Dizionari de Lenghe Furlane

distrigâsi  dis|tri|gâ|si  [AF]

1. v.pron.intr., v.pron.tr. deliberâsi di alc che al ingredee:  distrigâsi dai baraçs
   Sin. deliberâsi , disgredeâsi , disgropâsi , sfrancjâsi , disberdeâsi
2. v.pron.intr. tirâsi fûr di un intric, di une situazion complicade, problematiche:  al clamà il Signôr: «Signorut, daitmi almancul vô une man! Vêt pietât di un puar cjoc […]» Cheste volte al è rivât adore a distrigâsi [vignint fûr dal fossâl là che al jere colât] e si è metût in strade (Pieri Menis, Agnul Baraçut)
   Sin. disbratâle , disbratâsi , distrigâle , suiâle , suiâse , tirâse fûr , tirâsi fûr , gjavâsi fûr , gjavâsi , gjavâse , diliberâsi
3. v.pron.intr. liberâsi di un impegn, di un oblic, di alc che in cualchi maniere al pese e sim.:  e sa di vê dafâ cui furlans che, cuant che si trate di paiâ, a cjapin adiriture da dî fra di lôr par distrigâsi i prins (Riedo Pup, O cun Zico o cence Zico); al saveve di vê di dâ une brute gnove, al voleve distrigâsi daurman di chê incombence cussì pesante e tragjiche (Roberto Ongaro, Il muc)
   Sin. liberâsi , diliberâsi
   
   1. liberâsi di cdn. o di alc che al da fastidi:  la voia di lâ a cjatâ i amîs a montava sù ogni dì, ma simût si podeva fâ par distrigâsi da la femina? (Luciano Spangher, La Catina che ti veva frêt)
      Sin. liberâsi , diliberâsi , disbratâsi , dispetolâsi , disfâsi
4. v.pron.intr., v.pron.tr. rivâ a fâ avonde ben alc, cjatâ une soluzion avonde buine, ancje in maniere aprossimative, inzegnose, fasint dome cu lis fuarcis che si à e no tes cundizions ideâls:  e je stade la risoluzion da la Assemblee plenarie dai 75 di lavâsi lis mans sul cont da la Autonomie furlane, e di lassâ che si distrighi la Costituente (Josef Marchet, Gjambadoriis); il corîr al è un dal puest che al sa distrigâsi pai trois a dilunc la Cravuazie rivant a bon pro cence bisugne des stradis batudis dai Todescs (Ivano Urli, Storie di Min)
   Sin. cumbinâ , disbratâsi , puartâle fûr , suiâse , rangjâsi
5. v.pron.intr. rivâ a fâ alc in pôc timp:  "Anìn, distrighiti, che jo no ai timp di butâ vie daûr di te" (Luigi Gortani, Meni Fari); la Messe cussì matutine e doveve smaraveâ ancje i Sants di piere sui altârs. Pre Domeni al veve premure e al si distrigave a la svelte (Maria Forte, La gnot di Radeschi)
   Sin. bailâ , messedâsi , niçâsi , spesseâ
6. v.pron.intr. lâ dal cuarp:  a lis curtis, done Sabide si viôt il câs imbroiât, no po plui tignî strent, e va, e vise so marît. "Nuie paùre," lui i rispuint: "ven ca cun me daûr chest confessionari, ma baile distrighiti a la preste, davant che la int si acuarzi" (Giovanni Gortani, La cjargnele dal avout)
   Sin. cagâ , cjiâ , fâle , poiâle
7. v.pron.intr. parturî:  se intune stalute al nasseve un vidiel, ducj a corevin a judâ il part, contents se la vacje si distrigave ben (Maria Forte, Cjase di Dalban)
   Sin. diliberâsi , fâ , parturî

Proverbis:

• lasse che cui che al sa a ce fâ si distrighi