Dizionari de Lenghe Furlane

distrigâ  dis|tri|gâ  [AF]

1. v.tr. fâ che alc nol sedi ingropât, ingredeât e v.i.:  distrigâ i cjavei (Giulio Andrea Pirona, Ercole Carletti, Giovanni Battista Corgnali, Il Nuovo Pirona)
   Sin. disgropâ , disberdeâ , disgredeâ , disimberdeâ , disleâ , dispetolâ
   
   1. fâ che alc nol sedi plui intrigât, plen di robe o gjavâ vie alc che al intrighe:  cul so pas çumpinant e scomençà a distrigâ la taule e a puartâ vie plats e fondinis (Maria Forte, La fie çuete); a vevin passât la zornade a vore, a distrigâ maseriis (Max Mauro, Buchenwald 1944)
2. v.tr. (fig.) cjatâ la soluzion o vignî fûr di une situazion intrigose:  chê regjon che a intindin implantâ i partîts governatîfs e je une panadute che no sa di nuie, che no distrighe nuie, che no zove nuie (Josef Marchet, Diferencis); "o sin rivâts insom" o disevin! Che di cumò al è dut sempliç, che i berdeis ju vin distrigâts, che romai nus reste nome di meti in sachete i bêçs e pensâ cemût spindiju! (Stiefin Morat, Donald dal Tiliment); no si po inludisi di distrigâ intune cunvigne une tematiche simpri vierte e simpri di risolvi (Antoni Beline, Cence pôre)
   Sin. cjatâ il dret , disberdeâ , disfâ , disgredeâ , disgropâ , disimberdeâ , disleâ , dispetolâ , disbratâ , sbratâ
3. v.tr. fâ alc in mût di finîlu, ancje cun sveltece o premure:  Svualdine, la massarie anzianote, e finive di distrigâ i lavôrs po si sentave ancje jê, suntun bredul, a scussâ fasûi o a specolâ sorc (Maria Forte, Cjase di Dalban)
   Sin. sbratâ , disbratâ , parâ fûr , tirâ vie
   
   1. puartâ insom un procediment burocratic:  i savevi che mandâ vie un cence vê distrigât la pratiche, segnantle par altri come fate, a puartave davour une schirie di azions dissiplinârs che clamâlis penzis al ere pouc (Stiefin Morat, Kebar krossè); i Uficis dal Comun a son a lôr disposizion par distrigâ lis pratichis burocratichis che a vessin di coventâ (Riedo Pup, Il partît dai zovins coscrits)
   2. servî cdn. in alc che i covente, in mût che al sedi sodisfat, spec. a la svelte:  [il predi] ur faseve mil compliments, al strambolotave se mai la nuvice e jere plui tarondute dal just […] e ju distrigave tun batût di voli (Antoni Beline, Pre Pitin); po, intant che jê e distrighe l'aventôr, / al jentre a bevi un bussul il cursôr (Enrico Fruch, In buteghe)
   3. fâ passâ il timp in cualchi maniere:  ancje Zuan al distrigave cualchi ore ta la ostarie par distacâsi un pôc dal so spirt e intant al dispegnave la sô boce di bire (Maria Forte, La tiere di Lansing)
   4. (ass.) fâ svelt, fâ in curt:  " […] Distrighe, che no ai timp di pierdi!" (Meni Ucel, Confessions); po ben, fasìn di bessôi, ma fasìn alc, çugnìnsi, distrighìn, spesseìn (Enos Costantin, Un virus tes lidrîs)
      Sin. spesseâ , bailâ , distrigâsi , çugnâsi , movisi , disbratâ

Proverbis:

• trops lôfs a stan pôc a distrigâ une piore
• trops lôfs tor di une piore le àn prest distrigade