Dizionari de Lenghe Furlane

messedâsi  me|sse|dâ|si  [AF]

1. v.pron.tr. messedâ alc di se stes o par se stes, viôt messedâ
2. v.pron.intr. di personis o robis, sedi de stesse sorte che ben diferentis tra di lôr, dâsi dongje, finî insiemi intun complès eterogjeni o omogjeni:  al è il segnâl dal assalt, e un sglavin di mil e mil vôs stratignudis, un sgorneament di ferace e un talponâ di cjavai si messedin (Josef Cjargnel, Il cjistiel di Udin); si saludarin dibot cence fevelâ, cjalantsi e avonde. A lerin vie messedantsi cu la int (Agnul di Spere, In viaç di domenie); il vecjo si messede cul gnûf, creant une spiritualitât misteriose e plene di intersezions (Angelo Floramo, Intun non la fuarce di une comunitât)
   Sin. miscliçâsi , unîsi , dâsi dongje , misturâsi
3. v.pron.intr. vê o fâ un moviment:  dut intun al sint como [lis âfs] a messedâsi li tal mieç dai flôrs (Dolfo Zorzut, El grivon); el sanc al scomençave a messedâsi tes venis plui in presse di simpri (Arturo Feruglio, El lunis di Titute Lalele)
   
   1. fâ alc o movisi in maniere gjeneriche, che no je definide o che no si vûl definî:  ti viôt un omenut che al si messedave te stanzie li dongje. Al jere il segretari comunâl. E in chel ancje lui mi viôt e mi fâs di mot di lâi dongje (Alan Brusini, Gian Paolo Linda, I forescj)
      Sin. movisi , cjossolâ
4. v.pron.intr. fâ alc cun impegn, concentrazion, fadie e v.i.:  lis feminis, cjamadis di fastidis, fruts e pedoi, ur tocjave di messedâsi di une lûs a di chê altre, par procurâ la bocjade a chei canais (Josef Cjargnel, La farine dal diaul); chei pinsîrs i fasevin vignî i sgrisui, e cussì al butave vie la manteline e al tornave a lavorâ, stant che messedantsi al rivave a parâju vie (Carlo Sgorlon, Prime di sere)
   Sin. doprâsi , movisi , spindisi , dâi sot , çugnâsi , manezâsi , bati mans e pîts , butâsi in cuatri , dâi daûr , dâsi ator , dâsi da fâ , dâsi lis mans ator , metisi sot , niçâsi
   
   1. viodi di tacâ a fâ alc cun impegn, di buride, di buine voie:  "Svelt, svelt! Salte fûr, poltron, messediti […]" (Carlo Sgorlon, Il dolfin)
      Sin. movisi , niçâsi , cori
   2. fâ lis robis in maniere di vê bogns risultâts, ancje in maniere plui o mancul regolâr o oneste:  se un al à ingrumât tancj bêçs, al vûl dî che al sa messedâsi (Antoni Beline, Politichis 2001: la gnot de reson)
5. v.pron.intr. vê a ce fâ cun alc o cun cdn.:  cji visi, Andrea, tu mi sameos […] un bon frut, no stâ messedâcji cun chê intato (Fulvio ReddKaa Romanin, Geologicamente impossibile); e viveve par so cont e no si messedave tes cjacaris dal paîs (Carlo Sgorlon, Prime di sere)
   Sin. imbragâsi , impeolâsi , impetolâsi
6. v.pron.intr. jessi cjapât dal gnervôs, de agjitazion e sim:  scuasi ducj i presints si sviarsin a fuarce di ridi e siore Marie si messede come une lipare (Gjovanin Falescjin, Bastian dal for)
   Sin. agjitâsi

Proverbis:

• a messedâsi tal cjarbon, si reste cjarbonâts