin. guviernâ , rezi , stâ daûr , sestâ
   Cfr. disbratâ , distrigâ
   
   1. viodi che lis bestiis a sedin in ordin, netis e che a vedin di mangjâ e di bevi e dut ce che ur covente:  sul lâ a mont soreli a ore di regolâ lis vacjis, une vore di lôr a domandarin trê cuarts di ore di permès par lâ a cjase a distrigâ i lavôrs (Riedo Pup, La invasion); è stade a spandi ledan fin chê altre dì, e a regolâ i purcits a cjase sô fin che à cjatât chel puar om di sô marît (Pieri Somede dai Marcs, Lassait che mi sbrochi!)
5. v.tr. meti a puest alc che al è rot o che al à vût dams:  no stait a spietâ, se o vês di regolâ la cjase (pai cjargnei), se o veis di tornâle a fâ sù (pai furlans de zone plui pestade dal taramot), no stait a fidâsi dal stât! Se o podês, scomençait cui vuestris (Francesc Placerean, In non di Diu scomençait!)
   Sin. meti a puest , justâ
6. v.tr. cjatâ une soluzion o dâ un compens par une situazion problematiche o di contrast:  e vin tropis robis ancjimò di regolâ fra di noaltris (Ercole Carletti, Mariute); il barba che jara scapul e veva sôl sola chê gnessa al mont, dopo vêsi sigurât dai sentiments di Nesto, jara lât cuntun auto a regolâ lis pendensis di Nesto e veva puartât gnovamenti la pâs tal cûr dai doi inamorâts (Ranieri Mario Cossâr, Nita e Nesto)
   Sin. justâ
7. v.tr. (fig.) dâ a cdn. ce che si merete, soredut une punizion, pachis o sim.:  lasse che mi vegni pal viers e lu regoli ben jo
   Sin. justâ , rangjâ

Polirematichis e espressions idiomatichis

• regolâ di fieste loc.v.
• regolâ di fiestis loc.v.
• regolâ i conts loc.v.
• regolâ lis cuestis loc.v.